Chim-giân 14 - 現代台語譯本羅馬字版

¹ Tì-hūi ê hū-jîn-lâng kiàn-li̍p ka-kī ê ka-têng; gû-gōng ê hū-jîn-lâng chhin-chhiú thiah-húi.

² Chòe sū chèng-ti̍t ê lâng kèng-ùi Siōng Chú; chòe tāi-chì oai-chhoa̍h ê lâng biáu-sī I.

³ Gōng-lâng kóng-ōe ka-kī siū chek-hoa̍t; tì-hūi ê lâng ê ōe pó-hō͘ ka-kī.

⁴ Bô gû keng-choh chiū bô ngó͘-kok; gû ū-la̍t thó͘-sán chiū jú chōe.

⁵ Sêng-si̍t ê chèng-jîn bōe kóng pe̍h-chha̍t; hu-ké ê chèng-jîn móa-chhùi hô͘-soat.

⁶ Chū-ko chū-tāi ê lâng chhē tì-hūi, chhē bōe tio̍h; chhong-bêng ê lâng chin kín tit-tio̍h tì-sek.

⁷ Tio̍h lī-khui gōng-lâng, in-ūi tùi i kóng ê ōe chhē bōe tio̍h tì-sek.

⁸ Thong-ta̍t ê lâng ê tì-hūi hō͘ i liáu-kái tio̍h kiâⁿ ê lō͘; gōng-lâng ê gōng tì-kàu kiâⁿ bê-lō͘.

⁹ Gōng-lâng khòaⁿ hoān-chōe chòe kún-chhiò; chèng-ti̍t ê lâng hun-hióng Siōng-tè ê un-hūi.

¹⁰ Lâng ê kan-khó͘, chí-ū ka-kī ê sim chai; i ê hoaⁿ-hí, gōa-lâng bōe-tàng hun-hióng.

¹¹ Pháiⁿ-lâng ê chhù ōe tó-hoāi; chèng-ti̍t-lâng ê pò͘-pîⁿ ōe heng-ōng.

¹² Ū chi̍t tiâu lō͘ khòaⁿ--khí-lâi chiàⁿ koh ti̍t, kàu-bé thàng kàu sí-bông.

¹³ Lâng teh chhiò ê sî sim iáu ū iu-būn; khoài-lo̍k ê kiat-kio̍k ōe pìⁿ-chòe pi-siong.

¹⁴ Pháiⁿ-lâng it-tēng siū pò-èng; hó-lâng it-tēng tit pò-siúⁿ.

¹⁵ Gōng-ti̍t ê lâng ta̍k-hāng lóng sìn; thong-ta̍t ê lâng pō͘-pō͘ kín-sīn.

¹⁶ Tì-hūi ê lâng sū-sū kín-sīn, oán-lī pháiⁿ-tāi; gōng-lâng kiau-ngō͘ hòng-sù.

¹⁷ Khoài siū-khì ê lâng chòe tāi-chì gû-gōng; khúi-chà ê lâng hō͘ lâng oàn-hūn.

¹⁸ Gōng-ti̍t ê lâng sêng-chiap gû-gōng chòe sán-gia̍p; thong-ta̍t ê lâng tit-tio̍h tì-sek chòe hoa-koan.

¹⁹ Pháiⁿ-lâng phak-lo̍h tī hó-lâng ê bīn-chêng; chōe-jîn phak-lo̍h tī gī-lâng ê mn̂g-kháu.

²⁰ Sàn-chhiah-lâng liân chhù-piⁿ to iàm-chiān; hó-gia̍h-lâng pêng-iú chin chōe.

²¹ Khòaⁿ-khin chhù-piⁿ ê lâng ū chōe; lîn-bín sàn-chhiah ê lâng ū hok-khì.

²² Kè-bô͘ pháiⁿ-tāi ōe kiâⁿ-ji̍p bê-lō͘; kè-bô͘ hó-sū ōe tit-tio̍h lâng ê chin-sêng lîn-bín.

²³ Ta̍k-khoán ê phah-piàⁿ lóng ū lī-ek; khong-tâm ōe tì-kàu sàn-chhiah.

²⁴ Tì-hūi ê lâng ê châi-hù sī in ê hoa-koan; gōng-lâng ê gōng kàu-bé mā-sī gōng.

²⁵ Kóng si̍t-ōe choh-chèng kiù lâng ê sìⁿ-miā; choh gūi-chèng sī ēng khúi-chà hāi lâng.

²⁶ Kèng-ùi Siōng Chú ū kian-kò͘ ê óa-khò; i ê kiáⁿ-jî ū tô-siám ê só͘-chāi.

²⁷ Kèng-ùi Siōng Chú sī oa̍h-miā ê chúi-chôaⁿ, hō͘ lâng bián hām-lo̍h sí-bông ê lô-bāng.

²⁸ Peh-sìⁿ chōe, kok-ông ū êng-kng; jîn-bîn chió, jîn-kun chiū soe-pāi.

²⁹ Bōe khoài siū-khì sī tōa chhong-bêng; bô nāi-sim--ê hián-chhut gû-gōng.

³⁰ Sim pêng-chēng hō͘ sin-thé kiān-khong; oàn-tò͘ hō͘ kut-thâu hiú-nōa.

³¹ Ap-pek sàn-chhiah-lâng sī siat-to̍k chhòng-chō in ê Chú; hó khoán-thāi bô-chîⁿ-lâng sī chun-kèng Chú.

³² Pháiⁿ-lâng ōe in-ūi só͘ chòe ê pháiⁿ bia̍t-bông; gī-lâng kàu sí iáu ū óa-khò.

³³ Tì-hūi ài tiàm tī chhong-bêng-lâng ê sim-lāi; gōng-lâng ê sim-lāi chhē bô tì-hūi.

³⁴ Kong-gī hō͘ kok-ka kiông-sēng; chōe-ok hō͘ jîn-bîn siū lêng-jio̍k.

³⁵ Ông ì-ài ēng tì-hūi pān tāi-chì ê koaⁿ-oân, chek-hoa̍t sit-chit ê jîn-sîn.

The Bible Society in Taiwan

Lean sinn:

Ceanglaichean taic

Sanasan