Bìoball air-loidhne

Chim-giân 17 - 現代台語譯本羅馬字版

¹ Ū chi̍t-tè-á piáⁿ thang chia̍h, tāi-ke hô-bo̍k, khah iâⁿ chhe-chhau móa toh ū saⁿ-chiⁿ.

² Gâu pān tāi-chì ê po̍k-jîn ōe koán-hat sià-thé-biān ê kiáⁿ, koh ōe-tàng kap chú-lâng ê kiáⁿ pîⁿ-pîⁿ pun-tio̍h ke-hé.

³ Liān gûn ēng tiáⁿ, liān kim ēng lô͘, m̄-kú Siōng Chú thoàn-liān lâng ê sim.

⁴ Chòe pháiⁿ ê lâng chù-ì thiaⁿ kan-chà ê ōe; kóng pe̍h-chha̍t ê lâng ài thiaⁿ siâ-ok ê giân-gú.

⁵ Thí-chhiò sàn-chhiah-lâng sī bú-jio̍k chhòng-chō in ê Chú; ài lâng tú-tio̍h chai-hō--ê it-tēng ōe siū hêng-hoa̍t.

⁶ Kiáⁿ-sun sī lāu-lâng ê hoa-koan; lāu-pē sī kiáⁿ-jî ê êng-iāu.

⁷ Gōng-lâng kóng tōa-ōe bô ha̍h; ū tōe-ūi ê lâng kóng pe̍h-chha̍t koh-khah bô ha̍h.

⁸ Hóe-lō͘, sàng ê lâng khòaⁿ-chòe pó-chio̍h, ta̍k-tiâu lō͘ lóng kiâⁿ ōe thong.

⁹ Bōe-kì-tit lâng ê kè-sit ōe tit-tio̍h iú-hó ê hôe-èng; tāi-chì ta̍uh-ta̍uh-liām ōe hō͘ chhin-bi̍t ê pêng-iú so͘-oán.

¹⁰ Kā bêng-lí ê lâng kóng chi̍t kù chek-pī ê ōe, khah iâⁿ kā gōng-lâng phah chi̍t-pah ē.

¹¹ Pháiⁿ-lâng chûn-sim pōe-ge̍k; húi-bia̍t ê sù-chiá ōe lâi kā i tùi-hù.

¹² Lêng-khó tú-tio̍h sit-lo̍h kiáⁿ ê hîm-bú, m̄-thang tú-tio̍h kò͘-chip ê gōng-lâng.

¹³ Ēng pháiⁿ pò hó--ê, chai-hō bōe lī-khui i ê ke.

¹⁴ Saⁿ-chiⁿ chi̍t-ē khai-sí chhin-chhiūⁿ chúi pang-khiah, tio̍h seng chè-chí chiah bōe tì-kàu hoàn-lām.

¹⁵ Phòaⁿ pháiⁿ-lâng chòe bô-chōe, tēng gī-lâng chòe ū-chōe, nn̄g hāng lóng sī Siōng Chú só͘ iàm-ò͘ⁿ.

¹⁶ Gōng-lâng bô siūⁿ-beh bóe tì-hūi, chhiú--ni̍h the̍h chîⁿ ū siáⁿ lō͘-ēng?

¹⁷ Pêng-iú put-sî saⁿ chiàu-kò͘; hiaⁿ-tī chhut-sì sī beh hun-tam khó͘-lān.

¹⁸ Kā chhù-piⁿ tah-èng chòe tam-pó, hit-khoán lâng sī gōng-lâng.

¹⁹ Ài hoān-chōe ê lâng ài saⁿ-chiⁿ; chū-ko kiau-ngō͘ ê lâng chū-chhú-bia̍t-bông.

²⁰ Sim-su siâ-ok ê lâng chhē bōe tio̍h hok-khì; gâu péng-ōe ê lâng ōe hām-lo̍h hoān-lān.

²¹ Siⁿ-tio̍h gōng-kiáⁿ sī pē-bú ê iu-būn; gōng-lâng ê lāu-pē bô sím-mi̍h thang hoaⁿ-hí.

²² Hoaⁿ-hí ê sim sī hó-io̍h; iu-siong ê sîn hō͘ kut ko͘-tâ.

²³ Pháiⁿ-lâng àm-tiong siu hóe-lō͘, ōe hō͘ phòaⁿ-koat sit-khì kong-chèng.

²⁴ Tì-hūi tī bêng-lí ê lâng ê ba̍k-chiu chêng, m̄-kú gōng-lâng ê ba̍k-chiu chhē kàu tōe ê ke̍k-thâu.

²⁵ Gû-gōng ê kiáⁿ hō͘ lāu-pē hoân-ló, hō͘ lāu-bú iu-khó͘.

²⁶ Hêng-hoa̍t bû-ko͘ ê lâng m̄ hó; táⁿ-kek chèng-ti̍t ê koaⁿ-tiúⁿ mā m̄ hó.

²⁷ Iok-sok giân-gú--ê ū tì-sek; sèng-chêng léng-chēng--ê sī chhong-bêng.

²⁸ Gōng-lâng nā tiām-tiām mā khòaⁿ-chòe khiáu; i bô khui-chhùi mā sǹg-chòe chhong-bêng.

The Bible Society in Taiwan

Lean sinn:

Ceanglaichean taic

Sanasan