Bìoball air-loidhne

Chim-giân 28 - 現代台語譯本羅馬字版

¹ Pháiⁿ-lâng bô lâng tui-jip mā teh tô-cháu; hó-lâng chhin-chhiūⁿ sai lóng bōe kiaⁿ.

² Kok-ka tōng-loān, thóng-tī-chiá chiū chia̍p-chia̍p ōaⁿ; ū bêng-lí kap tì-sek ê léng-siù, kok-ka chiū kú-tn̂g an-tēng.

³ Sàn-chhiah-lâng khi-ap khùn-khó͘-lâng, chhin-chhiūⁿ lo̍h tōa-hō͘ kā ngó͘-kok chhiong-tiāu.

⁴ Khì-sak lu̍t-hoat--ê o-ló pháiⁿ-lâng, m̄-kú chun-siú lu̍t-hoat--ê hoán-tùi pháiⁿ-lâng.

⁵ Siâ-ok ê lâng bô bêng-pe̍k kong-gī; chhē-kiû Siōng Chú ê lâng oân-choân bêng-pe̍k.

⁶ Hêng-ûi chèng-ti̍t ê sàn-chhiah-lâng khah iâⁿ chòe tāi-chì oan-khiau ê hó-gia̍h-lâng.

⁷ Kín-sīn siú lu̍t-hoat--ê, sī tì-hūi ê kiáⁿ; kap tham-chia̍h--ê choh-phōaⁿ, hō͘ pē-bú kiàn-siàu.

⁸ Lâng khò pàng tāng-lī hoat-châi, sī teh kā lîn-bín sàn-chhiah-lâng--ê chek-chū châi-hù.

⁹ Hī-khang oa̍t-cháu m̄ thiaⁿ lu̍t-hoat ê lâng, i ê kî-tó Siōng-tè iàm-ò͘ⁿ.

¹⁰ Bê-he̍k chèng-ti̍t-lâng kiâⁿ pháiⁿ-lō͘, ōe poa̍h lo̍h-khì ka-kī ó͘ ê hām-khiⁿ, m̄-kú sûn-choân ê lâng ōe sêng-chiap hó ê sán-gia̍p.

¹¹ Hó-gia̍h-lâng khòaⁿ ka-kī chòe ū tì-hūi, m̄-kú i ū kúi niú tāng, chhong-bêng ê sàn-chhiah-lâng khòaⁿ kah chin chheng-chhó.

¹² Gī-lâng sèng-lī, lâng-lâng khèng-chiok; pháiⁿ-lâng tek-chì, lâng-lâng siám-bih.

¹³ Jia-khàm ka-kī ê chōe-kò, it-tēng bōe heng-thong; jīn-chōe hóe-kái, it-tēng tit-tio̍h lîn-bín.

¹⁴ Put-sî kèng-ùi Siōng-tè ê lâng chin ū hok-khì! Ngī-sim ê lâng ōe tú-tio̍h chai-hō.

¹⁵ Tú chhin-chhiūⁿ hm̄-hm̄-háu ê sai kap chhē-chia̍h ê hîm, siâ-ok ê thóng-tī-chiá mā án-ni teh koán-hat sàn-chhiah ê jîn-bîn.

¹⁶ Bû-ti ê thóng-tī-chiá si-hêng pō-chèng; iàm-ò͘ⁿ put-gī-chi-châi ê lâng ōe tn̂g-hè-siū.

¹⁷ Thâi-sí-lâng--ê tio̍h hō͘ i it-seng chòe tô-hoān, m̄-thang kiù i.

¹⁸ Chòe tāi-chì chèng-ti̍t ê lâng ōe an-choân; chòe tāi-chì oan-khiau ê lâng ōe hut-jiân poa̍h-tó sit-pāi.

¹⁹ Chèng-choh ê lâng ū kàu-gia̍h ê bí-niû; tui-kiû khang-khang bô kè-ta̍t ê sū ōe tì-kàu sàn-chhiah.

²⁰ Ū sìn-iōng ê lâng ōe tit-tio̍h chin chōe hok-khì; beh hoat hoâiⁿ-châi ê lâng it-tēng siū hêng-hoa̍t.

²¹ Khòaⁿ lâng tōa-sòe-ba̍k, m̄-tio̍h, m̄-kú lâng ōe ūi-tio̍h chi̍t-tè-á piáⁿ hoān-hoat.

²² Tàng-sng ê lâng siūⁿ-beh kín hoat-châi, bô siūⁿ-kóng sàn-chhiah teh thèng-hāu i.

²³ Kā lâng chek-pī, kàu-bé pí kā lâng phô͘-tháⁿ khah ōe tit-tio̍h lâng hoaⁿ-hí chiap-la̍p.

²⁴ Thau-the̍h pē-bú ê mi̍h, koh kóng “Che bô sǹg ū-chōe”, chit-khoán lâng kap kiông-tō siâng-lūi.

²⁵ Tham-sim ōe ín-khí saⁿ-chiⁿ; óa-khò Siōng Chú ōe tit-tio̍h hong-sēng.

²⁶ Siūⁿ-kóng ka-kī sī chhong-bêng--ê sī gōng-lâng; chiàu tì-hūi chòe tāi-chì ê lâng ōe an-choân.

²⁷ Chín-chè sàn-chhiah-lâng bōe tì-kàu khiàm-kheh; ké bô khòaⁿ--kìⁿ ōe siū chin chōe chiù-chó͘.

²⁸ Pháiⁿ-lâng tek-chì, lâng-lâng cháu-khì bih; in nā bia̍t-bông, gī-lâng chiū ke-thiⁿ chin chōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan