Bìoball air-loidhne

Chim-giân 22 - 現代台語譯本羅馬字版

¹ Miâ-siaⁿ pí tōa châi-hù khah thang ì-ài; un-hūi pí kim-gûn khah thang him-siān.

² Hó-gia̍h-lâng kap sàn-chhiah-lâng ū kiōng-tông ê só͘-chāi, in lóng sī Siōng Chú só͘ chhòng-chō.

³ Ōe piàn-khiàu ê lâng khòaⁿ-tio̍h gûi-hiám chiū siám-pī; gōng-ti̍t ê lâng ti̍t-ti̍t chìn-chêng khì, siū chai-hāi.

⁴ Khiam-pi kèng-ùi Siōng Chú, chiū ū châi-hù, chun-êng, sìⁿ-miā.

⁵ Gâu oai-khiok sī-hui ê lâng kiâⁿ ê lō͘ ū chhì-phè kap lô-bāng; pó-sioh ka-kī sìⁿ-miā ê lâng lī-khui hit-tiâu lō͘ chin hn̄g.

⁶ Kàu-tō gín-á kiâⁿ ha̍p-gî ê lō͘, i kàu lāu lóng bōe oai-chhoa̍h.

⁷ Hó-gia̍h-lâng koán-hat sàn-chhiah-lâng; khiàm-chè--ê chòe chè-chú ê lô͘-châi.

⁸ Iā put-gī chéng-chí ê lâng ōe siu chai-hō; i khi-ap lâng ê sè-le̍k ōe siū húi-bia̍t.

⁹ Hó-sim ê lâng ū hok-khì, in-ūi i chiong bí-niû pun hō͘ sàn-chhiah-lâng.

¹⁰ Kóaⁿ-chhut chū-ko chū-tāi ê lâng, saⁿ-chiⁿ chiū bô--khì, oan-ke kap bú-jio̍k mā ōe soah.

¹¹ Sim chheng-khì, kóng-ōe un-hô ê lâng, ông ōe chòe in ê pêng-iú.

¹² Siōng Chú ê ba̍k-chiu khòaⁿ-kò͘ chhong-bêng ê lâng, m̄-kú I phò-hoāi kan-chà ê lâng ê giân-lūn.

¹³ Pîn-tōaⁿ-lâng kóng, “Gōa-kháu ū sai, góa nā chhut--khì ōe hō͘ i kā-sí.”

¹⁴ Îm-hū ê chhùi sī Chhim-khiⁿ; Siōng Chú só͘ iàm-ò͘ⁿ ê lâng ōe poa̍h-lo̍h hit lāi-bīn.

¹⁵ Gín-á ê sim hō͘ gû-gōng tîⁿ--teh, koán-kàu ê chhê-á ōe kā gû-gōng kóaⁿ-cháu.

¹⁶ Khò pak-siah sàn-chhiah-lâng lâi hó-gia̍h, á-sī sàng lé-mi̍h hō͘ hó-gia̍h-lâng, lóng ōe tì-kàu khiàm-kheh.

30 Kù Tì-hūi ê Ōe

¹⁷ Tio̍h àⁿ hī-khang thiaⁿ tì-hūi ê lâng ê ōe, choan-sim niá-siū góa ê kà-sī;

¹⁸ siōng-hó sī khǹg tī lí ê sim-tóe, put-sî thang èng-iōng.

¹⁹ Góa kin-á-ji̍t án-ni chí-sī lí, sī beh hō͘ lí óa-khò Siōng Chú.

²⁰ Chit saⁿ-cha̍p kù kàu-tō kap tì-sek ê ōe, góa í-keng ū siá hō͘ lí,

²¹ hō͘ lí chai chiah-ê chin-lí ê ōe khak-si̍t ōe-khò--tit, thang chèng-khak hôe-tap chhe-phài lí ê lâng.

²² M̄-thang in-ūi lâng sàn-chhiah kā in pak-siah; mā m̄-thang tī siâⁿ-mn̂g-kháu khi-ap khùn-khó͘-lâng,

²³ in-ūi Siōng Chú ōe thòe in sin-oan; chhiúⁿ-toa̍t in--ê, Siōng Chú ōe chhiúⁿ-toa̍t hiah-ê lâng ê sìⁿ-miā.

²⁴ Khoài siū-khì ê lâng, m̄-thang kap in kau-pôe; pháiⁿ sèng-tē ê lâng, m̄-thang kap in óng-lâi;

²⁵ kiaⁿ-liáu lí o̍h in ê hêng-ûi, ka-kī soah hām-lo̍h lô-bāng.

²⁶ M̄-thang kā lâng chòe tam-pó, m̄-thang kā khiàm-chîⁿ ê lâng pó-chèng.

²⁷ Lí nā bōe-tàng hêng, lâng ōe kā lí teh khùn ê bîn-chhn̂g giâ--khì.

²⁸ Chá-chêng lí ê chó͘-kong só͘ li̍p ê tōe-kài, m̄-thang î-sóa.

²⁹ Lí bat khòaⁿ-tio̍h gâu pān tāi-chì ê lâng--bô? I bōe ho̍k-sāi phó͘-thong-lâng, ōe ho̍k-sāi kun-ông.

The Bible Society in Taiwan

Lean sinn:

Ceanglaichean taic

Sanasan