Bìoball air-loidhne

Hô-se-a-su 3 - 現代台語譯本羅馬字版

Hô-se-a kap Put-cheng ê Cha-bó͘-lâng

¹ Siōng Chú tùi góa kóng, “Lí tio̍h koh khì ài hit-ê tùi lí bô tiong-si̍t ê cha-bó͘-lâng; i hiān-chāi ū chi̍t ê chêng-jîn. Sui-jiân Í-sek-lia̍t-lâng khì pài pa̍t-ê sîn-bêng, ài chia̍h chè ngó͘-siōng ê phû-tô-koaⁿ-oân, m̄-kú góa iáu thiàⁿ in; lí mā tio̍h án-ni thiàⁿ chit-ê cha-bó͘-lâng.”

² Góa chiū ēng cha̍p-gō͘ tè gûn-á kap chi̍t-pah gō͘-cha̍p kong-kun tōa-be̍h kā i bóe--tńg-lâi.

³ Góa tùi i kóng, “Lí tio̍h kap góa tòa, m̄-thang koh kiâⁿ-îm, mā m̄-thang khì tè pa̍t-ê ta-po͘-lâng; m̄-kú chit-tōaⁿ sî-kan góa mā bô beh kap lí tâng-pâng.”

⁴ Í-sek-lia̍t-lâng ōe chi̍t tōaⁿ tn̂g ê sî-kan bô kun-ông, bô siú-léng, bô chè-sū, bô tiau-khek ê thiāu, bô í-hut-tek, bô chhāi ka-cho̍k-sîn-siōng.

⁵ Āu-lâi Í-sek-lia̍t-lâng ōe koh tńg-lâi kui-sio̍k Siōng Chú — in ê Siōng-tè, hôe-ho̍k Tāi-pi̍t ê ông-tiâu; tī chiong-lâi ê ji̍t-chí, in ōe kèng-ùi Siōng Chú, niá-siū I hong-sēng ê un-hūi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan