Bìoball air-loidhne

Iâ-lī-bí-su 3 - 現代台語譯本羅馬字版

Bô Tiong-sêng ê Í-sek-lia̍t

¹ “Nā ū lâng kā i ê bó͘ lî-hun, i ê bó͘ lī-khui i khì kè pa̍t-lâng, i kiám thang koh tò-khì chhē chit-ê chêng-bó͘? I nā án-ni chòe, chiū-sī phah lâ-sâm chit-tè thó͘-tōe.” Siōng Chú kóng: Lí í-keng kap chin chōe ài-jîn kiâⁿ-îm, iáu siūⁿ-beh tò-lâi góa chia sī--bô?

² Lí tio̍h gia̍h-thâu khòaⁿ chhiū-á í-keng chhò-liáu-liáu ê soaⁿ-lûn-á, iáu ū tó-ūi m̄-sī lí kiâⁿ-îm--kè ê só͘-chāi? Lí tī lō͘-piⁿ teh thèng-hāu ài-jîn, chhin-chhiūⁿ kiông-tō tī khòng-iá bâi-ho̍k tng-tán; lí ê îm-loān kap siâ-ok ù-jiám choân-tōe.

³ In-ūi án-ni, hō͘-chúi thêng-chí, chhun-ú bô lo̍h. Lí iáu bīn-tài-thô-hoe, m̄-chai kiàn-siàu.

⁴ Lí tú-chiah chiah tùi góa kiò kóng, “A-pa, tùi góa sòe-hàn lí chiū thiàⁿ góa.

⁵ Lâng kiám ōe it-ti̍t siū-khì, éng-oán khioh-hūn?” Lí sui-jiân án-ni kóng, m̄-kú iáu piàⁿ-sì teh chòe pháiⁿ.

Í-sek-lia̍t kap Iû-tāi Tio̍h Hóe-kái

⁶ Iok-se-a thóng-tī Iû-tāi ê sî, Siōng Chú tùi góa kóng, “Lí ū khòaⁿ-kìⁿ pōe-poān ê Í-sek-lia̍t ê só͘-chòe--bô? I chiūⁿ koân-soaⁿ, tī ta̍k-châng chhiⁿ-chhùi ê chhiū ē-bīn kiâⁿ-îm.

⁷ Góa siūⁿ-kóng i chòe chiah-ê tāi-chì liáu-āu, ōe tò-tńg-lâi góa chia, m̄-kú i bô tńg--lâi; i put-cheng ê sió-bē Iû-tāi mā ū khòaⁿ-tio̍h i án-ni chòe.

⁸ Pōe-poān ê Í-sek-lia̍t îm-loān, só͘-í góa hō͘ i lî-hun-su; i put-cheng ê sió-bē Iû-tāi lóng m̄ kiaⁿ, mā khì kiâⁿ-îm.

⁹ Í-sek-lia̍t kā kiâⁿ-îm khòaⁿ-chòe bô iàu-kín, khì pài chhâ-thâu kap chio̍h-thâu, chiū kā chit-ê thó͘-tōe phah lâ-sâm.

¹⁰ Sui-jiân hoat-seng chiah-ê tāi-chì, i put-cheng ê sió-bē Iû-tāi iáu ké-ì kui-ǹg góa, bô beh chin-sim tńg-lâi góa chia. Siōng Chú án-ni soan-kò.”

¹¹ Siōng Chú koh tùi góa kóng, “Pōe-poān ê Í-sek-lia̍t pí put-cheng ê Iû-tāi iáu khah hó.

¹² Lí tio̍h khì kā tī pak-hng ê lâng kóng: Siōng Chú án-ni soan-kò, ‘Pōe-poān ê Í-sek-lia̍t-lâng, tio̍h tńg--lâi! Góa bōe tùi lín pìⁿ-bīn, bōe éng-oán tùi lín siū-khì, in-ūi góa tùi lín ê thiàⁿ éng-oán bōe kái-piàn.

¹³ Lín tio̍h jīn-chōe, in-ūi lín ū ûi-pōe Siōng Chú — lín ê Siōng-tè, tī chhiⁿ-chhùi ê chhiū ē-bīn tui-jip gōa-cho̍k ê sîn-bêng, bô beh thiaⁿ-thàn góa ê ōe! Siōng Chú án-ni soan-pò͘.

¹⁴ “‘Pōe-ge̍k ê kiáⁿ-jî, tio̍h tńg--lâi! Siōng Chú án-ni kóng. Góa chiah sī lín ê chú-lâng; góa beh tùi ta̍k-ê siâⁿ soán chi̍t ê lâng, ta̍k-cho̍k soán nn̄g ê lâng, kā lín chhōa tò-lâi Sek-an.

¹⁵ Góa beh chiong ha̍h góa sim-ì ê thóng-tī-chiá sù hō͘ lín; in ōe ēng tì-sek kap chhek-lio̍k tī-lí lín.

¹⁶ Lín tī chit-tè thó͘-tōe jîn-kháu tōa-tōa ke-thiⁿ ê sî, lâng bōe koh kóng-khí Siōng Chú ê iok-kūi, bōe koh siàu-liām, bōe koh kì--tit; in bô su-iàu iok-kūi, bōe koh chè-chō. Siōng Chú án-ni soan-pò͘.

¹⁷ Hit-sî, Iâ-lō͘-sat-léng ōe hō͘ lâng chheng-chòe Siōng Chú ê pó-chō; bān-kok bān-bîn ūi-tio̍h beh ho̍k-sāi Siōng Chú, lóng beh chū-chi̍p lâi hia; in bōe koh chiàu ka-kī siâ-ok kò͘-chip ê sim chòe tāi-chì.

¹⁸ Hit-sî, Iû-tāi-ke beh kap Í-sek-lia̍t-ke liân-ha̍p, tùi pak-hng chòe-hé tò-lâi góa sù hō͘ lín chó͘-sian chòe sán-gia̍p ê thó͘-tōe.’”

Siōng Chú ê Chú-bîn Pài Ngó͘-siōng

¹⁹ Siōng Chú kóng, “Góa jōa-á-ni̍h ài kā lí tòng-chòe ka-kī ê kiáⁿ tùi-thāi, chiong sè-kài siōng-hó ê thó͘-tōe sù lí chòe sán-gia̍p. Góa siūⁿ-kóng lí ōe kiò góa ‘A-pa’, bōe koh oa̍t-cháu m̄ tè góa.

²⁰ M̄-kú, Í-sek-lia̍t ah, lín kèng-jiân pōe-poān góa, chhin-chhiūⁿ hū-jîn-lâng pōe-poān tiōng-hu lī-khui i. Siōng Chú án-ni soan-kò.

²¹ Tī chhiū-á chhò-liáu-liáu ê soaⁿ-lûn-á ū thiaⁿ-kìⁿ siaⁿ, sī Í-sek-lia̍t-lâng teh háu, teh kî-kiû ê siaⁿ, in-ūi in kiâⁿ oan-khiau ê lō͘, kā Siōng Chú — in ê Siōng-tè pàng bōe-kì--tit.

²² Lín chiah-ê pōe-ge̍k ê kiáⁿ-jî, tò--lâi ah! Góa beh i-hó lín pōe-ge̍k ê pīⁿ. “Lín kóng, ‘Goán tī chia, goán tńg-lâi lí chia lah, in-ūi lí sī Siōng Chú — goán ê Siōng-tè.

²³ Tī sió-soaⁿ lāu-jia̍t kap tōa-soaⁿ chháu-nāu ê pài-pài, lóng bô lō͘-ēng, chí-ū Siōng Chú — goán ê Siōng-tè chiah ōe-tàng kái-kiù Í-sek-lia̍t.

²⁴ Goán tùi siàu-liân chiū teh pài ê sîn-bêng, hāi goán sit-khì chó͘-sian lô-khó͘ tit--tio̍h ê gû-kûn, iûⁿ-kûn, hāu-siⁿ, cha-bó͘-kiáⁿ.

²⁵ Goán sêng-jīn ka-kī ê kiàn-siàu, sêng-tam eng-kai siū ê lêng-jio̍k, in-ūi goán tùi siàu-liân kàu taⁿ tek-chōe Siōng Chú — goán ê Siōng-tè. Goán kap goán ê chó͘-sian lóng bô thiaⁿ-thàn Siōng Chú — goán ê Siōng-tè ê ōe.’”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan