Chim-giân 4 - 現代台語譯本羅馬字版

Tì-hūi ê Hó-chhù

¹ Góa ê kiáⁿ-jî ah, tio̍h thiaⁿ lāu-pē ê kà-sī; tio̍h choan-sim ha̍k-si̍p chiah ōe bêng-pe̍k.

² In-ūi góa ēng hó ê tō-lí hō͘ lín; m̄-thang pàng-sak góa ê kàu-tō.

³ Góa mā bat chòe goán lāu-pē ê sòe-kiáⁿ, sī goán lāu-bú siōng-thiàⁿ ê ko͘-kiáⁿ.

⁴ Lāu-pē ū kà-sī góa, kóng, “Lí tio̍h kì-tiâu góa ê ōe, chun-siú góa ê bēng-lēng chiū ōe tit-tio̍h sìⁿ-miā.

⁵ Tio̍h chhē-kiû tì-hūi, chhē-kiû chhong-bêng; m̄-thang bōe-kì--tit, m̄-thang pàng-sak góa só͘ kóng ê ōe.

⁶ M̄-thang khì-sak tì-hūi, i ōe pó-hō͘ lí; tio̍h ì-ài tì-hūi, i ōe chiàu-kò͘ lí.

⁷ Tì-hūi siōng tiōng-iàu, tio̍h phah-piàⁿ chhē; tio̍h hù-chhut lí it-chhè só͘ ū--ê lâi tùi-ōaⁿ chhong-bêng.

⁸ Lí chun-tiōng tì-hūi, i ōe ko-kú lí; lí thiàⁿ-sioh i, i ōe hō͘ lí chun-êng.

⁹ Tì-hūi ōe ēng hoa-koan tì tī lí ê thâu-khak, chiong êng-kng ê ông-koan sù hō͘ lí.”

¹⁰ Góa ê kiáⁿ ah, tio̍h thiaⁿ, tio̍h niá-siū góa ê ōe, lí chiū ōe tn̂g-hè-siū.

¹¹ Góa ū chí-sī lí tì-hūi ê lō͘, ín-chhōa lí kiâⁿ chèng-ti̍t ê tō-lō͘.

¹² Lí kiâⁿ ê sî, bōe tú-tio̍h chó͘-gāi; lí cháu, mā bōe tak--tio̍h poa̍h-tó.

¹³ Tio̍h chhî-siú kà-sī, m̄-thang pàng-sang; tio̍h kín-sīn kò͘-siú, in-ūi tì-hūi sī lí ê sìⁿ-miā.

¹⁴ Pháiⁿ-lâng ê lō͘ m̄-thang kiâⁿ; siâ-ok ê lâng ê lō͘ m̄-thang ji̍p.

¹⁵ Tio̍h siám-pī, m̄-thang tùi hia kè; tio̍h oa̍t-cháu, hiòng-chêng kiâⁿ.

¹⁶ Pháiⁿ-lâng nā bô hāi lâng bōe-khùn--tit, nā bô hō͘ lâng poa̍h-tó khùn bōe lo̍h-bîn.

¹⁷ In-ūi in ēng siâ-ok chòe pn̄g chia̍h, ēng kiông-pō chòe chiú lim.

¹⁸ Gī-lâng ê lō͘ chhin-chhiūⁿ thàu-chá ê kng, jú chiò jú kng, chiò kàu tiong-tàu.

¹⁹ Pháiⁿ-lâng ê lō͘ chhin-chhiūⁿ mî--sî o͘-o͘-àm-àm, lâng tak--tio̍h poa̍h-tó mā m̄ chai sī-án-chóaⁿ.

²⁰ Góa ê kiáⁿ ah, tio̍h chù-ì thiaⁿ góa ê kà-sī, àⁿ hī-khang thiaⁿ góa kóng ê ōe.

²¹ Tio̍h put-sî chù-ì, m̄-thang hut-lio̍k; tio̍h kì-tiâu tī sim-lāi.

²² Chhē--tio̍h ê lâng tit-tio̍h sìⁿ-miā, kui seng-khu lóng ióng-kiāⁿ.

²³ Tio̍h chīn-la̍t pó-siú lí ê sim, in-ūi sim sī sìⁿ-miā ê kun-goân.

²⁴ Lí ê chhùi m̄-thang khi-phiàn; lí ê chhùi-tûn m̄-thang oai-khiok sī-hui.

²⁵ Lí ê ba̍k-chiu tio̍h khòaⁿ-ti̍t-ti̍t; tio̍h chù-ba̍k khòaⁿ thâu-chêng.

²⁶ Lí kiâⁿ ê lō͘ tio̍h siu hō͘ pîⁿ; lí ê tō-lō͘ chiū lóng pîⁿ-tháⁿ hó-kiâⁿ.

²⁷ M̄-thang phian-chó-phian-iū; tio̍h hō͘ lí ê kha lī-khui siâ-ok.

The Bible Society in Taiwan

Lean sinn:

Ceanglaichean taic

Sanasan