Chim-giân 24 - 現代台語譯本羅馬字版

¹ M̄-thang him-siān pháiⁿ-lâng, mā m̄-thang ài kap in chòe-tui,

² in-ūi in ê sim kè-ōe kiông-pō ê tāi-chì, in ê chhùi tâm-lūn hāi-lâng ê sū.

³ Chhù khò tì-hūi khí-chō, ēng chhong-bêng kiàn-li̍p;

⁴ ū tì-sek ê lâng ê pâng-keng chhiong-móa ta̍k-hāng pó-pòe kap kùi-tiōng ê châi-bu̍t.

⁵ Ū tì-hūi ê lâng ū tōa lêng-le̍k; ū tì-sek ê lâng ke-thiⁿ khùi-la̍t.

⁶ Beh kau-chiàn tio̍h ū hó ê chhek-lio̍k; chham-bô͘ chōe chiū ōe tek-sèng.

⁷ Tì-hūi ko-chhim, gōng-lâng bōe liáu-kái; tī kong-kiōng chi̍p-hōe tiong i bô ōe thang kóng.

⁸ Kè-bô͘ chòe pháiⁿ ê lâng ōe hō͘ lâng kiò-chòe im-bô͘-ka.

⁹ Gōng-lâng ê kè-bô͘ lóng sī chōe-ok; biáu-sī lâng--ê, lâng-lâng iàm-ò͘ⁿ.

¹⁰ Tī hoān-lān ê ji̍t sit-táⁿ, khùi-la̍t chiū kiám-chió.

¹¹ Lâng siū thoa kàu sí-tōe, tio̍h kā i kái-kiù; lâng teh-beh siū thâi, m̄-thang bô kiù i.

¹² Lí nā kóng “Chit-ê tāi-chì góa m̄ chai”, kàm-chhat lâng ê sim ê Siōng-tè kiám bōe sím-phòaⁿ? Pó-choân lí sìⁿ-miā--ê kiám ōe m̄ chai? I kiám bōe chiàu ta̍k-lâng ê só͘-chòe pò-èng?

¹³ Góa ê kiáⁿ ah, tio̍h chia̍h bi̍t, in-ūi bi̍t sī hó; chia̍h bi̍t-pô͘ tih--lo̍h-lâi ê bi̍t chiū chai tiⁿ.

¹⁴ Tio̍h chai, tì-hūi tī lí ê sim mā-sī án-ni; lí nā chhē--tio̍h, chiân-tô͘ chiū kng-bêng, ǹg-bāng bōe bô--khì.

¹⁵ M̄-thang chhin-chhiūⁿ pháiⁿ-lâng bâi-ho̍k beh kong-kek gī-lâng ê ke; m̄-thang phò-hoāi i tòa ê chhù.

¹⁶ Gī-lâng poa̍h-tó chhit piàn mā ōe koh khí--lâi; pháiⁿ-lâng chi̍t-ē tú-tio̍h chai-lān chiū tó--lo̍h-khì.

¹⁷ Lí ê tùi-te̍k poa̍h-tó, m̄-thang hoaⁿ-hí; i tó--lo̍h-khì, lí ê sim mā m̄-thang khoài-lo̍k,

¹⁸ chiah bián Siōng Chú khòaⁿ--kìⁿ bô hoaⁿ-hí, soah hō͘ I ê siū-khì bô lîm-kàu lí ê tùi-te̍k.

¹⁹ M̄-thang in-ūi chòe pháiⁿ ê lâng sim-lāi put-pêng, mā m̄-thang him-siān pháiⁿ-lâng,

²⁰ in-ūi pháiⁿ-lâng bô hó kiat-kio̍k, in ê teng ōe sit--khì.

²¹ Góa ê kiáⁿ ah, tio̍h kèng-ùi Siōng Chú kap kun-ông, m̄-thang kap hoán-poān ê lâng kau-kiat,

²² in-ūi húi-bia̍t ōe tùi Siōng Chú kap kun-ông hut-jiân lîm-kàu lín, in beh kàng-lo̍h ê chai-lān siáⁿ-lâng ōe chai?

Koh Chi̍t-kóa Tì-hūi ê Ōe

²³ Ē-bīn só͘ kì mā-sī tì-hūi ê lâng ê ōe: Sím-phòaⁿ ê sî m̄-thang ū phian-sim.

²⁴ Kā ū-chōe ê lâng phòaⁿ bô-chōe, ōe siū chèng-lâng chiù-chó͘, lâng-lâng iàm-ò͘ⁿ.

²⁵ Kā pháiⁿ-lâng phòaⁿ ū-chōe, ōe tit-tio̍h chèng-lâng hoaⁿ-hí; i ōe tōa-tōa siū chiok-hok.

²⁶ Ēng kong-chèng ê ōe ìn-tap, piáu-sī chin-sêng ê iú-gî.

²⁷ Gōa-bīn ê tāi-chì chún-pī hó-sè, chhân-hn̂g hó-hó chèng-choh, chiah lâi khí-chhù, sêng-ka-li̍p-gia̍p.

²⁸ M̄-thang ēng bô kun-kù ê kiàn-chèng hām-hāi chhù-piⁿ; m̄-thang choh gūi-chèng khi-phiàn lâng.

²⁹ M̄-thang kóng, “I án-chóaⁿ tùi-thāi góa, góa mā beh án-ni tùi-thāi i; góa beh chiàu hit-ê lâng ê só͘-chòe kā i pò-ho̍k.”

³⁰ Góa keng-kè pîn-tōaⁿ-lâng ê chhân-hn̂g, bô tì-sek ê lâng ê phû-tô-hn̂g,

³¹ khòaⁿ-kìⁿ chhì-phè hoat kah móa-móa-sī, chháu-chhì jia-khàm tōe-bīn, chio̍h-chhiûⁿ mā tó--lo̍h-khì.

³² Góa khòaⁿ--kìⁿ chiū chhim-chhim siūⁿ, khòaⁿ-liáu tit-tio̍h kà-sī.

³³ Koh khùn chi̍t-kú-á, koh bîn chi̍t-sî-á, koh the chi̍t-ē-á,

³⁴ sàn-chhiah chiū chhin-chhiūⁿ chha̍t lâi, khiàm-kheh chhin-chhiūⁿ kiông-tō kàu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan