Bìoball air-loidhne

Chim-giân 21 - 現代台語譯本羅馬字版

¹ Ông ê sim tī Siōng Chú ê chhiú-tiong, chhin-chhiūⁿ chúi-liû chiàu Siōng-tè só͘ tēng ê hong-hiòng teh lâu.

² Lâng khòaⁿ ka-kī ê só͘-chòe chòe tio̍h, m̄-kú Siōng Chú sím-cha lâng ê tōng-ki.

³ Péng-kong-hêng-gī pí hiàn-chè koh-khah ōe tit-tio̍h Siōng Chú chiap-la̍p.

⁴ Ba̍k-thâu-koân, sim kiau-ngō͘, sī pháiⁿ-lâng teh hián-iāu ka-kī, lóng sī chōe.

⁵ Lâng chim-chiok kè-ōe ōe hù-chiok; chhong-pōng chòe tāi-chì it-tēng tì-kàu khiàm-kheh.

⁶ Lâng ēng khúi-chà tit--tio̍h ê châi-lī, chhin-chhiūⁿ phû-hûn chin kín chiū siau-sit.

⁷ Pháiⁿ-lâng ê kiông-pō ōe hāi-sí ka-kī, in-ūi in m̄-khéng si̍t-hêng kong-gī.

⁸ Chōe-jîn ê lō͘ oan-khiau; sûn-kiat ê lâng hêng-ûi chèng-ti̍t.

⁹ Lêng-khó tiàm chhù-téng ê kak-thâu, mā m̄ kap chháu-nāu ê hū-jîn-lâng chòe-hé tòa tōa keng chhù.

¹⁰ Pháiⁿ-lâng ê sim ì-ài siâ-ok, chhù-piⁿ tit bōe tio̍h i ê koan-ài.

¹¹ Chū-ko chū-tāi ê lâng siū hêng-hoa̍t, gōng-ti̍t ê lâng ōe tit-tio̍h tì-hūi; tì-hūi ê lâng siū kà-sī, in ōe tit-tio̍h tì-sek.

¹² Kong-gī ê Siōng-tè kàm-chhat pháiⁿ-lâng ê ke, kā pháiⁿ-lâng chhia-tó kàu bia̍t-bông.

¹³ That-ba̍t hī-khang m̄ thiaⁿ sàn-chhiah-lâng ai-kiû--ê, i chiong-lâi kiû-kiò mā bô lâng beh chhap i.

¹⁴ Àm-tiong sàng-lé ōe soah siū-khì; pì-bi̍t hóe-lō͘ ōe soah tōa siū-khì.

¹⁵ Péng-kong-hêng-gī hō͘ hó-lâng hoaⁿ-hí, khiok hō͘ pháiⁿ-lâng kiaⁿ-hiâⁿ.

¹⁶ Phian-lī bêng-lí ê lō͘ ê lâng, ōe kap im-hûn chòe-hé tòa.

¹⁷ Ài chhia-chhí--ê ōe sàn-chhiah; ài iàn-lo̍k--ê bōe hó-gia̍h.

¹⁸ Pháiⁿ-lâng ōe chòe gī-lâng sio̍k-hôe ê kè-chîⁿ; kan-chà ê lâng ōe chòe chèng-ti̍t-lâng ê thòe-sin.

¹⁹ Lêng-khó tiàm khòng-iá, mā m̄ kap chháu-nāu pháiⁿ sèng-tē ê hū-jîn-lâng chòe-hé tòa.

²⁰ Tì-hūi ê lâng chhù-lāi chek-chū kùi-khì ê mi̍h; gōng-lâng chin kín chiū sńg-liáu-liáu.

²¹ Tui-chhē kong-gī kap jîn-chû, ōe chhē-tio̍h sìⁿ-miā, hoân-êng, kap chun-êng.

²² Tì-hūi ê lâng peh-chiūⁿ ióng-sū ê siâⁿ, thiah-húi in só͘ óa-khò ê pó-lúi.

²³ Iok-sok chhùi kap chi̍h--ê, ōe pó-siú ka-kī bián siū chai-hāi.

²⁴ Kiau-ngō͘ chū-ko ê lâng, miâ kiò-chòe bú-bān; i chòe tāi-chì chhiong-kông.

²⁵ Pîn-tōaⁿ ê lâng ōe hō͘ ka-kī ê io̍k-bōng hāi-sí, in-ūi i ê chhiú m̄-khéng chòe kang.

²⁶ Ū lâng kui-ji̍t tham-sim put-ti-chiok; gī-lâng khóng-khài si-sià.

²⁷ Pháiⁿ-lâng hiàn ê chè thang iàm-ò͘ⁿ, hô-hòng i chûn pháiⁿ ì-sù lâi hiàn.

²⁸ Choh gūi-chèng ê lâng ōe bia̍t-bông; chiàu-si̍t choh-chèng--ê, bô lâng ōe-tàng kā i piān-tó.

²⁹ Pháiⁿ-lâng bīn-phê kāu; chèng-ti̍t ê lâng kiâⁿ-ta̍h kín-sīn.

³⁰ Lâng ê tì-hūi, chhong-bêng, kap só͘-ū ê chhek-lio̍k lóng bōe-tàng tùi-khòng Siōng Chú.

³¹ Bé sī ūi-tio̍h kau-chiàn ê ji̍t chún-pī; m̄-kú sèng-lī sī Siōng Chú teh koat-tēng.

The Bible Society in Taiwan

Lean sinn:

Ceanglaichean taic

Sanasan