Bìoball air-loidhne

Í-su-thiap-kì 9 - 現代台語譯本羅馬字版

Iû-thài-lâng Siau-bia̍t Tùi-te̍k

¹ Cha̍p-jī--ge̍h, chiū-sī A-ta̍t-ge̍h cha̍p-saⁿ ji̍t, ông ê bēng-lēng kap chiàu-su teh-beh chip-hêng, chit-ê ji̍t goân-lâi sī Iû-thài-lâng ê tùi-te̍k ǹg-bāng beh ap-chè in ê ji̍t, m̄-kú Iû-thài-lâng tian-tò chè-ho̍k só͘-ū oàn-hūn in ê lâng.

² Hit-ji̍t, tī A-hap-sûi-ló͘-ông ê ta̍k-séng, Iû-thài-lâng tī in ê siâⁿ chū-chi̍p, kong-kek hiah-ê beh hāi in ê lâng; bô lâng ōe-tàng tí-khòng, in-ūi jîn-bîn lóng kiaⁿ in.

³ Ta̍k-séng ê léng-siù — chóng-tok, séng-tiúⁿ, kap hêng-chèng koaⁿ-oân — lóng lâi pang-chān Iû-thài-lâng, in-ūi in kiaⁿ Boa̍t-tí-kái.

⁴ Boa̍t-tí-kái tī tiâu-têng chin siū chun-tiōng, miâ-siaⁿ thoân kàu ta̍k-séng; i ê koân-le̍k jú lâi jú tōa.

⁵ Iû-thài-lâng chiàu ka-kī ê ì-sù tùi-thāi oàn-hūn in ê lâng; ēng to thâi-sí in, kā in châu-bia̍t.

⁶ Tī Su-san-siâⁿ, Iû-thài-lâng thâi-sí gō͘-pah lâng;

⁷ koh thâi-sí Pa-san-tāi-tha, Ta̍t-hun, A-su-phà-tha,

⁸ Phò-la-tha, A-tāi-lī-ngá, A-lī-tāi-tha,

⁹ Phà-má-su-tha, A-lī-sài, A-lī-tāi, kap Óa-iâ-sat-tha;

¹⁰ chit cha̍p ê lâng lóng sī Hap-bí-tāi-tha ê sun, Iû-thài-lâng ê tùi-te̍k Hap-bān ê kiáⁿ; m̄-kú Iû-thài-lâng bô chhiúⁿ in ê châi-sán.

¹¹ Hit-ji̍t, lâng chiong Su-san-siâⁿ siū-thâi ê jîn-sò͘ tùi ông thêng-pò.

¹² Ông tùi ông-hō͘ Í-su-thiap kóng, “Iû-thài-lâng tī Su-san-siâⁿ thâi-sí tùi-te̍k gō͘-pah lâng, koh thâi-sí Hap-bān cha̍p ê kiáⁿ; tī kî-tha ta̍k-séng m̄ chai chòe-liáu án-chóaⁿ. Taⁿ lí ài sím-mi̍h, góa ōe hō͘ lí; lí kiû sím-mi̍h, góa mā beh hō͘ lí.”

¹³ Í-su-thiap chiū kóng, “Ông nā khòaⁿ-chòe hó, kiû lí ún-chún Su-san ê Iû-thài-lâng, bîn-á-chài mā chiàu kin-á-ji̍t ê chiàu-su lâi chòe, koh chiong Hap-bān cha̍p ê kiáⁿ ê si-thé tiàu tī chhâ-kè téng.”

¹⁴ Ông chiū bēng-lēng chiàu án-ni chip-hêng; hit-ê chiàu-su tī Su-san pan-pò͘, lâng chiū chiong Hap-bān cha̍p ê kiáⁿ tiàu--khí-lâi.

¹⁵ A-ta̍t-ge̍h cha̍p-sì ji̍t, Su-san ê Iû-thài-lâng koh chū-chi̍p, khí-lâi thâi-sí siâⁿ-lāi saⁿ-pah lâng; m̄-kú bô chhiúⁿ in ê châi-sán.

¹⁶ Tī ông ta̍k-séng kî-tha ê Iû-thài-lâng mā lóng chū-chi̍p, khí-lâi pó-hō͘ ka-kī ê sìⁿ-miā, thoat-lī tùi-te̍k, tit-tio̍h pêng-an. In lóng-chóng thâi-sí chhit-bān gō͘-chheng ê oàn-hūn in ê lâng, m̄-kú bô chhiúⁿ in ê châi-sán.

¹⁷ A-ta̍t-ge̍h cha̍p-saⁿ ji̍t chòe chit-ê sū; cha̍p-sì ji̍t hioh-khùn, tī chit-ji̍t pān-toh, hoaⁿ-hí khèng-chiok.

¹⁸ M̄-kú, Su-san ê Iû-thài-lâng tī cha̍p-saⁿ cha̍p-sì chit nn̄g ji̍t chū-chi̍p, pó-hō͘ ka-kī; cha̍p-gō͘ ji̍t hioh-khùn, tī chit-ji̍t pān-toh, hoaⁿ-hí khèng-chiok.

¹⁹ In-ūi án-ni, tòa tī bô siâⁿ-chhiûⁿ ê chng-siā ê Iû-thài-lâng, ēng A-ta̍t-ge̍h cha̍p-sì ji̍t chòe choeh-ji̍t pān-toh, hoaⁿ-hí khèng-chiok, koh hō͘-siōng sàng lé-mi̍h.

Phó͘-ní-ji̍t

²⁰ Boa̍t-tí-kái kì-lio̍k chiah-ê sū, koh siá-phoe hō͘ A-hap-sûi-ló͘-ông ta̍k-séng hn̄g-kūn só͘-ū ê Iû-thài-lâng,

²¹ hoan-hù in ta̍k-nî tio̍h siú A-ta̍t-ge̍h cha̍p-sì cha̍p-gō͘ nn̄g ji̍t chòe choeh-ji̍t.

²² Chit nn̄g ji̍t sī Iû-thài-lâng thoat-lī tùi-te̍k, tit-tio̍h pêng-an ê ji̍t; hit-ge̍h sī iu-būn pìⁿ-chòe hoaⁿ-hí, pi-ai pìⁿ-chòe khoài-lo̍k ê ge̍h; in tio̍h tī chit nn̄g-ji̍t pān-toh khèng-chiok, hō͘-siōng sàng lé-mi̍h, koh chín-chè sàn-chhiah-lâng.

²³ Iû-thài-lâng tah-èng beh chun-siú Boa̍t-tí-kái ê chí-sī, chiàu khai-sí ê sî só͘ chòe--ê, ta̍k-nî siú chit-ê choeh-ji̍t.

²⁴ Iû-thài-lâng ê tùi-te̍k, A-kah-cho̍k Hap-bí-tāi-tha ê kiáⁿ Hap-bān, siat kè-bô͘ beh siau-bia̍t Iû-thài-lâng, thiu phó͘-ní, chiū-sī thiu-chhiam, ūi-tio̍h beh sat-hāi, châu-bia̍t in;

²⁵ m̄-kú Í-su-thiap chiong chit-ê tāi-chì tùi ông pò-kò, ông chiū pan-pò͘ chiàu-su, hō͘ Hap-bān kè-bô͘ beh hāi Iû-thài-lâng ê pháiⁿ-tāi, pò-èng tī i ka-kī ê sin-chiūⁿ, koh i kap i hiah-ê kiáⁿ hō͘ lâng tiàu tī chhâ-kè téng.

²⁶ Tùi án-ni, Iû-thài-lâng chiàu phó͘-ní ê miâ kiò hiah-ê ji̍t chòe Phó͘-ní-ji̍t. In in-ūi Boa̍t-tí-kái chit-tiuⁿ phoe í-ki̍p in chhin-sin ê keng-le̍k,

²⁷ chiū ūi-tio̍h in, in ê hō͘-tāi, í-ki̍p só͘-ū kui-hòa kái-chong ê lâng, koat-tēng beh éng-oán tī ta̍k-nî chiàu kui-tēng, siú chit nn̄g ji̍t chòe choeh-kî;

²⁸ koh beh sè-sè-tāi-tāi, ke-ke-hō͘-hō͘, ta̍k-séng ta̍k-siâⁿ, siú Phó͘-ní-ji̍t, tī Iû-thài-lâng ê tiong-kan éng-kiú kì-liām.

²⁹ A-pí-hâi ê cha-bó͘-kiáⁿ ông-hō͘ Í-su-thiap kap Iû-thài-lâng Boa̍t-tí-kái, choân-koân siá tē-jī tiuⁿ phoe khak-tēng Phó͘-ní-ji̍t.

³⁰ In ēng hô-pêng, sêng-si̍t ê ōe, siá chit-tiuⁿ phoe hō͘ A-hap-sûi-ló͘-ông kok-lāi chi̍t-pah jī-cha̍p-chhit séng ê Iû-thài-lâng,

³¹ chiàu Iû-thài-lâng Boa̍t-tí-kái kap ông-hō͘ Í-su-thiap ê chí-sī, siat-li̍p Phó͘-ní-ji̍t; chhin-chhiūⁿ Iû-thài-lâng ūi ka-kī kap in ê hō͘-tāi kui-tēng kìm-chia̍h ai-khàu ê ji̍t siâng-khoán.

³² Í-su-thiap bēng-lēng tio̍h siú Phó͘-ní-ji̍t ê sū, mā ū kì-lio̍k tī chheh-kǹg--ni̍h.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan