Bìoball air-loidhne

Chim-giân 7 - 現代台語譯本羅馬字版

¹ Góa ê kiáⁿ ah, tio̍h chun-siú góa ê ōe, sim-lāi khǹg góa ê bēng-lēng.

² Chun-siú góa ê bēng-lēng chiū ōe tit-tio̍h sìⁿ-miā; chun-siú góa ê kà-sī, chhin-chhiūⁿ teh pó-hō͘ ba̍k-chiu-jîn.

³ Tio̍h pa̍k tī lí ê chńg-thâu-á, khek tī lí ê sim-lāi.

⁴ Tio̍h tùi tì-hūi kóng “Lí sī góa ê chí-bē”; tio̍h kiò chhong-bêng chòe lí ê chhin-lâng.

⁵ I ōe pó-hō͘ lí siám-pī îm-hū, siám-pī kóng sai-nai-ōe ê ki-lú.

Kìm-kài Îm-loān

⁶ Góa khiā tī goán tau ê thang-á-piⁿ, tùi thang-á khòaⁿ--chhut-khì;

⁷ góa tī gōng-ti̍t ê siàu-liân-lâng tiong-kan, khòaⁿ-tio̍h chi̍t ê bōe-hiáu siūⁿ ê siàu-liân-ke.

⁸ I keng-kè koe-lō͘, lâi kàu îm-hū in chhù ê hāng-á-kháu, siám ji̍p-khì îm-hū in tau ê lō͘.

⁹ Hông-hun, ji̍t lo̍h, o͘-àm tà-óa;

¹⁰ hit-sî ū chi̍t ê cha-bó͘-lâng, chhēng-chhah chhin-chhiūⁿ ki-lú, sim hoâi khì-tô͘ chhut-lâi chiap i.

¹¹ Chit-ê cha-bó͘-lâng kóng-ōe tōa-sòe-siaⁿ, bô kàu-ióng, chhù tòa bōe tiâu.

¹² Ū-sî tī koe-lō͘, ū-sî tī chhī-tiûⁿ-kháu; ū-sî tī chia thèng-hāu, ū-sî tī hia tng-tán.

¹³ I kā hit-ê siàu-liân-ke khîⁿ-tiâu-tiâu, kā i chim, m̄ kiaⁿ kiàn-siàu tùi i kóng,

¹⁴ “Góa kin-á-ji̍t ū hiàn pêng-an-chè, chhù-lāi ū siā-goān ê bah,

¹⁵ só͘-í góa chhut-lâi chhē lí, chhē chin kú chiah chhē--tio̍h.

¹⁶ Góa í-keng ēng Ai-ki̍p chhái-sek ê chhn̂g-kun, chhu tī góa ê bîn-chhn̂g;

¹⁷ koh ēng bu̍t-io̍h, tîm-hiuⁿ, jio̍k-kùi, hiù tī góa ê bîn-chhn̂g.

¹⁸ Lâi, lán lâi thong-siau hióng-siū chêng-ài kàu boán-chiok, lâi hióng-siū chêng-ài ê khoài-lo̍k.

¹⁹ In-ūi góa ê tiōng-hu bô tī chhù--ni̍h, chhut-gōa khì chin hn̄g ê só͘-chāi.

²⁰ I tòa kui-tē ê chîⁿ, kàu ge̍h îⁿ chiah ōe tò--lâi.”

²¹ Îm-hū ēng chin chōe hoa-giân-kháu-gú kā i ín-iú, ēng sai-nai ê chhùi chhui-pek i chòe-hé ji̍p--khì.

²² I sûi-sî tè i ji̍p--khì, chhin-chhiūⁿ gû hō͘ lâng khan-khì thâi, chhin-chhiūⁿ lo̍k-á poa̍h-lo̍h hām-chíⁿ,

²³ kàu chìⁿ siā-ji̍p i ê koaⁿ; i chhin-chhiūⁿ chiáu-á chông-ji̍p lô-bāng iáu m̄-chai sí-oa̍h.

²⁴ Góa ê kiáⁿ-jî ah, tio̍h thiaⁿ-thàn góa, liû-sim thiaⁿ góa só͘ kóng ê ōe.

²⁵ Lí ê sim m̄-thang hō͘ i bê--khì, m̄-thang gōng-gōng-á tè i khì.

²⁶ In-ūi i hō͘ chin chōe lâng siū-siong tó--lo̍h-khì; chin chōe lâng hō͘ i hāi-sí.

²⁷ I ê chhù sī Im-hú ê ji̍p-kháu, ti̍t-chiap thàng kàu Sí-bông.

The Bible Society in Taiwan

Lean sinn:

Ceanglaichean taic

Sanasan