Bìoball air-loidhne

Chim-giân 27 - 現代台語譯本羅馬字版

¹ M̄-thang ūi-tio̍h bîn-á-chài beh chòe ê sū khoa-kháu, in-ūi bîn-á-chài ōe hoat-seng sím-mi̍h tāi-chì lí m̄ chai.

² Tio̍h hō͘ pa̍t-lâng o-ló, m̄-thang ka-kī po; tio̍h hō͘ gōa-lâng chheng-chàn lí, m̄-thang ka-kī khoa-kháu.

³ Chio̍h-thâu tāng, soa mā tāng; gōng-lâng jiá-khí ê hō-toan pí chit nn̄g hāng koh-khah giâm-tiōng.

⁴ Siū-khì iáu ōe-tàng tng, tōa siū-khì oh tam-tng, oàn-tò͘, siáⁿ-lâng tòng ōe tiâu?

⁵ Tng-bīn ê chek-pī, iâⁿ-kè bô piáu-bêng ê thiàⁿ.

⁶ Pêng-iú chō-sêng ê siong sī chhut tī hó-ì; tùi-te̍k ê chim-chhùi sī hu-ké.

⁷ Lâng chia̍h pá, liân bi̍t to thó-ià; pak-tó͘ iau, liân khó͘ ê mi̍h to hó-chia̍h.

⁸ Lâng lī-khui pún só͘-chāi khì liû-lōng, chhin-chhiūⁿ chiáu-á lī-khui siū sì-kòe pe.

⁹ Phang-iû kap hiuⁿ-liāu hō͘ lâng ê sim hoaⁿ-hí; pêng-iú chin-sêng ê khoàn-bián hō͘ sim tit-tio̍h kó͘-lē.

¹⁰ Lí ê pêng-iú kap lāu-pē ê pêng-iú lóng m̄-thang pàng-sak; tú-tio̍h hoān-lān ê ji̍t m̄-thang khì hiaⁿ-tī ê ke; kūn ê chhù-piⁿ iâⁿ-kè hn̄g ê hiaⁿ-tī.

¹¹ Góa ê kiáⁿ ah, tio̍h ū tì-hūi, hō͘ góa ê sim hoaⁿ-hí, hō͘ góa thang hoán-pok thí-chhiò góa ê lâng.

¹² Ōe piàn-khiàu ê lâng khòaⁿ-tio̍h gûi-hiám chiū siám-pī; gōng-ti̍t ê lâng chìn-chêng khì, siū chai-hāi.

¹³ Kā siⁿ-hūn-lâng tam-pó, tio̍h the̍h ka-kī ê saⁿ khì chòe tí-ah; thòe gōa-lâng pó-chèng tio̍h ka-kī sêng-tam hō͘-kó.

¹⁴ Thàu-chá kā pêng-iú chhá-chhíⁿ, chiok-hok mā pìⁿ-chòe chiù-chó͘.

¹⁵ Chháu-nāu ê bó͘ chhin-chhiūⁿ lo̍h-hō͘-thiⁿ chha̍p-chha̍p-tih;

¹⁶ beh kā i tòng, chhin-chhiūⁿ teh tòng hong tòng bōe tiâu, chhin-chhiūⁿ chhiú la̍k iû la̍k bōe tiâu.

¹⁷ Pêng-iú hō͘-siōng kek-lē, chhin-chhiūⁿ thih bôa thih, jú bôa jú lāi.

¹⁸ Koán-lí bû-hoa-kó-chhiū--ê, thang chia̍h i ê ké-chí; chiàu-kò͘ chú-lâng--ê, ōe tit-tio̍h chun-êng.

¹⁹ Lâng tùi chúi chiò-chhut ka-kī ê bīn; lâng tùi sim khòaⁿ-chhut ka-kī ê chin-siōng.

²⁰ Im-hú kap Bia̍t-bông lóng thūn bōe móa; lâng ê io̍k-bōng mā éng-oán bōe boán-chiok.

²¹ Liān gûn ēng tiáⁿ, liān kim ēng lô͘; lâng tùi chheng-chàn siū khó-giām.

²² Gōng-lâng án-chóaⁿ kà to kà bōe khiáu.

²³ Tio̍h siông-sè chai lí iûⁿ-kûn ê chōng-hóng, liû-sim chiàu-kò͘ lí ê gû-kûn;

²⁴ in-ūi chîⁿ-châi bōe éng-oán lâu--teh, ông-ūi mā bōe sòa kàu bān-tāi.

²⁵ Chháu koah--khí-lâi, sin-íⁿ puh--chhut-lâi, soaⁿ-téng ê bo̍k-chháu mā siu--khí-lâi,

²⁶ mî-iûⁿ ê mn̂g chiū thang chián khí-lâi chòe saⁿ, soaⁿ-iûⁿ-káng thang bōe lâi bóe chhân-hn̂g,

²⁷ soaⁿ-iûⁿ-bú ê lin hō͘ lí kap ke-lāi ê lâng kàu-gia̍h thang chia̍h, koh thang iúⁿ-chhī lú-pī.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan