Bìoball air-loidhne

Chim-giân 26 - 現代台語譯本羅馬字版

¹ Chhin-chhiūⁿ joa̍h-thiⁿ lo̍h-seh, siu-koah ê sî lo̍h-hō͘, gōng-lâng tit-tio̍h chun-êng, bô ha̍p-gî.

² Chhin-chhiūⁿ chhek-chiáu-á pe-khí-pe-lo̍h, ìⁿ-á pe-lâi-pe-khì, bô-lí-bô-iû ê chiù-chó͘ bōe hoat-seng chok-iōng.

³ Tùi bé tio̍h ēng piⁿ, tùi lû tio̍h ēng kā-kiuⁿ; gōng-lâng ê ka-chiah tio̍h ēng tîn-tiâu.

⁴ M̄-thang chiàu gōng-lâng ê gōng-ōe ìn i, chiah bián lí kap i kâng-khoán.

⁵ Tio̍h chiàu gōng-lâng ê gōng-ōe ìn i, chiah bián i khòaⁿ ka-kī chòe ū tì-sek.

⁶ Thok gōng-lâng thoân-ta̍t siau-sit, chhin-chhiūⁿ chām-tn̄g ka-kī ê kha, siong-hāi ka-kī.

⁷ Chim-giân tī gōng-lâng ê chhùi, chhin-chhiūⁿ khê--khì ê kha bô chok-iōng.

⁸ Chiong chun-êng hō͘ gōng-lâng, chhin-chhiūⁿ ēng pó-chio̍h chòe chio̍h-thâu khǹg tī hìⁿ-soh hìⁿ.

⁹ Gōng-lâng ê chhùi kóng chim-giân, chhin-chhiūⁿ chùi-hàn gia̍h ū chhì ê chhiū-ki loān sut.

¹⁰ Chhiàⁿ gōng-lâng á-sī chùi-hàn chòe tāi-chì, chhin-chhiūⁿ chìⁿ loān siā siong-tio̍h lâng.

¹¹ Gōng-lâng it-chài chòe gû-gōng ê sū, chhin-chhiūⁿ káu oa̍t tńg-lâi chia̍h ka-kī thò͘--chhut-lâi ê mi̍h.

¹² Lí bat khòaⁿ-tio̍h siūⁿ-kóng ka-kī sī chhong-bêng ê lâng bô? Liân gōng-lâng to pí i khah ū ǹg-bāng.

¹³ Pîn-tōaⁿ ê lâng kóng, “Lō͘--ni̍h ū sai, koe-lō͘--ni̍h ū béng-sai.”

¹⁴ Pîn-tōaⁿ-lâng tī bîn-chhn̂g kō-lâi-kō-khì, chhin-chhiūⁿ mn̂g khui-lâi-khui-khì.

¹⁵ Pîn-tōaⁿ ê lâng chhiú chhun kàu pôaⁿ--ni̍h, the̍h kàu chhùi mā hiâm hùi-khì.

¹⁶ Pîn-tōaⁿ-lâng khòaⁿ ka-kī chin khiáu, iâⁿ-kè chhit ê gâu ìn-tap ê lâng.

¹⁷ Kè-lō͘-lâng khì chhap kap i bô koan-hē ê kiù-hun, chhin-chhiūⁿ lâng khì khiú káu-á ê hī-á.

^18-19 Lâng khi-phiàn chhù-piⁿ, kóng, “Góa sī teh kún-chhiò”, sī chhin-chhiūⁿ siáu-lâng hiat hé-pé, lāi-chìⁿ, kap bú-khì hō͘ lâng sí.

²⁰ Hé bô chhâ chiū hoa--khì; bô lâng o̍h-ōe, saⁿ-chiⁿ chiū soah--khì.

²¹ Ài saⁿ-chiⁿ ê lâng siàn-tōng hun-cheng, chhin-chhiūⁿ thòaⁿ-siōng-ka-thòaⁿ, hé-siōng-thiam-chhâ.

²² Hī-khang piⁿ ê êng-á-ōe chhin-chhiūⁿ hó-chia̍h-mi̍h, chi̍t-ē ji̍p-chhùi chiū thun-lo̍h pak.

²³ Chhùi tiⁿ, sim kan-ok, chhin-chhiūⁿ hûi-khì chhat chho͘-gûn.

²⁴ Ké-hó ê lâng kóng hó-thiaⁿ-ōe, sim-lāi khiok chûn khúi-chà.

²⁵ I kóng hó-thiaⁿ-ōe, lí m̄-thang sìn, in-ūi i sim-lāi ū chhit hāng thang iàm-ò͘ⁿ.

²⁶ I sui-jiân ēng khúi-chà am-khàm ka-kī ê oàn-hūn, i ê siâ-ok ōe lō͘-hiān tī kong-chiòng bīn-chêng.

²⁷ Ku̍t hām-chíⁿ ê lâng, ka-kī ōe poa̍h-lo̍h hit lāi-bīn; kō chio̍h-thâu ê lâng, chio̍h-thâu ōe kō tò-tńg-lâi teh-tio̍h ka-kī.

²⁸ Pe̍h-chha̍t ê chi̍h ōe siong-hāi lâng; phô͘-tháⁿ ê chhùi ōe húi-bia̍t lâng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan