Bìoball air-loidhne

Í-hut-só͘-su 2 - 現代台語譯本羅馬字版

Chhut-sí-ji̍p-oa̍h

¹ Í-chêng in-ūi lín hoān-chōe pōe-ge̍k Siōng-tè, lêng-sèng í-keng sí.

² Hit-sî, lín thàn sè-kan ê tiâu-liû, sūn-ho̍k khong-tiong ê chiáng-koân-chiá, chiū-sī hiān-chāi teh koán-hat pōe-ge̍k Siōng-tè ê lâng hit-ê siâ-sîn.

³ Kî-si̍t, goán í-chêng mā lóng kap chiah-ê lâng kâng-khoán thàn pún-sèng ê io̍k-bōng seng-oa̍h, chiàu ka-kī jio̍k-thé ê su-io̍k kap ì-liām teh hêng-tōng. Goán kap kî-tha ê lâng kâng-khoán, chù-tiāⁿ siū Siōng-tè hêng-hoa̍t.

⁴ M̄-kú Siōng-tè ū hong-sēng ê lîn-bín, ēng ke̍k-tōa ê chû-ài thiàⁿ lán,

⁵ tī lán iáu-teh pōe-ge̍k, lêng-sèng í-keng sí ê sî, I hō͘ lán kap Ki-tok chòe-hé koh-oa̍h; lín sī tùi Siōng-tè ê un-tián tit-tio̍h kiù--ê.

⁶ Thong-kè lán kap Ki-tok Iâ-so͘ kiat-ha̍p, Siōng-tè hō͘ lán kap I chòe-hé koh-oa̍h, tī thiⁿ-téng chòe-hé chiáng-koân.

⁷ I án-ni chòe sī beh thong-kè Ki-tok Iâ-so͘ tùi lán hián-sī chû-ài, thang tùi āu sè-tāi piáu-bêng I bû-hān hong-hù ê un-tián.

⁸ In-ūi lín sī khò Siōng-tè ê un-tián tùi sìn tit-tio̍h kiù; m̄-sī khò lín ka-kī, sī khò Siōng-tè ê un-sù.

⁹ Kì-jiân m̄-sī khò hêng-ûi, sím-mi̍h-lâng to bōe-tàng khoa-kháu.

¹⁰ In-ūi lán sī Siōng-tè chhòng-chō--ê; I thong-kè Ki-tok Iâ-so͘ chhòng-chō lán, hō͘ lán thang chòe I chá chiū chún-pī ài lán chòe ê hó-sū.

Tī Ki-tok Chiâⁿ-chòe Chi̍t-thé

¹¹ Só͘-í, lín chiah-ê chhut-sì chòe Gōa-pang-lâng--ê, tio̍h ōe-kì-tit lín kè-khì ū hō͘ chū-chheng siū kat-lé--ê, chiū-sī ēng chhiú tī seng-khu kiâⁿ kat-lé ê Iû-thài-lâng, kiò-chòe bô siū kat-lé ê lâng.

¹² Lín hit-sî kap Ki-tok bô koan-hē, bô sio̍k Siōng-tè ê soán-bîn, bô hūn tī Siōng-tè èng-ún ê bêng-iok, tī chit sè-kan bô ǹg-bāng, bô Siōng-tè.

¹³ M̄-kú lín chiah-ê í-chêng lī-khui Siōng-tè hn̄g-hn̄g ê Gōa-pang-lâng, hiān-chāi khò Ki-tok Iâ-so͘, thong-kè I ê sí, í-keng kap Siōng-tè chhin-kūn.

¹⁴ Ki-tok chhiok-chìn lán ê hô-pêng; I ū hō͘ Iû-thài-lâng kap Gōa-pang-lâng chiâⁿ-chòe chi̍t ê. I ēng ka-kī ê seng-khu thiah-húi kā in keh-khui ê chhiûⁿ, siau-tû in tiong-kan ê te̍k-tùi.

¹⁵ I hòe-tû Iû-thài Lu̍t-hoat ê kài-bēng kap kui-lē, hō͘ nn̄g pêng thong-kè I thang chhòng-chō chi̍t ê sin ê lâng lâi chhiok-chìn hô-pêng.

¹⁶ Ki-tok thong-kè si̍p-jī-kè siau-bia̍t pí-chhú ê te̍k-tùi, hō͘ nn̄g pêng chiâⁿ-chòe chi̍t-thé, thang kap Siōng-tè hô-hó.

¹⁷ Án-ni, Ki-tok lâi sī beh thoân hô-pêng ê hok-im hō͘ só͘-ū ê lâng, pau-koat lín chiah-ê í-chêng lī-khui Siōng-tè hn̄g-hn̄g ê Gōa-pang-lâng kap chhin-kūn Siōng-tè ê Iû-thài-lâng.

¹⁸ Thong-kè Ki-tok, lán nn̄g pêng ê lâng lóng ōe-tàng tùi kâng chi̍t ūi Sèng Sîn lâi chhin-kūn Pē.

¹⁹ Só͘-í, lín Gōa-pang-lâng í-keng m̄-sī chhut-gōa-lâng, m̄-sī kiâu-bîn, sī kap Siōng-tè ê chú-bîn pîⁿ-pîⁿ choh kok-bîn, choh Siōng-tè ke-lāi ê lâng,

²⁰ kiàn-li̍p tī sian-ti kap sù-tô͘ só͘ hē ê tōe-ki téng, ēng Ki-tok Iâ-so͘ pún-sin chòe siōng tiōng-iàu ê ki-chio̍h,

²¹ kui-ê kiàn-tio̍k-bu̍t khò I lâi liân-chiap kiat-ha̍p, chiām-chiām khok-tōa chiâⁿ-chòe sèng ê tiān kui-sio̍k Chú.

²² Lín kap I kiat-liân, khò Sèng Sîn ê pang-chān, mā chòe-hé siū khí-chō chòe Siōng-tè khiā-khí ê só͘-chāi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan