Bìoball air-loidhne

Hap-kai-su 1 - 現代台語譯本羅馬字版

Siōng Chú Bēng-lēng Tiông-kiàn Sèng-tiān

¹ Tāi-liû-sū chòe Pho-su Hông-tè tē-jī nî la̍k-ge̍h chhoe-it, Siōng Chú kau-tài sian-ti Hap-kai thoân-ōe hō͘ Sat-la-thiat ê kiáⁿ Iû-tāi séng-tiúⁿ Só͘-lô-pa-pek kap Iok-sat-ta̍t ê kiáⁿ tōa-chè-si Iâ-su-a.

² Siōng Chú — Bān-kun ê Thóng-sòe án-ni kóng, “Chiah-ê jîn-bîn kóng Siōng Chú ê sèng-tiān tiông-kiàn ê sî iáu-bē kàu.”

³ Hit-sî, Siōng Chú kau-tài sian-ti Hap-kai thoân-ōe kóng,

⁴ “Chit-ê sèng-tiān iáu hong-hòe, lín ka-kī kiám thang tòa tī chong-hông sù-sī ê chhù?”

⁵ Só͘-í Siōng Chú — Bān-kun ê Thóng-sòe án-ni kóng, “Lín tio̍h iōng-sim kiám-thó lín ê hêng-ûi.

⁶ Lín iā-chéng chōe, siu-sêng chió; lín chia̍h, m̄-bat chia̍h kàu pá; lín lim, m̄-bat lim kàu chí-khoah; lín chhēng, m̄-bat chhēng kàu sio; lín thàn-chîⁿ, lóng khǹg lo̍h-khì phòa-khang ê chîⁿ-tē.”

⁷ Siōng Chú — Bān-kun ê Thóng-sòe án-ni kóng, “Tio̍h iōng-sim kiám-thó lín ê hêng-ûi.

⁸ Tio̍h peh-khì soaⁿ-téng, chhú chi̍t-kóa bo̍k-châi, khí chi̍t keng góa ì-ài ê tiān, hō͘ góa thang hián-sī góa ê êng-kng. Siōng Chú án-ni soan-pò͘.

⁹ “Lín kî-thāi hong-siu, tian-tò siu khah chió; the̍h--tńg-lâi--ê, góa ēng hong kā in chhe-cháu. Siōng Chú — Bān-kun ê Thóng-sòe kóng: Sī-án-chóaⁿ góa beh án-ni chòe? In-ūi góa ê tiān iáu hong-hòe, lín ta̍k-ê lâng kèng-jiân ūi-tio̍h ka-kī ê chhù teh bô-êng.

¹⁰ Só͘-í, thiⁿ bô lo̍h-hō͘, tōe bô chhut thó͘-sán.

¹¹ Góa beh ēng khòng-hān hō͘ thó͘-tōe, soaⁿ-niá, ngó͘-kok, sin-chiú, kaⁿ-ná-iû, tōe ê chhut-sán-bu̍t, jîn-lūi, cheng-siⁿ, í-ki̍p lâng lô-khó͘ tit--tio̍h ê mi̍h-kiāⁿ, lóng siū-tio̍h chai-hāi.”

Jîn-bîn Thiaⁿ-thàn Siōng Chú ê Bēng-lēng

¹² Hit-sî, Sat-la-thiat ê kiáⁿ Só͘-lô-pa-pek kap Iok-sat-ta̍t ê kiáⁿ tōa-chè-si Iâ-su-a, í-ki̍p só͘ chhun ê chú-bîn, lóng ho̍k-chiông Siōng Chú — in ê Siōng-tè ê ōe, chiū-sī Siōng Chú chhe-phài--lâi ê sian-ti Hap-kai ê sìn-sit. Chèng-lâng mā lóng kèng-ùi Siōng Chú.

¹³ Jiân-āu, Siōng Chú ê sù-chiá Hap-kai hōng Siōng Chú chhe-phài, tùi jîn-bîn thoân-ōe kóng, “Siōng Chú kóng, ‘Góa kap lín tông-chāi.’”

¹⁴ Siōng Chú ū kám-tōng Sat-la-thiat ê kiáⁿ Iû-tāi séng-tiúⁿ Só͘-lô-pa-pek, kap Iok-sat-ta̍t ê kiáⁿ tōa-chè-si Iâ-su-a ê sim, koh kám-tōng lóng-chóng só͘ chhun ê lâng ê sim; in lóng lâi tiông-kiàn Siōng Chú — Bān-kun ê Thóng-sòe, in ê Siōng-tè ê sèng-tiān.

¹⁵ In tī Tāi-liû-sū-ông tē-jī nî la̍k-ge̍h jī-cha̍p-sì ji̍t khai-kang.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan