Chim-giân 18 - 現代台語譯本羅馬字版

¹ Ko͘-ta̍k ê lâng tui-kiû ka-kī ê io̍k-bōng, pâi-thek it-chhè chin-sêng ê khoàn-kò.

² Gōng-lâng bô ài tì-sek, chí-ū ài tián ka-kī ê ì-kiàn.

³ Ū siâ-ok chiū ū biáu-sī; ū kiàn-siàu chiū ū lêng-jio̍k.

⁴ Lâng chhùi-lāi ê ōe chhin-chhiūⁿ chhim ê chúi; tì-hūi ê chúi-chôaⁿ chhin-chhiūⁿ teh lâu ê khoe-chúi.

⁵ Phòaⁿ-toàn ê sî phian-thán pháiⁿ-lâng, á-sī oan-óng bû-ko͘ ê lâng, lóng m̄ hó.

⁶ Gōng-lâng khui-chhùi ín-khí oan-ke, i chi̍t-ē kóng-ōe chiū jiá-khí sio-phah.

⁷ Gōng-lâng ê chhùi hō͘ i bia̍t-bông; i ê chhùi-tûn sī i sìⁿ-miā ê lô-bāng.

⁸ Hī-khang piⁿ ê êng-á-ōe chhin-chhiūⁿ hó-chia̍h-mi̍h, chi̍t-ē ji̍p-chhùi chiū thun lo̍h-pak.

⁹ Bô chiàu-khí-kang kang-chok ê lâng, sī kap phò-hoāi-chiá chòe hiaⁿ-tī.

¹⁰ Siōng Chú sī kian-kò͘ ê pó-lúi; gī-lâng cháu--ji̍p-khì chiū an-ún.

¹¹ Hó-gia̍h-lâng siūⁿ-kóng châi-hù sī in ê pó-chiong, sī an-choân khó-khò ê koân-chhiûⁿ.

¹² Ū kiau-ngō͘ chiū ū sit-pāi; ū khiam-pi chiū ū chun-êng.

¹³ Iáu-bē thiaⁿ-liáu chiū ìn-tap, chiū-sī gû-gōng kap kiàn-siàu.

¹⁴ Lâng ê sim ōe-tàng jím-siū pīⁿ-thiàⁿ; sim-lêng phò-chhùi, bô lâng jím-siū ōe tiâu.

¹⁵ Chhong-bêng-lâng ê sim tit-tio̍h tì-sek; tì-hūi-lâng ê hī-khang chhē-kiû tì-sek.

¹⁶ Lé-mi̍h kā lâng khui-lō͘, ōe chhōa i kàu tōa-jîn-bu̍t ê bīn-chêng.

¹⁷ Seng sin-sò͘--ê ká-ná ū-lí, m̄-kú tùi-hong lâi chiū cha-chhut si̍t-chêng.

¹⁸ Thiu-chhiam ōe hō͘ oan-ke soah, ōe-tàng kái-koat kiông-chiá chi kan ê kiù-hun.

¹⁹ Hō͘ kiat-oan ê hiaⁿ-tī koh hô, pí kong-chhú kian-kò͘ ê siâⁿ khah khùn-lân; chit-khoán hun-cheng chhin-chhiūⁿ siâⁿ-mn̂g ê mn̂g-chhòaⁿ chhòaⁿ-tiâu-tiâu.

²⁰ Lâng tùi kóng-ōe só͘ kiat ê ké-chí, pak-tó͘ tit-tio̍h pá-chiok; lâng tùi chhùi-tûn só͘ siu-sêng--ê tit-tio̍h boán-chiok.

²¹ Chhùi-chi̍h ōe-tàng chi-phòe lâng ê siⁿ-sí; ài lī-iōng chit-ê koân ê lâng tio̍h sêng-tam hō͘-kó.

²² Chhōa-tio̍h hó bó͘ sī hok-khì, sī Siōng Chú ê un-sù.

²³ Sàn-chhiah-lâng khún-chhiat kiû-chêng; hó-gia̍h-lâng pháiⁿ-siaⁿ-sàu ìn-tap.

²⁴ Ū chin chōe pêng-iú put-kò sī choh-phōaⁿ; ū chi̍t ê ti-kí pí hiaⁿ-tī khah chhin.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan