Bìoball air-loidhne

Iok-ní-su 1 - 現代台語譯本羅馬字版

¹ Ē-bīn sī Siōng Chú tùi Pí-thó͘-ní ê kiáⁿ Iok-ní kóng ê ōe:

Ūi-tio̍h Lông-chok-bu̍t Sún-hāi Ai-siong

² Lāu-lâng ah, tio̍h thiaⁿ! Chit só͘-chāi ê chū-bîn ah, lóng tio̍h chù-ì thiaⁿ! Tī lín ê ji̍t, á-sī lín lia̍t-chó͘ ê ji̍t, kiám bat hoat-seng chit-khoán tāi-chì?

³ Tio̍h chiong chit-ê tāi-chì thoân hō͘ lín ê kiáⁿ-jî, kiáⁿ-jî thoân hō͘ sun, sun thoân hō͘ hō͘-tāi.

⁴ Tōa-chiah chháu-meh chia̍h chhun--ê, chháu-meh lâi chia̍h; chháu-meh chia̍h chhun--ê, chháu-meh-á-kiáⁿ lâi chia̍h; chháu-meh-á-kiáⁿ chia̍h chhun--ê, chháu-meh-kong lâi chia̍h.

⁵ Chiú-chùi ê lâng ah, tio̍h chhíⁿ, tio̍h khàu; hò͘ⁿ-chiú ê lâng ah, tio̍h ūi-tio̍h sin-chiú ai-khàu; in-ūi lín bô koh ū chiú thang lim lah.

⁶ Ū chi̍t kûn chháu-meh lâi chhim-hoān góa ê tōe, kiông-béng, sò͘-bo̍k sǹg bōe liáu; in ê khí chhin-chhiūⁿ sai-kang ê khí, in ê gê chhin-chhiūⁿ sai-bú ê gê;

⁷ in húi-hoāi góa ê phû-tô-chhiū, kā góa ê bû-hoa-kó-chhiū ê chhiū-phê pak kah kng-liu-liu, pàng-teh hō͘ sí.

⁸ Lí tio̍h ai-khàu, chhin-chhiūⁿ siàu-lú io hâ môa-pò͘, ūi-tio̍h i tī siàu-liân ê sî sit-khì bī-hun-hu ai-khàu.

⁹ Siōng Chú ê tiān bô sò͘-chè kap tiān-chiú-chè thang hiàn; ho̍k-sāi Siōng Chú ê chè-si mā ai-khàu.

¹⁰ Chhân-hn̂g hong-hòe, tōe pi-ai; in-ūi ngó͘-kok húi-hoāi, sin-chiú ta--khì, iû khiàm-kheh.

¹¹ Choh-sit-lâng ah, tio̍h kiàn-siàu; chai-chèng phû-tô ê lâng ah, tio̍h ai-khàu, in-ūi tōa-be̍h sió-be̍h kap chhân-hn̂g ê siu-sêng lóng bô--khì.

¹² Phû-tô-chhiū ta--khì, bû-hoa-kó-chhiū ko͘-tâ, sia̍h-liû-chhiū, iâ-chó-chhiū, phōng-kó-chhiū, liân chhân-iá it-chhè ê chhiū-ba̍k lóng ko͘-tâ; jîn-kan ê khoài-lo̍k mā lóng siau-sit.

¹³ Chè-si ah, tio̍h hâ môa-pò͘ thî-khàu; tī chè-tôaⁿ ho̍k-sāi ê lâng ah, tio̍h ai-khàu; chòe góa ê Siōng-tè chhe-ēng ê lâng ah, tio̍h lâi, chhēng môa-saⁿ kè-mî; in-ūi bô lâng the̍h sò͘-chè kap tiān-chiú-chè lâi lín ê Siōng-tè ê tiān hōng-hiàn.

¹⁴ Lín tio̍h siat chi̍t ê sèng-ji̍t lâi kìm-chia̍h, tiàu-chi̍p giâm-siok-hōe, chio-chi̍p sī-tōa, kap kok-lāi só͘-ū ê chū-bîn lâi Siōng Chú — lín ê Siōng-tè ê tiān, tùi Siōng Chú ai-kiû.

¹⁵ Hit-ji̍t lín chhám ah! In-ūi Siōng Chú ê ji̍t kūn lah, Choân-lêng-chiá beh lâi húi-bia̍t lah.

¹⁶ Niû-si̍t tī lán ê ba̍k-chiu chêng toān-choa̍t lah! Hoaⁿ-hí khoài-lo̍k tī lán Siōng-tè ê tiān siau-sit lah!

¹⁷ Chéng-chí tī thô͘--ni̍h nōa--khì; chhng-khò͘ hong-hòe, chhek-chhng tó-hoāi, in-ūi bô ngó͘-kok thang siu-sêng.

¹⁸ Cheng-siⁿ háu kah chin chhiⁿ-chhám, gû-kûn loān-loān-chông, in-ūi bô chháu; iûⁿ-kûn mā siū-khó͘.

¹⁹ Siōng Chú ah, góa kiû-kiò lí, in-ūi hé sio-bia̍t khòng-iá ê chháu-po͘, hé-iām sio-chīn chhân-iá ê chhiū-ba̍k.

²⁰ Chhân-iá ê cháu-siù mā tùi lí ai-kiò, in-ūi khoe-chúi ta--khì, hé sio-bia̍t khòng-iá ê chháu-po͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan