Chim-giân 15 - 現代台語譯本羅馬字版

¹ Un-hô ê ìn-tap hō͘ siū-khì soah; chhì-chha̍k ê ōe kek-khí siū-khì.

² Tì-hūi-lâng ê chi̍h gâu kóng tì-sek; gōng-lâng ê chhùi thò͘-chhut gû-gōng.

³ Siōng Chú ê ba̍k-chiu ta̍k só͘-chāi teh khòaⁿ, hó-pháiⁿ lóng teh kàm-chhat.

⁴ Un-hô ê chi̍h sī oa̍h-miā ê chhiū; kóng-ōe oai-khiok sún-siong sim-sîn.

⁵ Gōng-lâng khòaⁿ-khin lāu-pē ê koán-kàu; goān-ì siū chek-pī sī bêng-lí.

⁶ Gī-lâng ê chhù-lāi ū chin chōe châi-pó; pháiⁿ-lâng só͘ thàn--ê chiâⁿ-chòe ka-kī ê hām-hāi.

⁷ Tì-hūi-lâng ê chhùi pò-iông tì-sek; gōng-lâng ê sim m̄-sī án-ni.

⁸ Pháiⁿ-lâng hiàn ê chè, Siōng Chú iàm-ò͘ⁿ; chèng-ti̍t-lâng ê kî-tó, Siōng Chú hoaⁿ-hí.

⁹ Pháiⁿ-lâng ê lō͘ sī Siōng Chú só͘ iàm-ò͘ⁿ; tui-kiû kong-gī sī I só͘ ì-ài.

¹⁰ Pàng-sak chiàⁿ-lō͘ ê lâng ōe siū giâm-keh koán-kàu; iàm-ò͘ⁿ chek-pī ê lâng ōe tì-kàu sí-bông.

¹¹ Im-hú kap Bia̍t-bông Siōng Chú to teh kàm-chhat, sè-kan-lâng ê sim koh-khah bōe-tàng tùi I khàm-ba̍t.

¹² Chū-ko chū-tāi ê lâng bô ài siū chek-pī, mā bô ài kap tì-hūi ê lâng chham-siông.

¹³ Sim hoaⁿ-hí, bīn chiū ū chhiò-iông; sim iu-būn, sim-lêng chiū lóe-chì.

¹⁴ Chhong-bêng-lâng ê sim chhē-kiû tì-sek; gōng-lâng ê chhùi ēng gû-gōng chòe chia̍h-mi̍h.

¹⁵ Khùn-khó͘ ê lâng, ji̍t-chí pháiⁿ kè; sim khoài-lo̍k ê lâng, chhin-chhiūⁿ iàn-se̍k bô tn̄g.

¹⁶ Sàn-chhiah ū teh kèng-ùi Siōng Chú, khah iâⁿ hó-gia̍h ū chin chōe hoân-ló.

¹⁷ Chia̍h chhiⁿ-chhài, tāi-ke saⁿ-thiàⁿ, khah iâⁿ chia̍h pûi gû-á, hō͘-siōng oàn-hūn.

¹⁸ Pháiⁿ sèng-tē jiá-khí oan-ke; bô khoài siū-khì ōe hō͘ saⁿ-chiⁿ soah.

¹⁹ Pîn-tōaⁿ-lâng ê lō͘ hō͘ chhì-phè ûi--teh; chèng-ti̍t-lâng ê lō͘ tōa-tiâu pîⁿ-tháⁿ.

²⁰ Tì-hūi ê kiáⁿ hō͘ lāu-pē hoaⁿ-hí; gōng-lâng khòaⁿ-khin ka-kī ê lāu-bú.

²¹ Bû-ti ê lâng khòaⁿ gû-gōng chòe hoaⁿ-hí; bêng-lí ê lâng chiàu chèng-ti̍t kiâⁿ.

²² Bô chham-siông, kè-ōe ōe sit-pāi; kò͘-būn chōe, chiū ōe sêng-kong.

²³ Ìn-tap ha̍p-gî hō͘ lâng hoaⁿ-hí; ha̍p-sî ê ōe si̍t-chāi chin hó!

²⁴ Tì-hūi ê lâng kiâⁿ-chiūⁿ oa̍h-miā ê lō͘, chiah bián lo̍h-khì ē-bīn ê Im-hú.

²⁵ Siōng Chú thiah-húi kiau-ngō͘ ê lâng ê chhù, pó-hō͘ kóaⁿ-hū ê tōe-kài.

²⁶ Pháiⁿ ê sim-su, Siōng Chú iàm-ò͘ⁿ; sûn-kiat ê ōe, Siōng Chú ì-ài.

²⁷ Tham put-gī-chi-châi, hām-hāi ka-kī ê ke; kū-choa̍t hóe-lō͘, ōe tn̂g-hè-siū.

²⁸ Gī-lâng ê sim siūⁿ-liáu chiah ìn; pháiⁿ-lâng ê chhùi thò͘-chhut siâ-ok.

²⁹ Siōng Chú lī-khui pháiⁿ-lâng chin hn̄g, m̄-kú ū teh thiaⁿ gī-lâng ê kî-tó.

³⁰ Un-jiû ê gán-sîn hō͘ lâng sim hoaⁿ-hí; hó siau-sit hō͘ kun-kut ióng-kiāⁿ.

³¹ Thiaⁿ-thàn koán-kàu ê lâng ōe tn̂g-hè-siū, ōe-tàng kap tì-hūi ê lâng chòe-hé khiā-khí.

³² M̄ thiaⁿ kéng-kài sī khòaⁿ-khin ka-kī; thiaⁿ-thàn koán-kàu ōe tit-tio̍h tì-hūi.

³³ Kèng-ùi Siōng Chú sī kà lâng ū tì-hūi; seng ū khiam-pi chiah ū chun-êng.

The Bible Society in Taiwan

Lean sinn:

Ceanglaichean taic

Sanasan