Bìoball air-loidhne

Iok-pek-kì 7 - 現代台語譯本羅馬字版

¹ Lâng tī sè-kan kiám m̄-sī it-tēng ū lô-khó͘? I ê ji̍t-chí kiám m̄-sī chhin-chhiūⁿ hō͘ lâng chhiàⁿ ê kang-lâng?

² Chhin-chhiūⁿ lô͘-po̍k teh pek-chhiat kî-thāi ji̍t lo̍h, chhin-chhiūⁿ chòe-kang-lâng tán beh niá kang-chîⁿ?

³ Góa mā chù-tiāⁿ tio̍h kè khang-hu ê sòe-goa̍t, tio̍h keng-kè iu-khó͘ ê àm-mî.

⁴ Góa beh khùn ê sî siūⁿ-kóng: Mî hiah tn̂g, sím-mi̍h sî chiah thang khí-chhn̂g? Góa hoan-lâi-hoan-khì kàu thiⁿ-kng.

⁵ Góa kui seng-khu siⁿ-thâng, kian-phí, lok-lâng; phê phòa, lâu lâng.

⁶ Góa ê ji̍t-chí teh kè pí chit-pò͘ ê so khah kín; ji̍t-chí kè-liáu lóng bô ǹg-bāng.

⁷ Siōng-tè ah, kiû lí kì-tit góa ê sìⁿ-miā ná chhoán chi̍t ê khùi; góa bōe-tàng koh kìⁿ-tio̍h hó ji̍t-chí.

⁸ Hiān-chāi lí ū khòaⁿ-tio̍h góa, m̄-kú bōe-tàng koh khòaⁿ--kìⁿ; lí beh chhē góa, góa í-keng bô chûn-chāi.

⁹ Hûn siau-sòaⁿ chiū bô--khì, án-ni, lâng lo̍h Im-kan mā bōe koh khí--lâi.

¹⁰ I bōe koh tò-lâi ka-kī ê chhù; i pún só͘-chāi ê lâng mā bōe koh jīn-tit i.

¹¹ Só͘-í góa m̄ koh tiām-tiām; góa ê sim iu-khó͘, góa beh kóng--chhut-lâi. Góa ê sîn khó͘-thàng, góa beh sin-sò͘.

¹² Góa kiám sī tōa-hái, á-sī hái-koài, lí kèng-jiân phài lâng kàm-sī góa?

¹³ Góa nā kóng: Góa ê bîn-chhn̂g ōe an-ùi góa, góa ê chhn̂g-pho͘ ōe kiám-khin góa ê khó͘-thàng,

¹⁴ lí chiū ēng bîn-bāng hō͘ góa kiaⁿ, ēng ok-bāng hō͘ góa chhoah.

¹⁵ Góa lêng-khó hō͘ lâng chhui--sí, mā khah iâⁿ oa̍h kah chiah-ni̍h kan-khó͘.

¹⁶ Góa iàm-ò͘ⁿ sìⁿ-miā, bô ài éng-oán oa̍h--teh; lí mài chhap--góa, in-ūi góa ê ji̍t-chí lóng bô ì-gī.

¹⁷ Lâng sǹg sím-mi̍h, lí hiah-ni̍h khòaⁿ-tāng i, hiah-ni̍h chiàu-kò͘ i?

¹⁸ Lí ta̍k chá-khí kàm-chhat i, ta̍k-ji̍t chhì-giām i?

¹⁹ Lí tī-sî chiah beh oa̍t-cháu bô khòaⁿ góa, tiap-á-kú mài chhap--góa, hō͘ góa thun-nōa chi̍t-ē?

²⁰ Kàm-chhat lâng ê Chú ah, góa nā ū chōe, sī gāi-tio̍h lí sím-mi̍h? Lí sī-án-chóaⁿ ēng góa chòe âng-sim siā? Sī-án-chóaⁿ khòaⁿ góa chòe lí ê tāng-tàⁿ?

²¹ Lí sī-án-chóaⁿ m̄ sià-bián góa ê kè-sit, m̄ tû-khì góa ê chōe-kò? Taⁿ góa teh-beh kui-thó͘ lah, lí beh chhē góa, mā chhē bô.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan