Bìoball air-loidhne

Í-su-thiap-kì 4 - 現代台語譯本羅馬字版

Boa̍t-tí-kái Kiû Í-su-thiap Pang-chān

¹ Boa̍t-tí-kái chai chit-ê tāi-chì, chiū thiah-li̍h saⁿ, chhēng môa-saⁿ, sám hé-hu, kiâⁿ-ji̍p siâⁿ, pi-ai thî-khàu tōa-siaⁿ háu,

² kiâⁿ kàu ông-kiong mn̂g-kháu chiū thêng--teh, in-ūi só͘-ū chhēng môa-saⁿ ê lâng put-chún ji̍p ông-kiong.

³ Ông ê bēng-lēng kap chiàu-su sàng kàu ta̍k-séng ta̍k só͘-chāi, Iû-thài-lâng lóng kìm-chia̍h, thî-khàu, ai-kiò, hui-siông siong-sim; koh ū chin chōe lâng chhēng môa-saⁿ tó tī hé-hu.

⁴ Ông-hō͘ Í-su-thiap ê kiong-lú kap i ê thài-kàm lâi kā i pò-kò Boa̍t-tí-kái ê tāi-chì. I chin kan-khó͘-sim, chiū kià i-ho̍k hō͘ Boa̍t-tí-kái chhēng, ài i thǹg môa-saⁿ, m̄-kú Boa̍t-tí-kái m̄ chiap-siū.

⁵ Í-su-thiap chiū tiàu ông phài-lâi sū-hāu i ê thài-kàm Hap-tha-kek lâi, kah i khì Boa̍t-tí-kái hia, ài-beh chai i ná beh án-ni chòe.

⁶ Hap-tha-kek chiū chhut-khì kàu ông-kiong mn̂g-chêng ê kóng-tiûⁿ, khì kìⁿ Boa̍t-tí-kái.

⁷ Boa̍t-tí-kái chiū chiong só͘ hoat-seng ê sū, í-ki̍p Hap-bān ūi-tio̍h châu-bia̍t Iû-thài-lâng goān-ì koan-hiàn tī ông ê hú-khò͘ ê gûn khak-si̍t ê sò͘-bo̍k, lóng kā i kóng;

⁸ koh chiong kong-pò͘ tī Su-san-siâⁿ, beh châu-bia̍t Iû-thài-lâng chiàu-su ê chhau-pún, the̍h hō͘ i kau hō͘ Í-su-thiap, sòa kā Í-su-thiap soat-bêng, koh hoan-hù i ji̍p-khì kìⁿ ông, tī ông ê bīn-chêng ūi ka-kī ê tông-pau khún-chhiat kiû-chêng.

⁹ Hap-tha-kek tò--lâi, chiong Boa̍t-tí-kái ê ōe tùi Í-su-thiap pò-kò.

¹⁰ Í-su-thiap koh hoan-hù Hap-tha-kek tùi Boa̍t-tí-kái kóng,

¹¹ “Ông ê chèng jîn-sîn kap ta̍k-séng ê jîn-bîn, lóng chai chi̍t ê hoat-lēng, nā ū lâng bô siū ông tiàu-kiàn, ka-kī ji̍p kiong-lāi kìⁿ ông, bô-lūn lâm-lú, lóng tio̍h chhú-sí; tû-liáu ông ū tùi i chhun-chhut kim-koáiⁿ, i chiah bián-sí. Taⁿ góa í-keng ū saⁿ-cha̍p ji̍t kú bô siū ông tiàu-kiàn lah.”

¹² In chiū chiong Í-su-thiap ê ōe kā Boa̍t-tí-kái kóng.

¹³ Boa̍t-tí-kái hoan-hù lâng kā Í-su-thiap kóng, “Lí m̄-thang siūⁿ-kóng lí tī ông-kiong lāi pí kî-tha ê Iû-thài-lâng khah an-choân.

¹⁴ Tī chit-khoán sî-chūn lí nā tiām-tiām m̄ kóng-ōe, Iû-thài-lâng ōe tùi pa̍t-ūi tit-tio̍h oān-chō͘, tit-tio̍h kái-kiù; lí kap lí ê chhin-cho̍k it-tēng ōe bia̍t-bông. Lí ōe-tàng chòe ông-hō͘ kiám m̄-sī ūi-tio̍h kin-á-ji̍t chit-ê gûi-ki?”

¹⁵ Í-su-thiap chiū hoan-hù lâng hôe-ho̍k Boa̍t-tí-kái kóng,

¹⁶ “Lí khì, khì chio-chi̍p Su-san só͘-ū ê Iû-thài-lâng, ūi-tio̍h góa kìm-chia̍h saⁿ mî saⁿ ji̍t, bô chia̍h bô lim; góa kap góa ê kiong-lú mā beh án-ni kìm-chia̍h; jiân-āu góa beh ûi-pōe hoat-lēng ji̍p-khì kìⁿ ông; góa nā tio̍h sí, chiū sí.”

¹⁷ Boa̍t-tí-kái chiū chiàu Í-su-thiap ê hoan-hù khì chòe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan