Bìoball air-loidhne

Iok-pek-kì 1 - 現代台語譯本羅馬字版

Sat-tàn Chhì-thàm Iok-pek

¹ O͘-su tōe-khu bat ū chi̍t ê lâng kiò-chòe Iok-pek, i sûn-choân chèng-ti̍t, kèng-ùi Siōng-tè, bô chòe pháiⁿ-tāi.

² I ū chhit ê kiáⁿ, saⁿ ê cha-bó͘-kiáⁿ.

³ I ê châi-sán ū chhit-chheng chiah iûⁿ, saⁿ-chheng chiah lo̍k-tô, gō͘-pah tùi gû, gō͘-pah chiah lû-bú; koh ū chin chōe po̍k-jîn. I sī tang-hng tē-it hó-gia̍h--ê.

⁴ I hiah-ê kiáⁿ siông-siông lûn-liû tī in ka-kī ê chhù pān chhe-chhau, mā chhiáⁿ in saⁿ ê chí-bē chòe-hé lim-chia̍h.

⁵ Múi chi̍t piàn in lûn-liû pān chhe-chhau liáu, Iok-pek ōe chhe lâng kiò in tio̍h kiat-chēng ka-kī. I thàu-chá khí--lâi, chiàu in ê jîn-sò͘ thòe in hiàn sio-hòa-chè. Iok-pek chiàu-siông án-ni chòe, in-ūi i siūⁿ-kóng, i ê kiáⁿ khó-lêng ū hoān-chōe, siat-to̍k Siōng-tè.

⁶ Ū chi̍t ji̍t, Siōng-tè ê chèng sù-chiá lâi khiā tī Siōng Chú ê bīn-chêng, Sat-tàn mā chòe-hé lâi.

⁷ Siōng Chú mn̄g Sat-tàn, “Lí khì tó-ūi?” Sat-tàn ìn Siōng Chú, “Góa tī tōe-chiūⁿ sì-kòe kiâⁿ-lâi-kiâⁿ-khì.”

⁸ Siōng Chú tùi Sat-tàn kóng, “Lí ū chù-ì tio̍h góa ê po̍k-jîn Iok-pek--bô? Sè-kan bô lâng chhin-chhiūⁿ i hiah-ni̍h sûn-choân chèng-ti̍t, kèng-ùi Siōng-tè, bô chòe pháiⁿ-tāi.”

⁹ Sat-tàn ìn Siōng Chú, “Iok-pek kèng-ùi Siōng-tè kiám bô lí-iû?

¹⁰ Lí kiám m̄-sī ū ēng lî-pa kā i ûi--teh, pó-hō͘ i, i ê ka-têng, kap i só͘ ū ê it-chhè? I só͘ chòe--ê, lí sù-hok i, hō͘ i ê cheng-siⁿ chōe kah bōe-sǹg--tit.

¹¹ I só͘-ū--ê lí chhin-chhiú kā i kha̍p chi̍t-ē khòaⁿ-bāi leh, i it-tēng ōe tng-bīn kā lí chiù-chó͘.”

¹² Siōng Chú tùi Sat-tàn kóng, “Hó, i it-chhè só͘ ū--ê lóng tī lí ê chhiú-thâu, m̄-kú m̄-thang siong-hāi tio̍h i pún-sin.” Sat-tàn chiū tùi Siōng Chú ê bīn-chêng chhut--khì.

Iok-pek Sòng-sit Jî-lú kap Châi-sán

¹³ Ū chi̍t ji̍t Iok-pek ê kiáⁿ cha-bó͘-kiáⁿ tú-á tī in tōa-hiaⁿ ê chhù teh chia̍h teh lim ê sî,

¹⁴ ū chi̍t ê sù-chiá lâi kā Iok-pek kóng, “Gû teh lôe-chhân, lû-bú tī piⁿ--á chia̍h-chháu ê sî,

¹⁵ Sī-pa-lâng hut-jiân lâi kong-kek, kā gû kap lû lóng chhiúⁿ--khì, koh ēng to thâi-sí hiah-ê po̍k-jîn; chí-ū góa chi̍t ê cháu ū lī lâi pò lí.”

¹⁶ I kóng iáu-bē soah, koh ū chi̍t ê lâi, kóng, “Siōng-tè ê hé tùi thiⁿ kàng-lo̍h, sio-sí iûⁿ-kûn kap hiah-ê po̍k-jîn; chí-ū góa chi̍t ê cháu ū lī lâi pò lí.”

¹⁷ I kóng iáu-bē soah, koh ū chi̍t ê lâi, kóng, “Ka-le̍k-tí-lâng pun-chòe saⁿ tūi hut-jiân lâi kong-kek, kā lo̍k-tô lóng chhiúⁿ--khì, koh ēng to thâi-sí hiah-ê po̍k-jîn; chí-ū góa chi̍t ê cháu ū lī lâi pò lí.”

¹⁸ I kóng iáu-bē soah, koh ū chi̍t ê lâi, kóng, “Lí ê kiáⁿ cha-bó͘-kiáⁿ, tī in tōa-hiaⁿ ê chhù teh chia̍h teh lim ê sî,

¹⁹ hut-jiân ū tōa-hong tùi khòng-iá thàu--lâi, sàu chhù ê sì-kak-thâu, chhù tó, teh-sí hiah-ê siàu-liân-lâng; chí-ū góa chi̍t ê cháu ū lī lâi pò lí.”

²⁰ Iok-pek chiū khiā--khí-lâi, thiah-li̍h gōa-saⁿ, thì-thâu, phak tī thô͘-kha pài,

²¹ kóng, “Góa thǹg-theh chhut bú-thai, mā ōe thǹg-theh tò--khì; Siōng Chú siúⁿ-sù, Siōng Chú the̍h--khì. Goān Siōng Chú ê miâ siū chheng-chàn!”

²² Sui-jiân tú-tio̍h chiah-ê tāi-chì, Iok-pek pèng bô hoān-chōe chí-chek Siōng-tè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan