Bìoball air-loidhne

Í-hut-só͘-su 4 - 現代台語譯本羅馬字版

Kàu-hōe ê Ha̍p-it

¹ Só͘-í, chòe chi̍t ê ūi-tio̍h Chú choh siû-hoān ê lâng, góa khó͘-khǹg lín. Kì-jiân lín siū Siōng-tè ho͘-tiàu, hêng-ûi tio̍h hû-ha̍p I ê ho͘-tiàu.

² Hoān-sū tio̍h khiam-pi, un-jiû, jím-nāi, ēng thiàⁿ hō͘-siōng khoan-iông,

³ ēng hô-pêng hō͘-siōng liân-hê, chīn-la̍t pó-chhî Sèng Sîn só͘ sù ê ha̍p-it.

⁴ Sin-thé chí-ū chi̍t ê; Sèng Sîn chí-ū chi̍t ūi; tú chhin-chhiūⁿ Siōng-tè tiàu lán beh tit--tio̍h ê ǹg-bāng sī chi̍t ê.

⁵ Chú chí-ū chi̍t ūi; sìn-gióng chí-ū chi̍t ê; sóe-lé chí-ū chi̍t ê;

⁶ Siōng-tè chí-ū chi̍t ūi, chiū-sī bān-iú ê Pē, I tī bān-iú ê téng-bīn, koàn-chhoàn bān-iú, koh tī bān-iú tiong.

⁷ Lán ta̍k-ê lâng lóng chiàu Ki-tok só͘ sù ê hūn-liōng niá-siū un-sù.

⁸ Chiàu Sèng-keng só͘ kóng: I seng-koân kàu siōng-koân ê ūi ê sî, tòa chi̍t tōa-tūi siū-lia̍h--ê kap I khì, sù un-sù hō͘ lâng.

⁹ “I seng-koân” chit-kù ōe sī sím-mi̍h ì-sù? Chiū-sī: I mā bat kàng-lo̍h kàu tōe-ē siōng-chhim ê só͘-chāi.

¹⁰ Án-ni, “kàng-lo̍h” Hit-ūi chiū-sī kap “seng-koân” kàu chèng-thiⁿ ê téng-bīn lâi chhiong-móa bān-iú Hit-ūi sī kâng chi̍t ūi.

¹¹ I só͘ sù--ê ū sù-tô͘, ū sian-ti, ū thoân-hok-im--ê, ū bo̍k-ióng--ê kap kàu-tō--ê.

¹² I án-ni chòe sī beh chong-pī Siōng-tè ê chú-bîn thang chòe sū-hōng ê kang-chok, lâi kiàn-li̍p Ki-tok ê thé;

¹³ chòe-āu lán lóng thang tùi Siōng-tè ê Kiáⁿ ū it-tì ê sìn-gióng kap jīm-sek lâi tióng-tāi-sêng-jîn, ta̍t-kàu Ki-tok oân-choân ê thêng-tō͘.

¹⁴ Án-ni, lán chiū bô koh choh gín-á, hō͘ khi-phiàn-chiá phian-chō--chhut-lâi só͘-ū chhò-gō͘ ê ha̍k-soat thoa teh kiâⁿ, phiau-lâi-phiau-khì.

¹⁵ Lán hoán-tńg tio̍h ēng thiàⁿ-sim kóng chin-si̍t, tī ta̍k hong-bīn ēng choh-thâu ê Ki-tok chòe bo̍k-phiau lâi sêng-tióng.

¹⁶ Tùi I, sin-thé ê ta̍k kun-chat hō͘-siōng liân-chiap, saⁿ chi-chhî, ta̍k-ê chi-thé hoat-hui eng-kai ū ê kong-lêng, hō͘ kui-ê sin-thé tióng-tōa, ēng thiàⁿ kiàn-li̍p--khí-lâi.

Tī Ki-tok Choh Sin Lâng

^17-18 Só͘-í, góa hōng Chú ê miâ khó͘-khǹg lín, m̄-thang kè-sio̍k chhin-chhiūⁿ Gōa-pang-lâng án-ni seng-oa̍h. In in-ūi bû-ti kap ngī-sim, sim-su o͘-àm, tì-kàu su-sióng khong-tōng, kap Siōng-tè só͘ sù ê oa̍h-miā keh-tn̄g.

¹⁹ In sit-khì liâm-thí ê sim, chīn-chêng hòng-chhiòng chòe ta̍k-khoán ù-òe ê tāi-chì.

²⁰ Lín pèng m̄-sī án-ni ha̍k-si̍p Ki-tok.

²¹ Lín eng-kai ū thiaⁿ-tio̍h I ê tāi-chì, ū tùi I ha̍k-si̍p, in-ūi tī Iâ-so͘ chiah ū chin-lí.

²² Án-ni, tio̍h thoat-lī í-chêng ê seng-oa̍h, thǹg-khì kū ê lâng, in-ūi kū ê lâng siū su-io̍k ê bê-he̍k teh pāi-hoāi.

²³ Lín ê sim-su ì-liām tio̍h oân-choân ōaⁿ-sin,

²⁴ chiū-sī tio̍h chhēng chiàu Siōng-tè ê hêng-siōng chhòng-chō ê sin lâng, ēng kun-kù chin-lí só͘ sán-seng ê kong-gī kap sèng-kiat piáu-hiān--chhut-lâi.

Sin ê Seng-oa̍h

²⁵ Só͘-í, lín tio̍h thoat-lī hu-ké, tio̍h tùi chhù-piⁿ kóng chin-si̍t-ōe, in-ūi lán lóng sī Ki-tok sin-thé ê chi̍t-pō͘-hūn.

²⁶ Lín nā siū-khì m̄-thang tì-kàu hoān-chōe. M̄-thang kàu ji̍t lo̍h iáu-teh siū-khì;

²⁷ m̄-thang hō͘ Mô͘-kúi ū khang-phāng thang lī-iōng.

²⁸ Bat chòe chha̍t--ê m̄-thang koh thau-the̍h; tio̍h khò siang-chhiú chhut-la̍t chòe kang tit-tio̍h chèng-tong ê siu-ji̍p, ū-la̍t thang pang-chān sàn-chhiah-lâng.

²⁹ Pháiⁿ-ōe lóng m̄-thang kóng; tian-tò tio̍h kóng chō-chiū lâng ê hó-ōe, hō͘ thiaⁿ--tio̍h ê lâng tit-tio̍h lī-ek.

³⁰ M̄-thang hō͘ Siōng-tè ê Sèng Sîn iu-siong; in-ūi Sèng Sîn sī lín sio̍k Siōng-tè ê ìn-kì, pó-chèng lín tī chín-kiù ê Ji̍t tit-tio̍h tháu-pàng.

³¹ Tio̍h khì-sak it-chhè ê ok-to̍k, pháiⁿ sèng-tē, siū-khì, soan-jióng, húi-pòng, í-ki̍p it-chhè ê pháiⁿ.

³² Tio̍h chhin-chhiat jîn-chû saⁿ khoán-thāi, hō͘-siōng sià-bián, tú kap Siōng-tè ū thong-kè Ki-tok sià-bián lín kâng-khoán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan