Iok-pek-kì 8 - 現代台語譯本羅馬字版

¹ Su-a-lâng Pí-le̍k-ta̍t ìn kóng:

² Chit-khoán tāi-chì lí beh kóng jōa kú? Lí só͘ kóng ê ōe chhin-chhiūⁿ kông-hong!

³ Siōng-tè kiám ōe oai-khiok chèng-ti̍t? Choân-lêng-chiá kiám ōe oai-khiok kong-gī?

⁴ Lí ê kiáⁿ-jî ū tek-chōe I, I chiah chiàu in ê chōe-kò hō͘ in siū èng-tit ê pò-èng.

⁵ Lí nā chhē-kiû Siōng-tè, tùi Choân-lêng-chiá kiû-un,

⁶ lí nā sûn-kiat chèng-ti̍t, I ōe khí-lâi pang-chān lí, kā lí koh-chài khí-chō pêng-an khiā-khí ê só͘-chāi.

⁷ Lí khí-thâu sui-jiân bî-sòe, kàu-bé ōe chin hoat-ta̍t.

⁸ Lí khì mn̄g chêng sè-tāi ê lâng, khòaⁿ in ū tùi lia̍t-chó͘ o̍h-tio̍h sím-mi̍h.

⁹ Lán chā-hng chiah chhut-sì, m̄ chai pòaⁿ-hāng; lán tī sè-kan ê ji̍t-chí put-kò chhin-chhiūⁿ iáⁿ;

¹⁰ in kà-sī lí, kā lí kóng, kóng-chhut in sim-lāi ê ōe.

¹¹ Bô thô͘-bê, pô͘-chháu kiám ōe seng-tióng? Bô chúi, lô͘-úi kiám ōe tōa-châng?

¹² In iáu chíⁿ, iáu-bē koah--khí-lâi, chiū pí kî-tha ê chháu khah chá ta--khì.

¹³ Só͘-ū bōe-kì-tit Siōng-tè ê lâng ê kiat-kio̍k mā-sī án-ni; bô kèng-ùi Siōng-tè ê lâng ê ǹg-bāng ōe bô--khì.

¹⁴ In só͘ i-óa--ê sī chin khoài tn̄g ê si, só͘ óa-khò--ê sī ti-tu-bāng.

¹⁵ In óa-khò ti-tu-bāng, m̄-kú khò put chū, khîⁿ-tiâu bāng, m̄-kú tòng bōe tiâu.

¹⁶ In chhin-chhiūⁿ si̍t-bu̍t ū ji̍t chiò chiū chhiⁿ-chhùi, tîn soan kah móa-hn̂g.

¹⁷ In ê kun khûn tī chio̍h-thâu-tui, chǹg-ji̍p chio̍h-thâu phāng.

¹⁸ In nā hō͘ lâng khau--khí-lâi, ōe hō͘ i ka-kī ê só͘-chāi hó͘-jīn, kóng: Góa m̄ bat lín.

¹⁹ In it-tēng ōe tī lō͘-piⁿ nōa--khì, āu-lâi ū sin ê íⁿ tùi tōe--ni̍h koh puh--chhut-lâi.

²⁰ Khòaⁿ leh, Siōng-tè it-tēng bōe pàng-sak sûn-choân ê lâng, mā bōe pang-chān chòe pháiⁿ ê lâng.

²¹ I ōe hō͘ lí koh-chài chhiò-gī-gī, hō͘ lí ê chhùi chhut hoaⁿ-hí ê siaⁿ.

²² Oàn-hūn lí ê lâng ōe ēng kiàn-siàu chòe saⁿ chhēng; pháiⁿ-lâng ê pò͘-pîⁿ ōe bô--khì.

The Bible Society in Taiwan

Lean sinn:

Ceanglaichean taic

Sanasan