Chim-giân 2 - 現代台語譯本羅馬字版

Tì-hūi ê Pò-siúⁿ

¹ Góa ê kiáⁿ ah, lí nā chiap-siū góa ê ōe, chiong góa ê bēng-lēng khǹg tī sim-lāi,

² chù-ì thiaⁿ tì-hūi, choan-sim kiû chhong-bêng;

³ lí nā kiû bêng-lí, tōa-siaⁿ kiû chhong-bêng;

⁴ nā chhē i chhin-chhiūⁿ chhē gûn, chhiau-chhē i chhin-chhiūⁿ chhiau-chhē chhàng--teh ê pó-pòe;

⁵ lí chiū bêng-pe̍k beh án-chóaⁿ kèng-ùi Siōng Chú, chai beh án-chóaⁿ jīn-bat Siōng-tè.

⁶ In-ūi Siōng Chú sù tì-hūi; chai-bat kap chhong-bêng lóng tùi I ê chhùi chhut.

⁷ I ūi-tio̍h chèng-ti̍t ê lâng chek-chū chin ê tì-hūi, pó-hō͘ hêng-ûi toan-chèng ê lâng.

⁸ I pó-siú chèng-ti̍t ê lâng ê lō͘, pó-hō͘ tùi I tiong-sìn ê lâng ê tō-lō͘.

⁹ Án-ni, lí chiū bêng-pe̍k kong-gī, kong-chèng, kong-pêng, chiū-sī chhōa lâng kàu it-chhè liông-siān ê lō͘.

¹⁰ Tì-hūi ōe ji̍p lí ê sim; tì-sek ōe hō͘ lí ê sim-sîn hoaⁿ-hí.

¹¹ Chhek-lio̍k ōe pó-hō͘ lí; chhong-bêng ōe pó-siú lí,

¹² kiù lí lī-khui pháiⁿ-lō͘, thoat-lī oai-khiok sī-hui ê lâng.

¹³ Hit-khoán lâng khì-sak chèng-ti̍t ê lō͘, kiâⁿ o͘-àm ê tō-lō͘.

¹⁴ In ài chòe pháiⁿ, ì-ài pháiⁿ-lâng ê oai-khiok.

¹⁵ In ê lō͘ oan-khiau, in ê só͘-kiâⁿ phian-lī chiàⁿ-lō͘.

¹⁶ Tì-hūi ōe hō͘ lí siám-pī îm-hū, siám-pī kóng sai-nai-ōe ê ki-lú.

¹⁷ I khì-sak siàu-liân ê sî ê phit-phòe, bōe-kì-tit i ê Siōng-tè ê iok.

¹⁸ Lí ji̍p i ê chhù chiū kiâⁿ-ji̍p sí-lō͘, kiâⁿ i ê lō͘ chiū thàng kàu Im-hú.

¹⁹ Kàu i hia--ê, bô chi̍t ê ōe-tàng oa̍t tò-tńg, bô chi̍t ê ōe koh kiâⁿ tńg-lâi oa̍h-miā ê lō͘.

²⁰ Án-ni, tì-hūi ōe hō͘ lí kiâⁿ hó-lâng ê lō͘, chhî-siú gī-lâng ê tō-lō͘.

²¹ Chèng-ti̍t ê lâng ōe khiā-khí tī èng-ún ê thó͘-tōe; bô thang chí-chek ê lâng ōe lâu tī hia.

²² M̄-kú pháiⁿ-lâng ōe tùi tōe-bīn siau-bia̍t, kan-chà ê lâng ōe tùi tōe-chiūⁿ liân kun khau hiat-ka̍k.

The Bible Society in Taiwan

Lean sinn:

Ceanglaichean taic

Sanasan