Biblia Todo Logo
Bìoball air-loidhne

- Sanasan -

Iok-pek-kì 2 - 現代台語譯本羅馬字版


Sat-tàn koh Chhì-thàm Iok-pek

1 Koh ū chi̍t ji̍t, Siōng-tè ê chèng sù-chiá lâi khiā tī Siōng Chú ê bīn-chêng, Sat-tàn mā chòe-hé lâi khiā tī Siōng Chú ê bīn-chêng.

2 Siōng Chú tùi Sat-tàn kóng, “Lí khì tó-ūi?” Sat-tàn ìn Siōng Chú, “Góa tī tōe-chiūⁿ sì-kòe kiâⁿ-lâi-kiâⁿ-khì.”

3 Siōng Chú tùi Sat-tàn kóng, “Lí ū chù-ì tio̍h góa ê po̍k-jîn Iok-pek--bô? Sè-kan bô lâng chhin-chhiūⁿ i hiah-ni̍h sûn-choân chèng-ti̍t, kèng-ùi Siōng-tè, bô chòe pháiⁿ-tāi. Lí sui-jiân kek góa kong-kek i, bô lí-iû húi-hoāi i, i iáu-kú chhî-siú i ê sûn-choân chèng-ti̍t.”

4 Sat-tàn ìn Siōng Chú, “Ēng phê ōaⁿ phê! Lâng ōe ūi-tio̍h kò͘ ka-kī ê sìⁿ-miā kam-goān pàng-sak i ê it-chhè só͘ ū.

5 M̄-kú lí nā chhun-chhiú kha̍p-tio̍h i ê kut, i ê bah, i it-tēng ōe tng-bīn kā lí chiù-chó͘.”

6 Siōng Chú tùi Sat-tàn kóng, “Hó, i tī lí ê chhiú-thâu, m̄-kú tio̍h lâu i ê sìⁿ-miā.”

7 Sat-tàn chiū tùi Siōng Chú ê bīn-chêng chhut--khì, kong-kek Iok-pek, hō͘ i tùi kha-tóe kàu thâu-khak téng siⁿ to̍k-chhng.

8 Iok-pek chiū chē tī hé-hu téng, ēng phòa--khì ê hiā-phìⁿ pê seng-khu.

9 I ê bó͘ tùi i kóng, “Lí iáu-teh chhî-siú lí ê chèng-ti̍t o͘h? Tio̍h chiù-chó͘ Siōng-tè, khì sí-sí--leh.”

10 M̄-kú Iok-pek tùi i kóng, “Lí kóng-ōe chhin-chhiūⁿ hiah-ê m̄-chai kiàn-siàu ê cha-bó͘-lâng. Lán tùi Siōng-tè tit-tio̍h hok-khì, kiám bô mā tùi I siū chai-hō?” Sui-jiân tú-tio̍h chit-ê tāi-chì, Iok-pek iû-goân bô kóng chi̍t kù tek-chōe Siōng-tè ê ōe.


Iok-pek ê Pêng-iú Lâi Thàm I

11 Iok-pek saⁿ ê pêng-iú — Thê-bān-lâng Í-lī-hoat, Su-a-lâng Pí-le̍k-ta̍t, Ná-má-lâng Só-hoat — thiaⁿ-tio̍h i tú-tio̍h chiah-ê chai-hō, chiū sio-chio tùi in ê só͘-chāi lâi piáu-sī tông-chêng, kā i an-ùi.

12 In hn̄g-hn̄g khòaⁿ-tio̍h Iok-pek, bōe-jīn--tit, chiū tōa-siaⁿ thî-khàu; ta̍k-ê thiah-li̍h gōa-saⁿ, ǹg thiⁿ iā thô͘-hún tī ka-kī ê thâu-khak téng.

13 In chhit mî chhit ji̍t kap i chē tī thô͘-kha, bô kap i kóng chi̍t kù ōe, in-ūi in khòaⁿ-tio̍h i só͘ siū ê thòng-khó͘ si̍t-chāi chin tōa.

The Bible Society in Taiwan

Bible Society in Taiwan
Lean sinn:



Sanasan