Chim-giân 6 - 現代台語譯本羅馬字版

Kè-sio̍k Khoàn-kài

¹ Góa ê kiáⁿ ah, lí nā ūi-tio̍h chhù-piⁿ chòe tam-pó, thòe gōa-lâng pó-chèng,

² lí chiū hō͘ ka-kī kóng ê ōe tauh--tio̍h, hō͘ ka-kī tah-èng ê ōe tîⁿ--tio̍h.

³ Góa ê kiáⁿ ah, kì-jiân lí lo̍h tī chhù-piⁿ ê chhiú-thâu, tio̍h án-ni chòe lâi kiù ka-kī: Tio̍h kín khì, khiam-pi khún-kiû lí ê chhù-piⁿ.

⁴ Ba̍k-chiu m̄-thang khùn--khì, ba̍k-chiu-phê m̄-thang khoeh--khì.

⁵ Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú; chhin-chhiūⁿ chiáu thoat-lī lia̍h chiáu ê lâng ê chhiú.

⁶ Pîn-tōaⁿ-lâng ah, khì khòaⁿ káu-hiā, khòaⁿ i ê só͘-chòe thang tit-tio̍h tì-hūi.

⁷ I bô léng-siù, bô thâu-ba̍k, bô koaⁿ-tiúⁿ,

⁸ m̄-kú ōe-hiáu tī joa̍h-thiⁿ chún-pī chia̍h-mi̍h, tī siu-sêng ê sî chek-chū bí-niû.

⁹ Pîn-tōaⁿ-lâng ah, lí beh khùn jōa kú, sím-mi̍h sî chiah khùn ōe chhíⁿ?

¹⁰ Koh khùn chi̍t-kú-á, koh bîn chi̍t-sî-á, koh the chi̍t-ē-á;

¹¹ sàn-chhiah chiū chhin-chhiūⁿ chha̍t lâi; khiàm-kheh chhin-chhiūⁿ kiông-tō kàu.

¹² Lô͘-môa húi-lūi ta̍k só͘-chāi chè-chō sī-hui, sì-kòe kóng-ōe khi-phiàn lâng;

¹³ in sái-ba̍k-bé sī-ì, ēng kha àm-sī, ēng chńg-thâu-á chí-tiám;

¹⁴ in sim-su oai-chhoa̍h, kè-bô͘ pháiⁿ-tāi; sì-kòe sái-lōng, jiá-khí hun-cheng.

¹⁵ Só͘-í chai-hō hut-jiân lîm-kàu; i ōe sûi-sî sit-pāi bia̍t-bông, bōe hù kā kiù.

¹⁶ Ū la̍k hāng sī Siōng Chú só͘ oàn-hūn, liân I ê sim só͘ iàm-ò͘ⁿ--ê ū chhit hāng:

¹⁷ Chiū-sī kiau-ngō͘ ê ba̍k-chiu, kóng pe̍h-chha̍t ê chi̍h, thâi bû-ko͘ ê lâng ê chhiú,

¹⁸ kè-bô͘ pháiⁿ-tāi ê sim, phun-cháu pháiⁿ-lō͘ ê kha,

¹⁹ kóng pe̍h-chha̍t choh gūi-chèng, tī hiaⁿ-tī tiong sái-lōng lâng oan-ke.

Kéng-kài Îm-loān

²⁰ Góa ê kiáⁿ ah, tio̍h chun-siú lāu-pē ê bēng-lēng, m̄-thang khì-sak lāu-bú ê kà-sī;

²¹ tio̍h put-sî kì tī lí ê sim, kòa tī lí ê ām-kún.

²² Lí kiâⁿ-lō͘ ê sî, i ōe ín-chhōa lí; lí khùn ê sî, i ōe khòaⁿ-kò͘ lí; lí khùn-chhíⁿ, i ōe kap lí tâm-lūn.

²³ In-ūi bēng-lēng sī teng, kà-sī sī kng; koán-kàu ê chek-pī ōe chhōa lí kiâⁿ oa̍h-miā ê lō͘,

²⁴ ōe pó-hō͘ lí bô chhin-kūn pháiⁿ-cha-bó͘, bô thiaⁿ ki-lú sai-nai ê ōe.

²⁵ Lí ê sim m̄-thang hō͘ i ê súi bê--khì, m̄-thang in-ūi i sái-ba̍k-bé siū ín-iú.

²⁶ Chhē ki-lú ōe hō͘ lâng sàn kah chhun chi̍t tè piáⁿ; kap pa̍t-lâng ê bó͘ kan-îm ōe sòng-sit pó-kùi ê sìⁿ-miā.

²⁷ Lâng phō hé tī heng-chêng, saⁿ kiám bōe to̍h--khí-lâi?

²⁸ Lâng ta̍h teh to̍h ê hé-thòaⁿ, kha kiám bōe sio--tio̍h?

²⁹ Kap chhù-piⁿ ê bó͘ chòe-hé khùn mā ōe án-ni; kap i hoat-seng koan-hē it-tēng ōe siū hêng-hoa̍t.

³⁰ Chha̍t in-ūi iau thau-the̍h mi̍h chí-ki, lâng bōe kā i khòaⁿ-khin;

³¹ m̄-kú hō͘ lâng lia̍h--tio̍h, tio̍h pê chhit pē, ke-lāi só͘ ū--ê lóng tio̍h the̍h chhut-lâi pê.

³² Kap pa̍t-lâng ê bó͘ thong-kan ê lâng chin bô tì-sek; chòe chit-khoán tāi-chì ōe hāi-tio̍h ka-kī ê sìⁿ-miā.

³³ I ōe siū-tio̍h siong-hāi kap lêng-jio̍k; i ê kiàn-siàu sóe bōe chheng.

³⁴ Tiōng-hu in-ūi oàn-tò͘ khí tōa siū-khì; pò-siû ê sî it-tēng bōe liû-chêng.

³⁵ Ēng chîⁿ sio̍k-chōe, i m̄ ti̍h; lé-mi̍h sàng khah chōe, i mā m̄ pàng lí soah.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan