Chim-giân 31 - 現代台語譯本羅馬字版

Tùi Ông ê Bián-lē

¹ Lī-bō͘-i-le̍k-ông ê lāu-bú kà-sī i ê ōe,

² “Góa ê kiáⁿ, góa chhin-siⁿ ê kiáⁿ, góa hē-goān tit--tio̍h ê kiáⁿ ah, góa tio̍h kā lí kóng sím-mi̍h?

³ M̄-thang tī hū-jîn-lâng sin-chiūⁿ ēng-chīn lí ê cheng-le̍k; húi-hoāi kun-ông ê lō͘ m̄-thang kiâⁿ.

⁴ Lī-bō͘-i-le̍k ah, choh-ông--ê m̄-thang lim-chiú, chhian-bān m̄-thang; ông-chhin hò͘ⁿ kāu-chiú mā m̄ eng-kai,

⁵ chiah bián lim--lo̍h-khì soah bōe-kì-tit hoat-lēng, hut-lio̍k khùn-khó͘-lâng ê koân-ek.

⁶ Kāu-chiú tio̍h hō͘ teh-beh sí ê lâng, po̍h-chiú hō͘ sim kan-khó͘ ê lâng;

⁷ hō͘ i lim-liáu bōe-kì-tit ka-kī ê sàn-chhiah, bōe-kì-tit i ê kan-khó͘.

⁸ Tio̍h ūi-tio̍h bōe kóng-ōe ê lâng hoat-giân, ūi-tio̍h só͘-ū bô i-óa ê lâng sin-oan.

⁹ Tio̍h khui-chhùi chiàu kong-gī phòaⁿ-toàn, ūi-tio̍h khùn-khó͘ sàn-chhiah ê lâng sin-oan.”

Châi-tek ê Hū-jîn-lâng

¹⁰ Ū châi-tek ê hū-jîn-lâng siáⁿ-lâng chhē ōe tio̍h? I ê kè-ta̍t tōa-tōa chhiau-kè chu-pó.

¹¹ I ê tiōng-hu sìn-nāi i, sím-mi̍h lóng bô khiàm-kheh.

¹² I chi̍t-sì-lâng hō͘ tiōng-hu ū lī-ek bô sún-hāi.

¹³ I chhē iûⁿ-mn̂g kap iù-môa, kam-sim chhin-chhiú chòe kang.

¹⁴ I chhin-chhiūⁿ siong-chûn, tùi chin hn̄g ê só͘-chāi ūn bí-niû lâi.

¹⁵ Thiⁿ bē kng, i chiū khí--lâi, chún-pī chia̍h-mi̍h hō͘ ke-lāi ê lâng, chiong eng-kai chòe ê khang-khè hun-phài hō͘ lú-pī.

¹⁶ I chhē-tio̍h kah-ì ê thó͘-tōe chiū bóe--khí-lâi, ēng i ê chhiú só͘ thàn--ê chai-chèng phû-tô-hn̂g.

¹⁷ I chhēng-saⁿ pih-chah, chún-pī hó-sè, chhiú-kut giám-ngī thang chhut-la̍t kang-chok.

¹⁸ I chai só͘ keng-êng--ê sūn-lī ū lī-ek; i ê teng kui-mî tiám-kng-kng.

¹⁹ I ê chhiú the̍h a̍k-á; i ê chhiú-sim hōaⁿ pháng-chhia.

²⁰ I khóng-khài chín-chè khùn-khó͘-lâng, chhun-chhiú pang-chān sàn-chhiah-lâng.

²¹ I bián ūi-tio̍h lo̍h-seh ūi ke-lāi ê lâng hoân-ló, in-ūi choân-ke lóng ū kāu-saⁿ thang chhēng.

²² I ūi ka-kī chòe súi ê thán-á; i só͘ chhēng--ê chiū-sī iù-môa-pò͘ kap chí-sek-pò͘ chòe ê saⁿ.

²³ I ê tiōng-hu tī siâⁿ-mn̂g-kháu lâng-lâng lóng bat, in-ūi i kap pún-tōe ê tiúⁿ-ló chòe-hé chē.

²⁴ I chòe iù-môa-pò͘ ê saⁿ khì bōe, koh bōe io-tòa hō͘ seng-lí-lâng.

²⁵ I ēng khùi-la̍t kap ui-gî chòe saⁿ chhēng; i siūⁿ-tio̍h chiong-lâi ê kéng-hóng chiū chhiò-bî-bî.

²⁶ I khui-chhùi kóng tì-hūi ê ōe; i ê chi̍h ū jîn-chû ê kà-sī.

²⁷ I gâu liāu-lí ke-lāi ê sū, bô chia̍h êng-pn̄g.

²⁸ I ê kiáⁿ-jî khùn-chhíⁿ khí--lâi chiū kā i chiok-hok; i ê tiōng-hu mā chheng-chàn i, kóng,

²⁹ “Hū-jîn-lâng hó tek-hēng--ê chin chōe, m̄-kú lí siōng hó.”

³⁰ Gōa-piáu hó-khòaⁿ sī hu-ké, súi mā-sī khang-khang, m̄-kú kèng-ùi Siōng Chú ê hū-jîn-lâng ōe tit-tio̍h o-ló.

³¹ I ê chhiú só͘ chòe ê sêng-kó tio̍h kā i khéng-tēng; i só͘ chòe--ê eng-kai tī kong-chiòng bīn-chêng tit-tio̍h chheng-chàn.

The Bible Society in Taiwan

Lean sinn:

Ceanglaichean taic

Sanasan