Iok-pek-kì 4 - 現代台語譯本羅馬字版

Tē-it Piàn Tùi-ōe
( 4.1-14.22 )

¹ Thê-bān-lâng Í-lī-hoat ìn Iok-pek kóng:

² Lâng beh kap lí kóng-ōe, lí ōe hiâm mâ-hoân bōe? Kiám ū lâng ōe-tàng lún--teh bô kóng-ōe?

³ Lí bat kà-sī chin chōe lâng, hō͘ loán-jio̍k ê chhiú kian-kiông.

⁴ Poa̍h-tó--ê, lí ēng ōe kā i hû--khí-lâi; kha-thâu-u sng-nńg--ê, lí hō͘ i ióng-kiāⁿ.

⁵ Chóng-sī chai-lān chi̍t-ē hoat-seng, lí chiū bōe-tàng jím-siū; chi̍t-ē kha̍p-tio̍h lí, lí chiū kiaⁿ-hiâⁿ.

⁶ Lí kiám m̄-sī tùi kèng-ùi Siōng-tè tit-tio̍h khak-sìn? Kiám m̄-sī tùi sûn-choân ê hêng-ûi tit-tio̍h ǹg-bāng?

⁷ Siūⁿ-khòaⁿ leh, bû-ko͘ ê lâng ná ōe bia̍t-bông? Chèng-ti̍t ê lâng kiám ōe húi-bia̍t?

⁸ Góa khòaⁿ, lâng nā chai-chèng chōe-kò, iā siâ-ok ê chéng-chí, it-tēng ōe siu-sêng kâng-lūi ê ké-chí.

⁹ Siōng-tè pûn-khùi, in chiū bia̍t-bông; I hoat tōa siū-khì, in chiū siau-bia̍t,

¹⁰ sai teh háu, béng-sai tián-ui ê siaⁿ lóng soah, sai-á-thûn ê chhùi-khí mā lóng kòng-tn̄g;

¹¹ sai in-ūi bô thang chia̍h sí--khì, sai-á-kiáⁿ mā lóng sì-sòaⁿ.

¹² Ū ōe tiām-tiām-á thoân kàu góa chia; góa ê hī-khang ū thiaⁿ-tio̍h i sòe-sòe ê siaⁿ.

¹³ Mî--sî lâng khùn tāng-bîn, siū ok-bāng kiáu-jiáu ê sî,

¹⁴ kiaⁿ-hiâⁿ lîm-kàu góa, hō͘ góa kui seng-khu phi̍h-phi̍h-chhoah.

¹⁵ Ū chi̍t chūn hong tùi góa ê bīn chhe--kè; góa kui seng-khu ê mn̂g chhàng--khí-lâi.

¹⁶ I thêng--teh, m̄-kú góa khòaⁿ bōe chhut i ê hêng-chōng. Ū hêng-siōng tī góa ba̍k-chiu chêng; sì-ûi chēng-chēng-chēng, góa thiaⁿ-tio̍h ū siaⁿ kóng:

¹⁷ Ōe-sí ê lâng tī Siōng-tè gán-tiong kiám sī gī-lâng? Lâng tī Chhòng-chō-chú bīn-chêng kiám ōe-tàng sǹg-chòe bô-chōe?

¹⁸ Siōng-tè bô sìn-jīm ka-kī ê po̍k-jîn, mā ōe chí-chek I sù-chiá ê chhò-gō͘.

¹⁹ Hiah-ê tòa tī thô͘-kak-chhù ê lâng koh-khah bián-kóng; in ê pún-chit sī thô͘-hún, chhin-chhiūⁿ chiù-thâng hō͘ lâng chi̍t-ē jôe chiū sí.

²⁰ In chá-khí-sî oa̍h--teh, ē-hng-sî chiū siū húi-bia̍t, éng-oán bô--khì, bô lâng ōe-kì--tit.

²¹ In pò͘-pîⁿ ê soh khiú--khí-lâi chiū tó--lo̍h-khì, sí kah bô-bêng-bô-pe̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan