Bìoball air-loidhne

Í-su-thiap-kì 2 - 現代台語譯本羅馬字版

Í-su-thiap Chòe Ông-hō͘

¹ Chiah-ê tāi-chì í-āu, A-hap-sûi-ló͘-ông ê siū-khì soah, chiū siūⁿ-khí Hoa-si̍t-tì kap i ê só͘-chòe, í-ki̍p ka-kī án-chóaⁿ pān i.

² Sū-hāu ông ê jîn-sîn chiū chham-siông, beh ūi-tio̍h ông chhē súi ê chāi-sek-lú.

³ In tùi ông kóng, “Chhiáⁿ ông phài koaⁿ-oân khì choân-kok ta̍k-séng, chhē só͘-ū súi ê chāi-sek-lú; tiàu-chi̍p in lâi Su-san-siâⁿ ê hō͘-kiong, kau hō͘ koán-lí lú-chú ê thài-kàm Hi-kai, koh kiong-kip in hòa-chong-phín.

⁴ Ông kah-ì ê lú-chú, thang kā i siat-li̍p chòe ông-hō͘, tāi-thòe Hoa-si̍t-tì.” Ông hoaⁿ-hí chit-ê kiàn-gī, chiū án-ni chòe.

⁵ Su-san-siâⁿ ū chi̍t ê Iû-thài-lâng Boa̍t-tí-kái, sī Piān-ngá-bín chi-cho̍k Ki-sū ê cheng-sun, Sī-múi ê sun, Gâi-ní ê kiáⁿ.

⁶ Í-chêng Pa-pí-lûn-ông Nî-pò͘-kah-nî-sat tùi Iâ-lō͘-sat-léng lia̍h Iû-tāi-ông Iok-ngá-kun kap jîn-bîn khì ê sî, Boa̍t-tí-kái mā tī hiah-ê liû-hòng ê lâng tiong-kan.

⁷ Boa̍t-tí-kái ū chi̍t ê chek-peh sió-bē Í-su-thiap, Hi-pek-lâi miâ Hap-tāi-sa, pē-bú í-keng kè-sin; Boa̍t-tí-kái siu i chòe ka-kī ê cha-bó͘-kiáⁿ, kā i ióng-io̍k. Í-su-thiap ê bīn-māu súi, sin-châi hó-khòaⁿ.

⁸ Ông ê bēng-lēng kap hoat-lēng í-keng soan-pò͘, chiū ū chin chōe lú-chú sàng-lâi Su-san-siâⁿ, kau hō͘ koán-lí lú-chú ê Hi-kai. Hit-sî Í-su-thiap mā siū sàng-ji̍p hō͘-kiong, kau hō͘ Hi-kai.

⁹ Hi-kai chin kah-ì Í-su-thiap, hó khoán-thāi i, kóaⁿ-kín chiong hòa-chong-phín kap eng-kai tit ê chia̍h-mi̍h hō͘ i; koh tùi ông-kiong soán chhit ê kiong-lú kā i sū-hāu; chiong i kap hiah-ê kiong-lú sóa-khì hō͘-kiong siōng-hó ê pâng-keng.

¹⁰ Í-su-thiap thiaⁿ Boa̍t-tí-kái ê hoan-hù, m̄-bat kā lâng kóng i ê sin-sè kap chong-cho̍k.

¹¹ Boa̍t-tí-kái ta̍k-ji̍t tī hō͘-kiong ê thâu-chêng kiâⁿ-lâi-kiâⁿ-khì, ài chai Í-su-thiap ū pêng-an á bô, í-ki̍p i án-chóaⁿ teh seng-oa̍h.

¹² Chiàu kui-tēng, chèng lú-chú beh kìⁿ A-hap-sûi-ló͘-ông í-chêng, tio̍h ū chi̍t nî ê chún-pī, chiū-sī la̍k ge̍h-ji̍t ēng bu̍t-io̍h ê iû, la̍k ge̍h-ji̍t ēng phang-chúi kap hòa-chong-phín bí-iông, chiah chiàu chhù-sū chi̍t-ê chi̍t-ê ji̍p-khì kìⁿ ông.

¹³ Lú-chú tùi hō͘-kiong ji̍p-khì ông-kiong kìⁿ ông ê sî, i ài sím-mi̍h lóng ōe hō͘ i tòa--khì;

¹⁴ ē-hng-sî ji̍p--khì, keh-chá-khí chiū hō͘ lâng chhōa-khì lēng-gōa chi̍t ê hō͘-kiong, kau hō͘ koán-lí pîn-hui ê thài-kàm Sa-kah; nā m̄-sī ông kah-ì, koh thê-khí i ê miâ tiàu i, chiū bōe-tàng koh ji̍p-khì kìⁿ ông.

¹⁵ Lûn kàu Í-su-thiap tio̍h ji̍p-khì kìⁿ ông ê sî, koán-lí lú-chú ê thài-kàm Hi-kai kau hō͘ i ê mi̍h-kiāⁿ í-gōa, i lóng bô thó pa̍t-hāng. Só͘-ū khòaⁿ-tio̍h Í-su-thiap ê lâng lóng chin o-ló i; i sī Boa̍t-tí-kái ê a-chek A-pí-hâi ê cha-bó͘-kiáⁿ, hō͘ Boa̍t-tí-kái siu-chòe cha-bó͘-kiáⁿ.

¹⁶ A-hap-sûi-ló͘-ông tē-chhit nî cha̍p--ge̍h, chiū-sī Thê-pia̍t-ge̍h, Í-su-thiap hō͘ lâng chhōa ji̍p-khì ông-kiong kìⁿ ông.

¹⁷ Ông ài Í-su-thiap chhiau-kè kî-tha ê lú-chú; i pí kî-tha ê chāi-sek-lú koh-khah tit-tio̍h ông ê thiàⁿ-sioh kap un-hūi. Só͘-í, ông ēng hō͘-koan tì tī i ê thâu-khak, siat-li̍p i chòe ông-hō͘ tāi-thòe Hoa-si̍t-tì.

¹⁸ Ông ēng Í-su-thiap ê miâ pān tōa iàn-se̍k iau-chhiáⁿ bûn-bú-pah-koaⁿ, soan-pò͘ choân-kok hiu-ká, koh khóng-khài sàng lé-mi̍h.

Boa̍t-tí-kái Kiù Ông ê Sìⁿ-miā

¹⁹ Hiah-ê chāi-sek-lú tē-jī piàn chū-chi̍p ê sî, Boa̍t-tí-kái chē tī ông-kiong ê mn̂g.

²⁰ Í-su-thiap chiàu Boa̍t-tí-kái ê hoan-hù, m̄-bat kā lâng kóng i ê sin-sè kap chong-cho̍k. Í-su-thiap lóng ū thiaⁿ Boa̍t-tí-kái ê ōe, kap í-chêng siū i ióng-io̍k ê sî siâng-khoán.

²¹ Ū chi̍t ji̍t, Boa̍t-tí-kái chē tī ông-kiong ê mn̂g chip-hêng chit-bū ê sî, ū nn̄g ê kò͘-mn̂g ê thài-kàm, Phek-thàm kap Thê-lia̍t, oàn-hūn koh kè-bô͘ beh hāi A-hap-sûi-ló͘-ông.

²² Boa̍t-tí-kái chai chit-ê tāi-chì, chiū kā ông-hō͘ Í-su-thiap kóng; Í-su-thiap chiū ēng Boa̍t-tí-kái ê miâ chiong chit-ê sū tùi ông pò-kò.

²³ Keng-kè tiâu-cha, chèng-si̍t ū chit-ê sū, hit nn̄g ê lâng chiū hō͘ lâng tiàu-sí tī chhâ-kè téng. Chit-ê sū ū tī ông ê bīn-chêng kì-ji̍p tāi-sū-lio̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan