Bìoball air-loidhne

Khé-sī-lio̍k 1 - 現代台語譯本羅馬字版

¹ Che sī Iâ-so͘ Ki-tok ê khé-sī. Siōng-tè hō͘ I chit-ê khé-sī, ài I chiong it-tēng sûi-sî ōe hoat-seng ê tāi-chì chí-sī Siōng-tè ê chèng po̍k-jîn. Ki-tok ū chhe-khián I ê thiⁿ-sài khì chí-sī I ê po̍k-jîn Iok-hān.

² Iok-hān ūi-tio̍h Siōng-tè ê sìn-sit kap Iâ-so͘ Ki-tok ê kiàn-chèng, chiū-sī i só͘ khòaⁿ--kìⁿ ê it-chhè lâi choh-chèng.

³ Tha̍k chit-pún chheh ê lâng chin ū hok-khì; thiaⁿ-kìⁿ chit-ê ū-giân koh chun-siú chheh--ni̍h só͘ kì-chài ê lâng chin ū hok-khì; in-ūi sî-ki kūn lah.

Tùi Chhit Ê Kàu-hōe Chhéng-an

^4-5 Góa Iok-hān siá-phoe hō͘ A-sè-a ê chhit ê kàu-hōe, kóng: Goān hiān-chāi chûn-chāi, kè-khì chûn-chāi, chiong-lâi mā chûn-chāi ê Siōng-tè, kap I chō-ūi chêng ê chhit ê sîn, í-ki̍p Iâ-so͘ Ki-tok, sù lín un-tián kap pêng-an! Ki-tok sī tiong-sìn ê kiàn-chèng-jîn, thâu chi̍t ê tùi sí-lâng tiong koh-oa̍h, sī tōe-chiūⁿ bān-ông ê Chú-cháiⁿ. I thiàⁿ lán, ūi-tio̍h lán lâu-huih hi-seng lâi tháu-pàng lán thoat-lī chōe,

⁶ hō͘ lán chiâⁿ-chòe chi̍t ê kok-tō͘, choh chè-si lâi ho̍k-sāi I ê Pē Siōng-tè. Goān êng-kng kap koân-lêng kui tī Iâ-so͘ Ki-tok, ti̍t-kàu éng-éng-oán-oán. Amen!

⁷ Lí khòaⁿ, I chē-hûn teh lâi, chèng-lâng ōe khòaⁿ-kìⁿ I, liân ēng chhiuⁿ chha̍k I ê lâng mā ōe khòaⁿ--kìⁿ. Tōe-chiūⁿ bān-cho̍k lóng ōe in-ūi I thî-khàu. Chit-ê sū it-tēng ōe hoat-seng. Amen!

⁸ Hiān-chāi chûn-chāi, kè-khì chûn-chāi, chiong-lâi mā chûn-chāi ê Choân-lêng ê Chú Siōng-tè kóng, “Góa sī A-ní-hoat, sī A-bí-ka.”

Ki-tok tùi Iok-hān Hián-hiān

⁹ Góa sī Iok-hān, sī lín ê hiaⁿ-tī, kap lín chòe-hé hun-tam Iâ-so͘ ê hoān-lān kap thun-lún, koh ū-hūn tī I ê thóng-tī. Ūi-tio̍h thoân Siōng-tè ê sìn-sit kap Iâ-so͘ ê kiàn-chèng, góa bat tòa tī chi̍t ê miâ kiò-chòe Poa̍t-mô͘ ê hái-tó.

¹⁰ Ū chi̍t ê Chú-ji̍t, góa siū Sèng Sîn kám-tōng, thiaⁿ-kìⁿ tī góa ê āu-bīn ū tōa ê siaⁿ chhin-chhiūⁿ lat-pah teh hiáng,

¹¹ kóng, “Lí tio̍h chiong só͘ khòaⁿ--kìⁿ-ê siá chòe chheh, kià hō͘ Í-hut-só͘, Sū-múi-ná, Pia̍t-ka-mô͘, Chhui-ngá-chhui-lat, Sat-te̍k, Hui-la-thiat-hui, kap Ló-tí-ka chit chhit ê kàu-hōe.”

¹² Góa oa̍t-tńg-sin beh khòaⁿ tùi góa kóng-ōe--ê sī sím-mi̍h-lâng, chi̍t-ē oa̍t-tńg-sin, ū khòaⁿ-tio̍h chhit ki kim teng-tâi.

¹³ Teng-tâi ê tiong-ng ū chi̍t ūi chhin-chhiūⁿ Jîn-chú, chhēng chi̍t niá sûi-lo̍h kàu kha ê tn̂g-phàu, heng-khám hâ kim-tòa.

¹⁴ I ê thâu kap thâu-mn̂g chhin-chhiūⁿ iûⁿ-mn̂g hiah-ni̍h pe̍h, chhin-chhiūⁿ seh hiah-ni̍h pe̍h; I ê ba̍k-chiu chhin-chhiūⁿ hé-iām.

¹⁵ I ê kha chhin-chhiūⁿ kè hé-lô͘ thoàn-liān kng-liāng ê tâng; I ê siaⁿ chhin-chhiūⁿ tōa-chúi teh chhiâng ê siaⁿ.

¹⁶ I ê chiàⁿ-chhiú the̍h chhit lia̍p chhiⁿ; I ê chhùi thò͘-chhut siang-bīn-lāi ê kiàm; I ê bīn chhin-chhiūⁿ iām-jia̍t ê ji̍t-thâu hoat-kng.

¹⁷ Góa chi̍t-ē khòaⁿ-tio̍h I, chiū phak tī I kha-chêng chhin-chhiūⁿ sí--khì ê lâng. I ēng chiàⁿ-chhiú hōaⁿ góa, kóng, “M̄-bián kiaⁿ! Góa sī khí-thâu--ê, mā-sī soah-bé--ê.

¹⁸ Góa sī oa̍h--ê. Góa ū sí, hiān-chāi teh oa̍h, ōe éng-éng-oán-oán oa̍h--teh. Góa ū sí-bông kap Im-hú ê só-sî.

¹⁹ Só͘-í, lí tio̍h chiong só͘ khòaⁿ--kìⁿ-ê, í-ki̍p hiān-chāi só͘ teh hoat-seng, kap í-āu ōe hoat-seng ê tāi-chì lóng siá--khí-lâi.

²⁰ Lí só͘ khòaⁿ--tio̍h góa chiàⁿ-chhiú the̍h hit chhit lia̍p chhiⁿ kap chhit ki kim teng-tâi ê ò-biāu sī án-ni: Chhit lia̍p chhiⁿ sī chhit ê kàu-hōe ê thiⁿ-sài; chhit ki teng-tâi sī chhit ê kàu-hōe.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan