Chim-giân 30 - 現代台語譯本羅馬字版

¹ Ē-bīn sī Ngá-ki ê kiáⁿ A-kó͘-ní kà-sī ê ōe, i tùi Í-thiat kap O͘-kah án-ni kóng,

² “Góa sī chèng-lâng tiong siōng gû-gōng--ê, liân it-poaⁿ-lâng ê tì-sek to bô.

³ Góa bô o̍h-tio̍h tì-hūi, mā bô Chì-sèng ê Siōng-tè ê tì-sek.

⁴ Siáⁿ-lâng bat chiūⁿ-thiⁿ koh lo̍h--lâi? Siáⁿ-lâng bat ēng chhiú la̍k-tio̍h hong? Siáⁿ-lâng bat ēng saⁿ pau chúi? Siáⁿ-lâng bat kài-tēng tōe ê ke̍k-thâu? I ê miâ kiò sím-mi̍h, I kiáⁿ ê miâ kiò sím-mi̍h, lí chai--bô?

⁵ Siōng-tè ê ōe ta̍k-kù lóng keng-kè thoàn-liān; só͘-ū óa-khò I ê lâng, I chòe in ê tún-pâi.

⁶ I ê ōe, lí m̄-thang ke-thiⁿ, chiah bián siū chek-pī, phòaⁿ-chòe kóng pe̍h-chha̍t.

⁷ “Góa tùi lí kiû nn̄g hāng tāi-chì; tī góa sí í-chêng m̄-thang bô hō͘ góa.

⁸ Kiû lí hō͘ hu-ké kap pe̍h-chha̍t lī-khui góa hn̄g-hn̄g; kiû lí hō͘ góa bô sàn-chhiah mā bô hó-gia̍h, sù góa su-iàu ê bí-niû,

⁹ chiah bián góa pá-chiok m̄ jīn lí, kóng Siōng Chú sī siáⁿ-lâng; chiah bián góa sàn-chhiah soah thau-the̍h, tì-kàu siat-to̍k góa ê Siōng-tè ê miâ.

¹⁰ “M̄-thang tùi chú-lâng kóng i lô͘-po̍k ê pháiⁿ-ōe, chiah bián i kā lí chiù-chó͘, lí soah siū chek-hoa̍t.

¹¹ “Ū chi̍t-kóa lâng chiù-chó͘ in ê lāu-pē, mā bô kā lāu-bú chiok-hok.

¹² Ū chi̍t-kóa lâng khòaⁿ ka-kī chòe chheng-khì, m̄-kú bô sóe-tû ka-kī ê ù-òe.

¹³ Ū chi̍t-kóa lâng ba̍k-thâu-koân, ba̍k-sîn kiau-ngō͘.

¹⁴ Ū chi̍t-kóa lâng ê gê chhin-chhiūⁿ kiàm, khí chhin-chhiūⁿ to, beh thun-chia̍h tōe-chiūⁿ ê khùn-khó͘-lâng kap sè-kan ê sàn-chhiah-lâng.

¹⁵ “Gô͘-khî ū nn̄g ê cha-bó͘-kiáⁿ put-sî hoah kóng, ‘Hō͘ góa, hō͘ góa.’ Bōe ti-chiok--ê ū saⁿ hāng, liân bōe kóng ‘Kàu-gia̍h lah’ ū sì hāng:

¹⁶ Im-hú, bōe hoâi-īn ê thai, khah chōe chúi mā bô-kàu ê tōe, kap bōe kóng ‘Kàu-gia̍h’ ê hé.

¹⁷ Thí-chhiò lāu-pē, biáu-sī, m̄ thiaⁿ-thàn lāu-bú, chit-khoán lâng ê ba̍k-chiu ōe hō͘ soaⁿ-kok tiong ê o͘-a tok--khì, ōe hō͘ eng-chiáu ê kiáⁿ chia̍h--khì.

¹⁸ “Góa siūⁿ bōe chhut ê kî-biāu ū saⁿ hāng, liân góa m̄ bat--ê ū sì hāng:

¹⁹ Eng-chiáu tī khong-tiong ê lō͘, chôa tī chio̍h-pôaⁿ téng ê lō͘, chûn tī hái-tiong ê lō͘, lâm lú kau-ha̍p ê lō͘.

²⁰ Îm-hū ê lō͘ mā oh liáu-kái: I chia̍h-liáu chiū chhit-chhùi, kóng ‘Góa bô chòe pháiⁿ’.

²¹ “Hō͘ tāi-tōe iô-tāng--ê ū saⁿ hāng, liân tam-tng bōe khí--ê ū sì hāng:

²² Lô͘-po̍k chòe ông, gōng-lâng tiùⁿ kàu pá,

²³ bô lâng-iân ê lú-chú chhut-kè, lú-pī chhú-tāi lú-chú-lâng.

²⁴ “Tōe-chiūⁿ ū sì hāng bî-sòe ê tōng-bu̍t, m̄-kú ke̍k ū tì-sek:

²⁵ Káu-hiā sui-jiân jio̍k-siáu, m̄-kú ōe-hiáu tī joa̍h-thiⁿ chún-pī chia̍h-mi̍h;

²⁶ chio̍h-hoan sui-jiân bô ióng-chòng, m̄-kú ōe-hiáu tī chio̍h-phāng choh-siū;

²⁷ chháu-meh sui-jiân bô ông, m̄-kú ōe-hiáu cho͘-tūi chhut--khì;

²⁸ siān-lâng-á sui-jiân lâng ēng chhiú lia̍h ōe tio̍h, m̄-kú tiàm tī ông-kiong.

²⁹ “Kiâⁿ-lō͘ ui-hong--ê ū saⁿ hāng, liân kha-pō͘ ui-hong--ê ū sì hāng:

³⁰ Sai, iá-siù tiong tē-it béng--ê, tú-tio̍h sím-mi̍h to bōe siám-pī;

³¹ la̍h-káu, soaⁿ-iûⁿ-káng, í-ki̍p ū kun-peng pó-hō͘ ê kun-ông.

³² “Lí nā chū-ko chū-tāi khám-khám-á chòe, á-sī kè-bô͘ pháiⁿ-tāi, tio̍h ēng chhiú ng chhùi.

³³ Ká gû-lin ōe chhut lin-iû, phah-tio̍h phīⁿ ōe lâu-huih; chhin-chhiūⁿ án-ni, tōa siū-khì ōe khí saⁿ-chiⁿ.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan