Bìoball air-loidhne

Hui-lī-bûn-su 1 - 現代台語譯本羅馬字版

¹ Góa sī Pó-lô, choh Ki-tok Iâ-so͘ ê siû-hoān; góa kap lán ê hiaⁿ-tī Thê-mô͘-thài siá-phoe hō͘ goán só͘ thiàⁿ ê tâng-kang Hui-lī-bûn,

² goán ê chí-bē A-hui-a, goán ê chiàn-iú A-ki-pò͘, í-ki̍p tī lí ê chhù teh chū-hōe ê kàu-hōe.

³ Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an!

Hui-lī-bûn ê Thiàⁿ-sim kap Sìn-sim

⁴ Góa ta̍k-piàn kî-tó ê sî lóng ū siūⁿ-tio̍h lí, siông-siông kám-siā góa ê Siōng-tè;

⁵ in-ūi góa ū thiaⁿ-tio̍h lí tùi Siōng-tè só͘-ū ê chú-bîn ū thiàⁿ-sim, tùi Chú Iâ-so͘ ū sìn-sim.

⁶ Góa khún-kiû Siōng-tè, thong-kè goán kap lín hun-hióng sìn-gióng, ōe-tàng chhiok-chìn lán tùi kap Ki-tok kiat-liân só͘ tit--tio̍h it-chhè ê chiok-hok, ū khah chhim ê liáu-kái.

⁷ Hiaⁿ-tī ah, lí ê thiàⁿ-sim ū hō͘ góa chin tōa ê hoaⁿ-hí kap kó͘-lē! Siōng-tè ê chú-bîn lóng ū tùi lí tit-tio̍h kek-lē.

Ūi O-nî-se-bô͘ Kî-kiû

⁸ Góa khò Ki-tok sui-jiân ōe-tàng hó-táⁿ bēng-lēng lí chòe eng-kai chòe ê tāi-chì,

⁹ m̄-kú, in-ūi thiàⁿ ê iân-kò͘ góa lêng-khó kā lí kiû. Góa Pó-lô í-keng nî-lāu, hiān-chāi iáu-sī Ki-tok Iâ-so͘ ê siû-hoān.

¹⁰ Góa thòe O-nî-se-bô͘ kā lí kiû, i sī góa koaiⁿ-kaⁿ ê sî só͘ siⁿ--ê.

¹¹ I í-chêng tùi lí lóng bô lō͘-ēng, hiān-chāi tùi lí tùi góa lóng chin ū lō͘-ēng.

¹² Hiān-chāi góa sàng i tńg-khì lí hia; i sī góa só͘ thiàⁿ-sioh--ê.

¹³ Góa goân-lâi siūⁿ-beh kā i lâu tī sin-piⁿ, thang tī góa ūi-tio̍h hok-im chòe siû-hoān ê tiong-kan thòe lí ho̍k-sāi góa;

¹⁴ m̄-kú bô lí ê tông-ì, góa mài án-ni chòe khah hó, hō͘ lí só͘ chòe ê hó-sū m̄-sī bián-kióng, sī kam-sim lo̍k-ì.

¹⁵ Kiám-chhái in-ūi án-ni, O-nî-se-bô͘ tio̍h chiām-sî lī-khui lí, sī beh hō͘ lí éng-kiú kā i lâu--teh;

¹⁶ bô koh sī lô͘-lē, sin-hūn chhiau-kè lô͘-lē, sī só͘ thiàⁿ ê hiaⁿ-tī. Tùi góa lâi kóng te̍k-pia̍t sī án-ni, tùi lí lâi kóng koh-khah sī án-ni; i m̄-nā sī lí ke-lāi ê lâng, mā-sī Chú-lāi ê hiaⁿ-tī.

¹⁷ Só͘-í, lí nā khòaⁿ góa chòe tâng-phōaⁿ, chiū tio̍h chhin-chhiūⁿ chiap-la̍p góa án-ni kā i chiap-la̍p.

¹⁸ I nā ū tùi lí chòe sím-mi̍h m̄-tio̍h, á-sī ū khiàm lí sím-mi̍h, sǹg góa ê siàu.

¹⁹ Góa Pó-lô chhin-chhiú siá: Góa hū-chek hêng. Góa eng-kai m̄-bián kā lí thê-chhíⁿ, lí khiàm--góa-ê sī lí pún-sin.

²⁰ Sī lah, hiaⁿ-tī, in-ūi Chú ê iân-kò͘, kā góa tàu-saⁿ-kāng chi̍t-ē, hō͘ góa ê sim khò Ki-tok tit-tio̍h kek-lē.

²¹ Góa siá-phoe hō͘ lí, in-ūi khak-sìn lí ōe thiaⁿ góa ê iau-kiû; kî-si̍t, góa chai lí ōe chòe pí góa kóng--ê koh-khah chōe.

²² Mā tio̍h kā góa chún-pī chi̍t keng pâng-keng, in-ūi góa ǹg-bāng Siōng-tè ōe thiaⁿ lín ê kî-tó, hō͘ góa ōe-tàng khì lín hia.

Chòe-āu ê Chhéng-an

²³ Ūi-tio̍h Ki-tok Iâ-so͘ kap góa tâng choh siû-hoān ê Í-pa-hut beh kā lín chhéng-an.

²⁴ Góa ê tâng-kang Má-khó, A-lí-ta̍t-kó͘, Tí-má, Lō͘-ka mā beh kā lín chhéng-an.

²⁵ Goān Chú Iâ-so͘ Ki-tok ê un-tián kap lín ê sim-lêng tông-chāi!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan