Chim-giân 29 - 現代台語譯本羅馬字版

¹ Lâng siū chek-hoa̍t iáu m̄-khéng hóe-kái, ōe hut-jiân sit-pāi bia̍t-bông, bōe hù kā kiù.

² Gī-lâng chip-chèng, jîn-bîn hoaⁿ-hí; pháiⁿ-lâng chiáng-koân, jîn-bîn thó͘-khùi.

³ Ì-ài tì-hūi, pē-bú hoaⁿ-hí; kiat-kau ki-lú, kheng-ka-tōng-sán.

⁴ Ông si-hêng kong-gī, kok chiū ún-kò͘; kiông siu hóe-lō͘, kok chiū bia̍t-bông.

⁵ Phô͘-tháⁿ chhù-piⁿ, sī teh siat lô-bāng tîⁿ ka-kī ê kha.

⁶ Pháiⁿ-lâng ōe hō͘ ka-kī ê chōe tîⁿ--tio̍h; m̄-kú gī-lâng ū hoan-ho͘ ū khoài-lo̍k.

⁷ Gī-lâng koan-sim sàn-chhiah-lâng ê àn-chêng; pháiⁿ-lâng lóng bô koan-sim.

⁸ Chū-ko chū-tāi ê lâng kā siâⁿ chè-chō hūn-loān, m̄-kú ū tì-hūi ê lâng ōe hō͘ siū-khì soah.

⁹ Tì-hūi ê lâng kap gōng-lâng sio-kò, gōng-lâng chí-ū siū-khì á-sī thí-chhiò, lóng bōe kái-koat.

¹⁰ Ài thâi-lâng--ê oàn-hūn sûn-choân ê lâng, m̄-kú chèng-ti̍t ê lâng pó-hō͘ i ê sìⁿ-miā.

¹¹ Gōng-lâng ū siū-khì chiū lóng piàⁿ-chhut, m̄-kú ū tì-hūi ê lâng ōe-hiáu khòng-chè siū-khì.

¹² Thóng-tī-chiá nā beh thiaⁿ pe̍h-chha̍t-ōe, koaⁿ-oân lóng ōe pìⁿ-chòe pháiⁿ.

¹³ Sàn-chhiah-lâng kap ap-pek-chiá ū kiōng-tông ê só͘-chāi: Siōng Chú lóng hō͘ in ê ba̍k-chiu kim, ōe khòaⁿ--kìⁿ.

¹⁴ Ông nā chiàu kong-chèng phòaⁿ-toàn khùn-khó͘-lâng, i ê ông-ūi ōe éng-oán kian-kò͘.

¹⁵ Koán-kàu kap chek-tok ōe ke-thiⁿ tì-hūi; bô koán-kàu ê gín-á ōe hō͘ lāu-bú kiàn-siàu.

¹⁶ Pháiⁿ-lâng chiáng-koân, chōe-kò chiū ke-thiⁿ; gī-lâng ōe khòaⁿ-tio̍h in sit-pāi.

¹⁷ Koán-kàu lí ê kiáⁿ, i ōe hō͘ lí an-sim, koh ōe hō͘ lí ê sim hoaⁿ-hí.

¹⁸ Bô Siōng-tè ê chí-sī, jîn-bîn chiū hòng-chhiòng, m̄-kú chun-siú lu̍t-hoat ê lâng chin ū hok-khì!

¹⁹ Kan-ta ēng ōe, lô͘-po̍k bōe siū koán-kàu; i bêng-pe̍k mā bōe thiaⁿ-thàn.

²⁰ Lí bat khòaⁿ-tio̍h sûi-piān kóng-ōe ê lâng--bô? Liân gōng-lâng to pí i khah ū ǹg-bāng.

²¹ Lô͘-po̍k nā tùi sòe-hàn chiū kā i sēng, chit-ê lô͘-po̍k kàu-bé ōe chhiúⁿ-toa̍t chú-lâng ê châi-sán.

²² Pháiⁿ sèng-tē ê lâng ōe jiá-khí oan-ke; gâu hoat siū-khì ê lâng ōe hoān chin chōe chōe-kò.

²³ Lâng kiau-ngō͘ ōe hō͘ ka-kī kiàn-siàu; sim khiam-pi ōe hō͘ ka-kī tit-tio̍h chun-êng.

²⁴ Kap chha̍t pun thau--lâi ê mi̍h sī bô ài ka-kī ê sìⁿ-miā; i sui-jiân chiù-chōa choh-chèng mā bōe kóng si̍t-ōe.

²⁵ Kiaⁿ lâng bô kiaⁿ Siōng-tè sī kā ka-kī siat lô-bāng, m̄-kú sìn-khò Siōng Chú chiū ū an-ún.

²⁶ Chin chōe lâng ài tùi thóng-tī-chiá kiû-chêng, m̄-kú chí-ū tùi Siōng Chú chiah ōe tit-tio̍h kong-chèng ê phòaⁿ-koat.

²⁷ Bô kong-tō ê lâng, gī-lâng iàm-ò͘ⁿ; hêng-ûi chèng-ti̍t ê lâng, pháiⁿ-lâng iàm-ò͘ⁿ.

The Bible Society in Taiwan

Lean sinn:

Ceanglaichean taic

Sanasan