Chim-giân 8 - 現代台語譯本羅馬字版

Chheng-chàn Tì-hūi

¹ Tio̍h thiaⁿ, Tì-hūi teh kiò, chhong-bêng teh chhut-siaⁿ.

² Tì-hūi tī lō͘-piⁿ koân ê só͘-chāi, khiā tī si̍p-jī-lō͘-kháu.

³ Tì-hūi tī siâⁿ-mn̂g-kháu, tī lâng teh chhut-ji̍p ê só͘-chāi tōa-siaⁿ hoah,

⁴ “Chèng-lâng ah, góa kiò lín; sè-kan-lâng ah, góa tùi lín kóng.

⁵ Gōng-ti̍t ê lâng ah, tio̍h ha̍k-si̍p cheng-bêng; gû-gōng ê lâng ah, tio̍h tui-kiû chhong-bêng.

⁶ Tio̍h thiaⁿ, góa beh kóng ke̍k-hó ê sū, beh lūn chèng-ti̍t ê tāi-chì.

⁷ Góa ê chhùi kóng chin-si̍t; góa ê chhùi-tûn iàm-ò͘ⁿ siâ-ok.

⁸ Góa só͘ kóng ê ōe lóng kong-chèng, bô oan-khiau, bô oai-khiok.

⁹ Bêng-lí ê lâng lóng ōe liáu-kái; ū tì-sek ê lâng lóng khòaⁿ-chòe chèng-khak.

¹⁰ Chiap-siū góa ê koán-kàu pí tit-tio̍h gûn khah hó; tit-tio̍h tì-sek pí tit-tio̍h sûn-kim khah hó.

¹¹ In-ūi tì-hūi pí âng-pó-chio̍h khah hó; lâng só͘ ì-ài--ê lóng bōe-tàng kap i pí.

¹² “Góa sī Tì-hūi, hō͘ lâng cheng-bêng, hō͘ lâng ū tì-sek gâu kè-ōe.

¹³ Kèng-ùi Siōng Chú chiū tio̍h iàm-ò͘ⁿ siâ-ok; kiau-ngō͘, chū-tāi, siâ-ok ê hêng-ûi, í-ki̍p oai-khiok sī-hui lóng sī góa só͘ iàm-ò͘ⁿ.

¹⁴ Góa ū chhek-lio̍k kap chin ê tì-sek; góa chhong-bêng, ū lêng-le̍k.

¹⁵ Kun-ông khò góa lâi thóng-tī; thóng-tī-chiá thong-kè góa tēng kong-pêng ê hoat-lu̍t.

¹⁶ Ông-chhin kùi-cho̍k, sè-chiūⁿ ê sím-phòaⁿ-koaⁿ, lóng khò góa lâi chiáng-koân.

¹⁷ Thiàⁿ góa--ê, góa mā thiàⁿ i; khún-chhiat chhē góa--ê, ōe chhē--tio̍h.

¹⁸ Hó-gia̍h kap chun-kùi sī góa só͘ sù; kú-tn̂g ê hù-jū kap hoân-êng mā-sī góa só͘ sù.

¹⁹ Góa hō͘ lâng ê ké-chí pí kim, pí sûn-kim khah hó; góa hō͘ lâng ê siu-sêng pí sûn ê gûn khah hó.

²⁰ Góa kiâⁿ kong-gī ê lō͘, kiâⁿ kong-pêng ê tō-lō͘,

²¹ hō͘ thiàⁿ góa ê lâng tit-tio̍h châi-hù, hō͘ in ê châi-pó móa-móa.

²² “Tī chhòng-chō ê khí-thâu, Siōng Chú seng chō góa; chū-kó͘ í-lâi, góa sī I thâu chi̍t ê chhòng-chō--ê.

²³ Tī siōng khí-thâu, tī chhòng-chō sè-kài í-chêng, tùi ke̍k kó͘-chá, I chō góa.

²⁴ Góa chhut-sì ê sî iáu-bē ū chhim-ian, mā iáu-bē ū hái-iûⁿ.

²⁵ Góa chhut bú-thai ê sî, tōa-soaⁿ iáu-bē siū-chō, sió-soaⁿ mā iáu-bē hêng-sêng.

²⁶ Hit-sî tāi-tōe kap chhân-iá iáu-bē chhòng-chō, liân tōe-chiūⁿ thâu chi̍t pé thô͘-hún mā iáu-bē ū.

²⁷ I an-tì kiong-chhong, tī hái-bīn ōe tōe-pêng-sòaⁿ, hit-sî góa í-keng tī hia.

²⁸ I tī khong-tiong pò͘-tì hûn-chhái, hō͘ chhim-ian ê chúi-chôaⁿ chhèng--chhut-lâi,

²⁹ kā hái tēng kài-hān, hō͘ hái-chúi bōe pôaⁿ kè-kài, kā tāi-tōe hē tōe-ki, hit-sî góa í-keng tī hia.

³⁰ Hit-sî, góa tī I sin-piⁿ chòe sai-hū-thâu, ta̍k-ji̍t hō͘ I hoaⁿ-hí. Góa put-sî tī I bīn-chêng hoaⁿ-hí khoài-lo̍k,

³¹ ì-ài I hō͘ lâng khiā-khí ê sè-kài, hoaⁿ-hí I chhòng-chō ê sè-kan-lâng.

³² “Taⁿ, góa ê kiáⁿ-jî, tio̍h thiaⁿ-thàn góa; chun-hêng góa tō-lō͘ ê lâng chin ū hok-khì!

³³ Tio̍h thiaⁿ kà-sī lâi tit-tio̍h tì-hūi, m̄-thang kū-choa̍t.

³⁴ Thiaⁿ-thàn góa ê lâng chin ū hok-khì! In ta̍k-ji̍t tī góa ê mn̂g-kháu teh tán, tī góa ê mn̂g-piⁿ teh thèng-hāu.

³⁵ Chhē-tio̍h góa ê lâng chiū-sī chhē-tio̍h sìⁿ-miā; i ōe tùi Siōng Chú tit-tio̍h un-hūi.

³⁶ Chhē bô tio̍h góa ê lâng ōe bia̍t-bông; oàn-hūn góa ê lâng ka-kī chhē sí.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan