Bìoball air-loidhne

Iok-hān It-su 3 - 現代台語譯本羅馬字版

Siōng-tè ê Kiáⁿ-jî

¹ Lín siūⁿ-khòaⁿ leh, Pē jōa-á-ni̍h thiàⁿ lán, hō͘ lán thang chheng-chòe I ê kiáⁿ-jî; sū-si̍t lán chiū-sī. Sè-kan-lâng m̄ bat lán, in-ūi in m̄ bat Siōng-tè.

² Chhin-ài ê pêng-iú, hiān-chāi lán sī Siōng-tè ê kiáⁿ-jî, chiong-lâi ōe án-chóaⁿ iáu-bē bêng-hián. M̄-kú lán chai, Ki-tok hián-hiān ê sî, lán ōe chhin-chhiūⁿ I, in-ūi lán ōe khòaⁿ-kìⁿ I ê chin-siōng.

³ Ki-tok sī sûn-kiat, só͘-í tùi Ki-tok ū chit-khoán ǹg-bāng ê lâng ōe ka-kī pó-chhî sûn-kiat.

⁴ Lâng hoān-chōe sī ûi-pōe Siōng-tè ê Lu̍t-hoat, in-ūi chōe sī ûi-pōe Siōng-tè ê Lu̍t-hoat.

⁵ Lín chai Ki-tok hián-hiān sī beh tû-khì lâng ê chōe, m̄-kú I pún-sin bô chōe.

⁶ Kap Ki-tok pó-chhî bi̍t-chhiat koan-hē ê lâng bōe kè-sio̍k hoān-chōe; kè-sio̍k hoān-chōe ê lâng m̄-bat khòaⁿ-kìⁿ Ki-tok, mā m̄ bat I.

⁷ Siàu-liân pêng-iú, m̄-thang siū bê-he̍k. Ki-tok sī gī-lâng, só͘-í si̍t-hêng kong-gī--ê chiah sī gī-lâng.

⁸ Kè-sio̍k hoān-chōe ê lâng sio̍k Mô͘-kúi, in-ūi Mô͘-kúi tùi khí-thâu chiū hoān-chōe. Siōng-tè ê Kiáⁿ hián-hiān ê bo̍k-te̍k sī beh phò-hoāi Mô͘-kúi ê chok-ûi.

⁹ Tùi Siōng-tè siⁿ--ê bōe kè-sio̍k hoān-chōe, in-ūi Siōng-tè ê oa̍h-miā tī in lāi-bīn; in bōe kè-sio̍k hoān-chōe, in-ūi in sī tùi Siōng-tè siⁿ--ê.

¹⁰ Tùi án-ni, sím-mi̍h-lâng sī Siōng-tè ê kiáⁿ-jî á-sī Mô͘-kúi ê kiáⁿ-jî chin chheng-chhó: Bô si̍t-hêng kong-gī, bô thiàⁿ hiaⁿ-tī chí-bē--ê, m̄-sī Siōng-tè ê kiáⁿ-jî.

Tio̍h Saⁿ-thiàⁿ

¹¹ Lán tio̍h saⁿ-thiàⁿ; che sī lín tùi khí-thâu só͘ thiaⁿ--tio̍h ê sìn-sit.

¹² Lán m̄-thang chhin-chhiūⁿ Kai-ún; i sio̍k Siâ-ok-chiá, ū thâi-sí ka-kī ê sió-tī. I ná ōe thâi-sí sió-tī? In-ūi i ê hêng-ûi siâ-ok, m̄-kú sió-tī ê hêng-ûi chèng-ti̍t.

¹³ Hiaⁿ-tī chí-bē, sè-kan-lâng nā oàn-hūn lín, lín m̄-bián kî-koài.

¹⁴ Lán chai, lán í-keng chhut-sí-ji̍p-oa̍h, in-ūi lán ū thiàⁿ hiaⁿ-tī chí-bē. Bô thiàⁿ--lâng-ê sī tiàm tī sí ê koán-hat-ē.

¹⁵ Oàn-hūn hiaⁿ-tī á-sī chí-bē chiū-sī thâi-lâng; lín mā chai, thâi-lâng--ê, éng-oán ê oa̍h-miā bô tiàm tī i lāi-bīn.

¹⁶ Ki-tok ūi-tio̍h lán hi-seng sìⁿ-miā, tùi án-ni lán chai sím-mi̍h sī thiàⁿ; án-ni lán mā ài ūi-tio̍h hiaⁿ-tī á-sī chí-bē hi-seng sìⁿ-miā.

¹⁷ Nā ū hó-gia̍h-lâng khòaⁿ-tio̍h hiaⁿ-tī á-sī chí-bē ū khiàm-kheh ia̍h bô tông-chêng lîn-bín, ná ōe-tàng kóng i ū thiàⁿ Siōng-tè?

¹⁸ Siàu-liân pêng-iú, saⁿ-thiàⁿ m̄-thang chí-ū ēng ōe á-sī ēng chhùi kóng, tio̍h si̍t-si̍t-chāi-chāi si̍t-hêng.

Tī Siōng-tè Bīn-chêng Ióng-kám Bián Kiaⁿ

^19-20 Tùi án-ni lán chai lán sio̍k chin-lí. Lán nā siū liông-sim chek-pī, tī Siōng-tè ê bīn-chêng lán ōe-tàng an-ún chū-chāi, in-ūi I ê sim pí lán ê sim koh-khah khoan-tāi, I ta̍k-hāng lóng chai.

²¹ Chhin-ài ê pêng-iú, lán ê liông-sim nā bô kā lán chek-pī, lán tī Siōng-tè bīn-chêng chiū thang ióng-kám m̄-bián kiaⁿ.

²² Lán bô-lūn tùi I kiû sím-mi̍h lóng ōe tit--tio̍h, in-ūi lán chun-siú I ê kài-bēng, tī I bīn-chêng chòe I só͘ hoaⁿ-hí ê sū.

²³ I ê kài-bēng sī án-ni: Lán tio̍h sìn I ê Kiáⁿ Iâ-so͘ Ki-tok ê miâ, mā tio̍h chiàu I hō͘ lán ê bēng-lēng saⁿ-thiàⁿ.

²⁴ Chun-siú Siōng-tè kài-bēng ê lâng tiàm tī I lāi-bīn, I mā tī in lāi-bīn. Tùi Siōng-tè sù hō͘ lán ê Sèng Sîn lán chai Siōng-tè tiàm tī lán lāi-bīn.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan