Bìoball air-loidhne

Chim-giân 25 - 現代台語譯本羅馬字版

¹ Ē-bīn mā-sī Só͘-lô-bûn ê chim-giân, sī Iû-tāi-ông Hi-se-ka kiong-têng ê lâng chhau-siá--ê.

² Lâng chun-chông Siōng-tè, in-ūi I chiong tāi-chì khàm-ba̍t; lâng chun-kèng kun-ông, in-ūi i chiong tāi-chì chhâ-bêng.

³ Chhin-chhiūⁿ thiⁿ hiah-ni̍h koân, tōe hiah-ni̍h chhim, ông ê sim, lâng oh-tit liáu-kái.

⁴ Gûn ê che-tái seng tû--khì, gûn-chhiūⁿ chiah ōe-tàng chòe-chhut súi ê khì-khū;

⁵ ông sin-piⁿ ê pháiⁿ-lâng seng tû--khì, ông-ūi chiah ōe-tàng ēng kong-gī chòe ki-chhó͘ kiàn-li̍p.

⁶ M̄-thang tī ông ê bīn-chêng chū-ko chū-tāi, mā m̄-thang chiàm tōa-ūi.

⁷ Lêng-khó tán lâng chhiáⁿ lí chē tōa-ūi, m̄-thang tī ū tōe-ūi ê lâng bīn-chêng hō͘ lâng kiò lí lo̍h--khì.

⁸ M̄-thang chhong-pōng beh kap lâng sio-kò, chiah bián kàu-bé siū chhù-piⁿ lêng-jio̍k ê sî m̄ chai beh án-chóaⁿ chòe.

⁹ Lí kap chhù-piⁿ ū kiù-hun, m̄-thang lāu-sia̍p pa̍t-lâng ê pì-bi̍t,

¹⁰ chiah bián thiaⁿ--kìⁿ ê lâng chek-pī lí, lí ê chhàu-miâ oh-tit sóe-chheng.

¹¹ Kóng-ōe ha̍p-gî, chhin-chhiūⁿ kim phōng-kó siuⁿ tī gûn-pôaⁿ.

¹² Tì-hūi ê lâng ê chek-pī, tùi hoaⁿ-hí thiaⁿ-siū ê lâng chhin-chhiūⁿ kim ê hī-kau kap sûn-kim ê phoa̍h-liān.

¹³ Khó-khò ê sù-chiá hō͘ chhe i ê chú-lâng cheng-sîn khin-sang, chhin-chhiūⁿ joa̍h-thiⁿ siu-koah ê sî ū sng-seh ê liâng-léng.

¹⁴ Bô sàng lé-mi̍h, kan-ta khoa-kháu lé-mi̍h jōa hó, chhin-chhiūⁿ ū hong ū hûn, bô lo̍h-hō͘.

¹⁵ Kú-tn̂g jím-nāi, koân-le̍k-chiá mā ōe siū kám-tōng; un-jiû ê chhùi-chi̍h ōe kòng-tn̄g kut-thâu.

¹⁶ Lí nā chhē-tio̍h bi̍t, chia̍h kàu-gia̍h chiū hó, chiah bián chia̍h kè-thâu soah thò͘--chhut-lâi.

¹⁷ M̄-thang chia̍p-chia̍p khì chhē chhù-piⁿ, chiah bián i khí-hoân soah iàm-ò͘ⁿ lí.

¹⁸ Choh gūi-chèng hām-hāi chhù-piⁿ ê lâng, chhin-chhiūⁿ thûi, to, kap lāi-chìⁿ ōe siong-hāi lâng.

¹⁹ Hoān-lān ê sî sìn-nāi khò-put-chū ê lâng, chhin-chhiūⁿ chhùi-khí tn̄g--khì, kha thu̍t-lûn.

²⁰ Tùi siong-sim ê lâng chhiùⁿ-koa, chhin-chhiūⁿ tang-thiⁿ kā i thǹg gōa-saⁿ, chhin-chhiūⁿ iâm iā tī khang-chhùi.

²¹ Lí ê tùi-te̍k nā iau, tio̍h hō͘ i chia̍h, chhùi-ta, tio̍h hō͘ i lim;

²² in-ūi lí án-ni chòe, ná-chún chiong teh to̍h ê hé-thòaⁿ thia̍p tī i ê thâu-khak téng, hō͘ i bīn âng chai thang kiàn-siàu; Siōng Chú mā ōe pò-siúⁿ lí.

²³ Pak-hong thàu chiū lo̍h-hō͘; húi-pòng ê chi̍h ōe jiá lâng pìⁿ-bīn.

²⁴ Lêng-khó tiàm chhù-téng ê kak-thâu, mā m̄ kap chháu-nāu ê hū-jîn-lâng chòe-hé tòa tōa keng chhù.

²⁵ Thiaⁿ-tio̍h hó siau-sit tùi hn̄g-hn̄g lâi, chhin-chhiūⁿ ià-siān chhùi-ta ê lâng lim-tio̍h liâng-chúi.

²⁶ Gī-lâng tī pháiⁿ-lâng ê bīn-chêng khut-ho̍k, chhin-chhiūⁿ phah lâ-sâm ê chíⁿ, thún lô--khì ê chúi-chôaⁿ.

²⁷ Bi̍t chia̍h siuⁿ chōe m̄ hó; lâng kè-thâu kiû ka-kī ê êng-kng mā m̄ hó.

²⁸ Bōe-hiáu khòng-chè ka-kī ê lâng, chhin-chhiūⁿ bô chhiûⁿ ê siâⁿ chin kín siū kong-phòa.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan