Bìoball air-loidhne

Í-sài-a-su 3 - 現代台語譯本羅馬字版

Iâ-lō͘-sat-léng ê Hūn-loān

¹ Khòaⁿ leh, Siōng Chú — Bān-kun ê Thóng-sòe beh tùi Iâ-lō͘-sat-léng kap Iû-tāi tû-khì in só͘ óa-khò, só͘ i-óa--ê, chiū-sī só͘ óa-khò ê bí-niû, só͘ i-óa ê chúi;

² tû-khì ióng-sū kap chiàn-sū, sím-phòaⁿ-koaⁿ kap sian-ti, pok-kòa--ê kap tiúⁿ-ló,

³ tû-khì koán gō͘-cha̍p ê peng ê kun-koaⁿ kap ū tōe-ūi ê jîn-sū, chham-bô͘, gâu ê sai-hū, kiâⁿ hoat-su̍t--ê.

⁴ Góa beh hō͘ gín-á chòe in ê léng-siù, hō͘ eⁿ-á chòe in ê thóng-tī-chiá;

⁵ jîn-bîn ōe hō͘-siōng ap-pek: Lâng kong-kek lâng, chhù-piⁿ kong-kek chhù-piⁿ, siàu-liân-lâng tùi lāu-lâng bô-lé, pi-chiān--ê bú-jio̍k chun-kùi--ê.

⁶ Lâng ōe tī chhin-cho̍k ê tiong-kan khiú i ê hiaⁿ-tī, kóng, “Lí ū gōa-phàu, lí tio̍h chòe goán ê léng-tō-chiá, lâi chhú-lí chit-ê hūn-loān ê kéng-hóng.”

⁷ Hit-sî, i ōe tōa-siaⁿ ìn kóng, “Góa bōe-tàng kā lín i-tī; góa chhù--ni̍h bô chia̍h-mi̍h, mā bô gōa-phàu. Lín m̄-thang kiò góa khì chòe jîn-bîn ê léng-siù!”

⁸ Ah, Iâ-lō͘-sat-léng í-keng soe-pāi, Iû-tāi í-keng tó-hoāi; in-ūi in ê giân-hêng-kú-chí lóng te̍k-tùi Siōng Chú, hoán-khòng I ui-giâm ê lîm-chāi.

⁹ In ê bīn-chhiuⁿ hián-lō͘ in bô chèng-ti̍t; in chhin-chhiūⁿ Só͘-to-má tián ka-kī ê chōe, lóng bô am-khàm. In siū chai-hō, chōe-kai-èng-tit!

¹⁰ Tio̍h kā chèng-ti̍t ê lâng kóng, in ōe bān-sū heng-thong, in-ūi in ōe hióng-siū ka-kī hêng-ûi ê ké-chí.

¹¹ Siâ-ok ê lâng chhám ah! In ōe tú-tio̍h chai-lān. In ê chhiú án-chóaⁿ tùi-hù lâng, mā ōe án-ni siū pò-èng.

¹² Góa ê chú-bîn ōe siū gín-á khi-ap, ōe hō͘ hū-jîn-lâng koán-hat. Góa ê chú-bîn ah, lín ê chí-tō-chiá chhōa lín kiâⁿ bê-lō͘, hō͘ lín kiâⁿ ê hong-hiòng chhò-loān.

Siōng Chú Si-hêng Sím-phòaⁿ

¹³ Siōng Chú chiūⁿ-têng khòng-kò; I khiā khí-lâi beh sím-phòaⁿ I ê chú-bîn.

¹⁴ Siōng Chú tùi I ê chú-bîn ê tiúⁿ-ló kap koaⁿ-tiúⁿ thê-chhut kò-sò͘, “Lín thun-chia̍h phû-tô-hn̂g; lín ê chhù-lāi ū tùi sàn-chhiah-lâng chhiúⁿ--lâi ê châi-bu̍t.

¹⁵ Lín ná hiah hó-táⁿ ap-chè góa ê chú-bîn, géng-chhùi sàn-chhiah-lâng ê bīn?” Chì-koân Siōng Chú — Bān-kun ê Thóng-sòe án-ni kóng.

Kéng-kò Iâ-lō͘-sat-léng ê Lú-chú

¹⁶ Siōng Chú kóng, “In-ūi Sek-an ê lú-chú hiah-ni̍h kiau-ngō͘, kiâⁿ-lō͘ ām-kún chhun-tn̂g-tn̂g, khòaⁿ lâng sái-ba̍k-bé, kek chu-sè liam-kha kiâⁿ, kha-khoân khin-khiang-kiò,

¹⁷ só͘-í, Siōng Chú beh hō͘ Sek-an ê lú-chú chhàu-thâu siⁿ-chhng, beh hō͘ in hā-thé lō͘-hiān.”

¹⁸ Tī hit-ji̍t, Siōng Chú beh tû-khì in it-chhè súi ê chong-sek-phín: Kha-khoân, thâu-mn̂g-bāng, ge̍h-bâi-chiam,

¹⁹ hī-kau, chhiú-khoân, bīn-phè,

²⁰ thâu-kun, kha-liān-á, hoe-tòa, hiuⁿ-a̍h, pêng-an-hû,

²¹ chhiú-chí, phīⁿ-khoân,

²² lé-ho̍k, gōa-thò, phoa̍h-kun, phê-pau-á,

²³ chhiú-kiàⁿ, iù-môa-pò͘ ê lāi-saⁿ, lé-bō, í-ki̍p moa seng-khu ê kun.

²⁴ Phang-bī ōe pìⁿ-chòe chhàu-bī, chho͘ ê soh tāi-thòe io-tòa, súi thâu-mn̂g ōe pìⁿ-chòe kng-thâu, hâ môa-pò͘ tāi-thòe chhēng ko-kip saⁿ, bí-māu ōe ū sio--tio̍h ê siong-jiah.

²⁵ Sek-an ê ta-po͘-lâng ōe sí tī to-ē, i ê chiàn-sū ōe tī chiàn-cheng tiong sí-bông;

²⁶ i ê siâⁿ-mn̂g ōe pi-siong ai-khàu; Sek-an ōe hō͘ lâng pak-kng-kng chē tī thô͘-kha.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan