Bìoball air-loidhne

Iok-ná-su 4 - 現代台語譯本羅馬字版

Iok-ná ê Siū-khì kap Siōng Chú ê Lîn-bín

¹ Iok-ná tùi chit-ê tāi-chì chin bô hoaⁿ-hí, hui-siông siū-khì,

² chiū tùi Siōng Chú kî-tó kóng, “Siōng Chú ah, góa iáu-bē cháu-lī pún-kok ê sî, kiám m̄-sī ū án-ni kóng? Góa kóaⁿ-kín beh cháu-khì Tha-si, sī in-ūi góa chai lí sī ū un-tián ê Siōng-tè, chhiong-móa lîn-bín, bōe khoài siū-khì, ū hong-sēng ê chû-ài, ōe kái-piàn sim-ì bô beh kàng chai-hō.

³ Siōng Chú, kui-khì hō͘ góa sí-sí--leh, góa sí pí oa̍h--teh khah hó.”

⁴ Siōng Chú ìn kóng, “Lí án-ni siū-khì kiám tio̍h?”

⁵ Iok-ná chiū chhut-khì siâⁿ-gōa, kàu siâⁿ ê tang-pêng, ūi ka-kī tah chi̍t ê liâu-á, chē tī ìm-ńg-ē, beh khòaⁿ hit-ê siâⁿ tàu-tóe ōe hoat-seng sím-mi̍h tāi-chì.

⁶ Chú Siōng-tè an-pâi chi̍t châng pi-môa, hō͘ i hoat kah pí Iok-ná khah koân, chòe ìm-ńg jia i ê thâu-khak, hō͘ i bián kan-khó͘; Iok-ná in-ūi chit-châng pi-môa hui-siông hoaⁿ-hí.

⁷ Keh-ji̍t thàu-chá, Siōng-tè an-pâi chi̍t bé thâng chia̍h chit-châng pi-môa, pi-môa soah sí--khì.

⁸ Ji̍t chhut ê sî, Siōng-tè an-pâi iām-jia̍t ê tang-hong; ji̍t-thâu pha̍k Iok-ná ê thâu-khak, hō͘ i kiông-beh hūn--khì; i chiū ūi ka-kī kiû sí, kóng, “Góa sí pí oa̍h--teh khah hó.”

⁹ Siōng-tè tùi Iok-ná kóng, “Lí ūi-tio̍h chit-châng pi-môa siū-khì kiám tio̍h?” Iok-ná ìn kóng, “Tong-jiân! Góa khì kah beh sí.”

¹⁰ Siōng Chú kóng, “Chit-châng pi-môa m̄-sī lí chèng--ê, m̄-sī lí hō͘ i tōa-châng--ê, chi̍t mî tōa-châng, keh-mî sí--khì, lí to ōe m̄-kam;

¹¹ Nî-nî-bî chit-ê tōa-siâⁿ, lāi-bīn ū cha̍p-jī-bān bōe-hiáu hun-pia̍t hó-pháiⁿ ê lâng, koh ū chin chōe cheng-siⁿ, góa kiám m̄-bián kā i thiàⁿ-sioh?”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan