Iok-pek-kì 3 - 現代台語譯本羅馬字版

Iok-pek Chiù-chó͘ Ka-kī

¹ Āu-lâi Iok-pek khui-chhùi, chiù-chó͘ i chhut-sì ê ji̍t.

² Iok-pek kóng:

³ Goān góa chhut-sì hit-ji̍t siau-sit; goān kóng “Ū hoâi-īn ta-po͘-kiáⁿ” hit-mî mā siau-sit.

⁴ Goān hit-ji̍t pìⁿ-chòe o͘-àm; goān thiⁿ-téng ê Siōng-tè bô khòaⁿ-kò͘ i, kng mā bô chiò i.

⁵ Goān o͘-àm kap sí-ìm kā hit-ji̍t chhú--khì; goān ba̍t-hûn khàm tī hit téng-bīn; goān ji̍t-thâu choân-si̍t phah-kiaⁿ i.

⁶ Goān hit-mî hō͘ o͘-àm thun--khì, tùi nî-le̍k san-tû, bô khǹg tī ge̍h-le̍k lāi-bīn.

⁷ Goān hit-mî bô lâng siⁿ-kiáⁿ, bô thiaⁿ-tio̍h hoaⁿ-hí ê siaⁿ.

⁸ Goān hiah-ê liām hû-chiù, ōe-hiáu ho͘-hoàn hái-siù--ê, khí-lâi chiù-chó͘ hit-ji̍t.

⁹ Goān khé-bêng-chhiⁿ pìⁿ-chòe o͘-àm, só͘ kî-thāi ê thiⁿ-kng bōe chhut-hiān, mā khòaⁿ bōe tio̍h chheng-chá ê ji̍t-kng;

¹⁰ in-ūi i bô koaiⁿ-ba̍t góa ê lāu-bú ê chú-kiong, tì-kàu góa ê ba̍k-chiu khòaⁿ-tio̍h chin chōe hoān-lān.

¹¹ Góa ná ōe bô tī thai--ni̍h chiū sí, ná ōe bô chhut pak-tó͘ chiū tn̄g-khùi?

¹² Sī-án-chóaⁿ ū kha-thâu-u kā góa chiap, ū lin hō͘ góa suh?

¹³ Nā bô, góa í-keng an-jiân kè-sin, í-keng chēng-chēng khùn--khì,

¹⁴ kap tōe-chiūⁿ ūi-tio̍h ka-kī tiông-kiàn hong-hòe ê kiong-tiān ê kun-ông siú-léng chòe-hé teh khùn;

¹⁵ á-sī kap kim-gûn châi-pó móa chhù ê ông-chú chòe-hé khùn,

¹⁶ ná bô chhin-chhiūⁿ liû-sán chiū kā tâi ê eⁿ-á, chhin-chhiūⁿ bô kìⁿ-tio̍h kng ê thai-jî.

¹⁷ Tī hia pháiⁿ-lâng bōe koh jiáu-loān; ià-siān ê lâng ōe tit-tio̍h an-lêng.

¹⁸ Tī hia siû-hoān lóng tit-tio̍h an-hioh, bōe koh thiaⁿ-tio̍h tok-kang ê siaⁿ.

¹⁹ Bô-lūn tōa-sòe kùi-chiān lóng tī hia; lô͘-lē mā thoat-lī chú-lâng ê koán-chè, tit-tio̍h chū-iû.

²⁰ Siōng-tè sī-án-chóaⁿ sù kng-bêng hō͘ siū-khó͘ ê lâng, sī-án-chóaⁿ sù sìⁿ-miā hō͘ sim-sîn thòng-khó͘ ê lâng?

²¹ In ài-beh sí, koh sí bōe khì; chhē sí pí chhē chhàng--teh ê pó-pòe khah pek-chhiat.

²² In chi̍t-ē chhē-tio̍h hûn-bōng chiū khoài-lo̍k, hoaⁿ-hí kàu bōe-kò͘--tit.

²³ Lâng ê lō͘ í-keng hō͘ Siōng-tè cha̍h--teh, cháu-tâu-bô-lō͘, ná koh sù i kng-bêng?

²⁴ Góa ēng thó͘-khùi chòe pn̄g chia̍h; tōa-siaⁿ háu, chhin-chhiūⁿ choh tōa-chúi.

²⁵ Góa teh kiaⁿ--ê, kèng-jiân hoat-seng, só͘ kiaⁿ-hiâⁿ--ê, phian-phian lîm-kàu.

²⁶ Góa bô pêng-an, bô pêng-chēng, bô tit-tio̍h an-hioh, chí-ū chai-lān put-toān lîm-kàu góa.

The Bible Society in Taiwan

Lean sinn:

Ceanglaichean taic

Sanasan