Bìoball air-loidhne

Í-hut-só͘-su 3 - 現代台語譯本羅馬字版

Pó-lô tùi Gōa-pang-lâng Thoân Hok-im

¹ In-ūi án-ni, góa Pó-lô, ūi-tio̍h lín Gōa-pang-lâng choh Ki-tok Iâ-so͘ ê siû-hoān, thòe lín tùi Siōng-tè kî-kiû.

² Lín it-tēng ū thiaⁿ--tio̍h, ūi-tio̍h lín, Siōng-tè tùi I ê un-tián ū úi-thok góa chit-ê chit-bū.

³ Siōng-tè ū chiong I ê ò-pì khé-sī hō͘ góa chai. Góa í-keng ū kán-lio̍k siá chit-ê tāi-chì,

⁴ lín tha̍k liáu chiū ōe bêng-pe̍k góa tùi Ki-tok ò-pì ê liáu-kái;

⁵ chit-ê ò-pì, tī kè-khì ê sè-tāi bô hō͘ lâng chai, hiān-chāi Siōng-tè thong-kè Sèng Sîn í-keng ū tùi I ê sèng sù-tô͘ kap sian-ti khé-sī.

⁶ Chit-ê ò-pì sī án-ni: Gōa-pang-lâng thong-kè hok-im thang kap Iû-thài-lâng pîⁿ-pîⁿ choh kè-sêng-jîn, pîⁿ-pîⁿ sio̍k chi̍t ê sin-thé, kap Ki-tok Iâ-so͘ kiat-liân pîⁿ-pîⁿ sêng-siū Siōng-tè ê èng-ún.

⁷ Tùi Siōng-tè te̍k-pia̍t ê un-sù, thong-kè I tōa lêng-le̍k ê ūn-hêng, góa chiâⁿ-chòe hok-im ê chhe-ēng.

⁸ Góa tī Siōng-tè só͘-ū ê chú-bîn tiong sī tē-it bî-sòe--ê, I kèng-jiân sù góa un-tián thang chiong Ki-tok sǹg bōe liáu hong-hù ê hok-im thoân hō͘ Gōa-pang-lâng,

⁹ thang hō͘ só͘-ū ê lâng bêng-pe̍k Siōng-tè án-chóaⁿ si̍t-hiān I ê ò-pì. Chhòng-chō bān-iú ê Siōng-tè tī kè-khì ê sè-tāi ū chiong chit-ê ò-pì ún-ba̍t--khí-lâi,

¹⁰ sī beh tī hiān-kim ê sè-tāi, thong-kè kàu-hōe, hō͘ thian-kài ê thóng-léng-chiá, koân-le̍k-chiá, lóng thang jīn-bat Siōng-tè ta̍k-khoán ê tì-hūi.

¹¹ Siōng-tè án-ni chòe sī kun-kù I éng-oán ê chí-ì; chit-ê chí-ì í-keng thong-kè lán ê Chú Ki-tok Iâ-so͘ si̍t-hiān lah.

¹² Kap Ki-tok kiat-liân, thong-kè tùi I ê sìn, lán thang chhiong-móa sìn-sim hó-táⁿ chiū-kūn Siōng-tè.

¹³ Só͘-í, chhiáⁿ lín m̄-bián in-ūi góa ūi-tio̍h lín siū-khó͘ lâi sim kan-khó͘; kî-si̍t che sī lín ê kong-êng.

Ki-tok ê Thiàⁿ

^14-15 In-ūi án-ni, góa kūi-lo̍h, ǹg sù miâ-hō hō͘ thiⁿ-téng tōe-chiūⁿ só͘-ū chong-cho̍k ê Thiⁿ Pē

¹⁶ kî-kiû, chiàu I hong-hù ê êng-iāu, thong-kè I ê Sèng Sîn só͘ sù ê khùi-la̍t, hō͘ lín lōe-chāi ê lâng ióng-chòng--khí-lâi.

¹⁷ Góa mā kî-kiû Ki-tok ōe in-ūi lín ê sìn lâi tiàm tī lín sim-lāi, hō͘ lín tèng-kun hē tōe-ki tī thiàⁿ,

^18-19 ōe-tàng kap Siōng-tè só͘-ū ê chú-bîn bêng-pe̍k Ki-tok ê thiàⁿ sī jōa-á-ni̍h tn̂g, khoah, koân, chhim, koh keng-giām hit-ê chhiau-kè lâng ê tì-sek só͘ ōe-tàng liáu-kái ê thiàⁿ, hō͘ Siōng-tè ê oân-siān kā lín oân-choân chhiong-móa.

²⁰ Siōng-tè ōe-tàng ēng I tī lán tiong-kan teh ūn-hêng ê tōa lêng-le̍k, tōa-tōa chhiau-kè lán só͘ kiû só͘ siūⁿ--ê, lâi sêng-chiū it-chhè.

²¹ Goān êng-iāu tī kàu-hōe tiong, thong-kè Ki-tok Iâ-so͘ kui hō͘ Siōng-tè, kàu sè-sè-tāi-tāi, bû-kiông bû-chīn. Amen!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan