Bìoball air-loidhne

Í-su-thiap-kì 5 - 現代台語譯本羅馬字版

Í-su-thiap Pān-toh Chhiáⁿ Ông kap Hap-bān

¹ Tē-saⁿ ji̍t, Í-su-thiap chhēng ông-hō͘ ê lé-ho̍k, khiā tī ông-kiong ê lāi-tiâⁿ, bīn ǹg ông-kiong; hit-sî ông tī ông-kiong lāi chē tī i ê ông-ūi, bīn ǹg ông-kiong ê mn̂g.

² Ông khòaⁿ-tio̍h ông-hō͘ Í-su-thiap khiā tī tiâⁿ--ni̍h, chiū tùi Í-su-thiap si-un, chiong chhiú-tiong ê kim-koáiⁿ ǹg i chhun-chhut, i chiū chìn-chêng, bong kim-koáiⁿ ê thâu.

³ Ông tùi i kóng, “Ông-hō͘ Í-su-thiap, lí ū sím-mi̍h tāi-chì, beh kiû sím-mi̍h? Chiū-sī ông-kok ê chi̍t-pòaⁿ, góa mā ōe hō͘ lí.”

⁴ Í-su-thiap kóng, “Ông nā khòaⁿ-chòe hó, chhiáⁿ ông kap Hap-bān kin-á-ji̍t lâi hù góa ūi-tio̍h ông siat ê iàn-se̍k.”

⁵ Ông thiaⁿ Í-su-thiap ê ōe, tiàu Hap-bān kóaⁿ-kín lâi. Ông kap Hap-bān chiū khì hù Í-su-thiap ê iàn-se̍k.

⁶ Tī chiú-iàn ê tiong-kan, ông koh tùi Í-su-thiap kóng, “Lí ài sím-mi̍h, góa ōe hō͘ lí; lí beh kiû sím-mi̍h, chiū-sī ông-kok ê chi̍t-pòaⁿ, góa mā beh hō͘ lí.”

⁷ Í-su-thiap ìn kóng, “Góa ê chhéng-kiû sī án-ni:

⁸ Góa nā tit-tio̍h ông ê un-hūi, ông hoaⁿ-hí ún-chún góa ê chhéng-kiû, chiū chhiáⁿ ông kap Hap-bān bîn-á-ji̍t koh lâi hù góa ūi-tio̍h lín chún-pī ê iàn-se̍k; hit-sî góa chiah hôe-tap ông góa só͘ beh kiû--ê.”

Hap-bān Kè-bô͘ beh Hāi-sí Boa̍t-tí-kái

⁹ Hit-ji̍t, Hap-bān hoaⁿ-hí sóng-khoài, lī-khui iàn-hōe; m̄-kú khòaⁿ-tio̍h Boa̍t-tí-kái tī ông-kiong ê mn̂g-kháu bô khiā--khí-lâi, bô tùi i piáu-sī chi̍t-sut-á kèng-ì, chiū tùi Boa̍t-tí-kái hui-siông siū-khì.

¹⁰ Hap-bān ka-kī bián-kióng lún--teh, tò-khì i ê chhù. I phài lâng kiò i ê pêng-iú kap i ê bó͘ Sè-lī-su lâi,

¹¹ tùi in tián ka-kī ê êng-hôa-hù-kùi kap chin chōe kiáⁿ-jî, í-ki̍p ông ê thê-poa̍t, hō͘ i pí só͘-ū ê jîn-sîn kap léng-siù khah koân.

¹² Hap-bān koh kóng, “Ông-hō͘ Í-su-thiap kan-ta chhiáⁿ ông kap góa khì hù i ê iàn-se̍k; bîn-á-chài góa beh koh kap ông chòe-hé khì hō͘ i chhiáⁿ.

¹³ M̄-kú góa ta̍k-piàn khòaⁿ-tio̍h Iû-thài-lâng Boa̍t-tí-kái chē tī ông-kiong ê mn̂g-kháu, chiah-ê it-chhè chiū tùi góa lóng bô ì-gī.”

¹⁴ I ê bó͘ Sè-lī-su kap i ê pêng-iú kā i kóng, “Tio̍h chòe chi̍t ê jī-cha̍p-jī kong-chhioh koân ê chhâ-kè. Bîn-á-chá-khí, lí kiû ông chiong Boa̍t-tí-kái tiàu tī hit téng-bīn, jiân-āu chiū thang hoaⁿ-hoaⁿ-hí-hí kap ông chòe-hé khì hù iàn-se̍k.” Hap-bān khòaⁿ chit-ê ì-kiàn chin hó, chiū kiò lâng chòe chhâ-kè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan