Chim-giân 13 - 現代台語譯本羅馬字版

¹ Tì-hūi ê kiáⁿ thiaⁿ-thàn lāu-pē ê kàu-tō; chū-ko chū-tāi ê lâng m̄ thiaⁿ chek-pī.

² Lâng kóng hó-ōe ū hó ê sêng-kó; kan-chà ê lâng tô͘-bô͘ kiông-pō.

³ Iok-sok chhùi-chi̍h, pó-choân sìⁿ-miā; sûi-piān khui-chhùi, tì-kàu húi-bia̍t.

⁴ Pîn-tōaⁿ ê lâng sim him-bō͘, mā tit bōe tio̍h; phah-piàⁿ ê lâng ōe sim-móa-ì-chiok.

⁵ Gī-lâng iàm-ò͘ⁿ pe̍h-chha̍t-ōe; pháiⁿ-lâng sit thé-biān, lâu chhàu-miâ.

⁶ Kong-gī pó-hō͘ chèng-ti̍t ê lâng; siâ-ok pāi-hoāi ū-chōe ê lâng.

⁷ Ū lâng chng-chòe hó-gia̍h, kî-si̍t bô-pòaⁿ-hāng; ū lâng chng-chòe sàn-chhiah, kî-si̍t ū chin chōe châi-bu̍t.

⁸ Hó-gia̍h-lâng ēng chîⁿ sio̍k-miā; sàn-chhiah-lâng m̄ kiaⁿ lâng ui-hia̍p.

⁹ Gī-lâng ê kng ōe bêng-liāng; pháiⁿ-lâng ê teng ōe sit--khì.

¹⁰ Kiau-ngō͘ it-tēng khí saⁿ-chiⁿ; thiaⁿ lâng khó͘-khǹg ū tì-hūi.

¹¹ M̄-sī phah-piàⁿ tit--tio̍h ê chîⁿ ōe ná kiám-chió; lâu-kōaⁿ chek-chū ê chîⁿ ōe ná ke-thiⁿ.

¹² Só͘ ǹg-bāng--ê kú bô si̍t-hiān, sim chiū thòng-khó͘ sit-chì; só͘ ì-ài--ê chi̍t-ē si̍t-hiān, sìⁿ-miā chiū chhiong-móa oa̍h-le̍k.

¹³ Biáu-sī kà-sī, chū-chhú-bia̍t-bông; chun-tiōng kài-bēng, tit-tio̍h pò-siúⁿ.

¹⁴ Chhong-bêng-lâng ê kà-sī sī oa̍h-miā ê chúi-chôaⁿ, hō͘ lâng bián hām-lo̍h sí-bông ê lô-bāng.

¹⁵ Bêng-lí ê lâng ōe siū chun-tiōng, siū chiap-la̍p; kan-chà ê lâng ê lō͘ khâm-khia̍t pháiⁿ-kiâⁿ.

¹⁶ Thong-ta̍t ê lâng ēng tì-hūi chòe tāi-chì; gōng-lâng hián-lō͘ ka-kī ê gû-gōng.

¹⁷ Pháiⁿ ê sù-chiá hō͘ lâng hām-lo̍h chai-hō; tiong-sìn ê chhe-sài hō͘ lâng tit-tio̍h i-tī kiù-chō͘.

¹⁸ Kū-choa̍t kàu-tok, ōe tì-kàu sàn-chhiah kiàn-siàu; goān-ì siū chek-pī, ōe siū kèng-tiōng.

¹⁹ Só͘ ì-ài--ê si̍t-hiān, sim chiū hoaⁿ-hí; lī-khui pháiⁿ-tāi, gōng-lâng m̄-goān.

²⁰ Kap tì-hūi ê lâng tâng-kiâⁿ chiū ū tì-hūi; kap gōng-lâng choh-phōaⁿ ōe siū siong-hāi.

²¹ Chai-hō ōe tui-jip chōe-jîn; hoân-êng sī gī-lâng ê pò-siúⁿ.

²² Hó-lâng lâu sán-gia̍p hō͘ kiáⁿ-sun; chōe-jîn chek-chū ê châi-hù chòe-āu kui gī-lâng.

²³ Sàn-chhiah-lâng ê chhân-hn̂g seng-sán chin chōe bí-niû, m̄-kú in-ūi bô kong-gī soah lóng siū chhiúⁿ-toa̍t.

²⁴ M̄-kam chek-hoa̍t kiáⁿ-jî sī bô thiàⁿ in; nā thiàⁿ in, chiū tio̍h chiàu-sî chek-tok.

²⁵ Gī-lâng ōe-tàng chia̍h kah sim-móa-ì-chiok; pháiⁿ-lâng ê pak-tó͘ put-sî iau-iau.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan