Chim-giân 12 - 現代台語譯本羅馬字版

¹ Ì-ài tì-sek ê lâng hoaⁿ-hí chiap-siū koán-kàu; gōng-lâng iàm-ò͘ⁿ chek-pī.

² Hó-lâng ōe tit-tio̍h Siōng Chú si-un; khúi-kè-to-toan ê lâng ōe siū Siōng Chú tēng-chōe.

³ Lâng bōe-tàng tùi chòe pháiⁿ tit-tio̍h an-choân; gī-lâng ê kun-ki éng-oán bōe tōng-iâu.

⁴ Châi-tek ê hū-jîn-lâng sī tiōng-hu ê hoa-koan; m̄-chai kiàn-siàu ê hū-jîn-lâng chhin-chhiūⁿ tiōng-hu kut-lāi ê to̍k-liû.

⁵ Gī-lâng ê ì-liām sì-chiàⁿ; pháiⁿ-lâng ê kè-bô͘ khúi-chà.

⁶ Pháiⁿ-lâng ê giân-lūn tng-tán beh thâi-lâng; chèng-ti̍t-lâng ê chhùi ōe kiù lâng.

⁷ Pháiⁿ-lâng ōe siū chhia-tó siau-sit; gī-lâng ê ke ōe kian-kò͘.

⁸ Lâng in-ūi tì-hūi siū o-ló; sim oai-khiok sī-hui ōe siū biáu-sī.

⁹ Pi-chiān ê lâng thàn ū chia̍h, khah iâⁿ phòng-hong chū-tāi ê lâng bô mi̍h thang chia̍h.

¹⁰ Gī-lâng koan-sim i ê cheng-siⁿ ê sìⁿ-miā; pháiⁿ-lâng liân tùi lâng tông-chêng to chân-jím.

¹¹ Chèng-choh ê lâng ū kàu-gia̍h ê bí-niû; tui-kiû khang-khang bô kè-ta̍t ê sū sī bô tì-sek.

¹² Pháiⁿ-lâng tham-ài siâ-ok ê lâng chhiúⁿ--lâi ê châi-bu̍t; gī-lâng ê kun ōe kiat ké-chí.

¹³ Siâ-ok ê lâng in-ūi chhùi-tûn ê kè-sit poa̍h-lo̍h ka-kī ê lô-bāng; gī-lâng ōe thoat-lī hoān-lān.

¹⁴ Lâng tùi chhùi só͘ kiat ê ké-chí tit-tio̍h móa-móa ê hok-khì; ta̍k-ê lâng chiàu i ê só͘-chòe siū pò-èng.

¹⁵ Gōng-lâng khòaⁿ ka-kī ê lō͘ chòe tio̍h; chhong-bêng ê lâng thiaⁿ lâng khó͘-khǹg.

¹⁶ Gōng-lâng chin khoài hián-chhut siū-khì; bêng-lí ê lâng jím-siū bú-jio̍k.

¹⁷ Kóng si̍t-ōe choh-chèng chiong-hián kong-gī; lām-sám choh-chèng hián-chhut khúi-khiat.

¹⁸ Kóng-ōe bô kín-sīn chhin-chhiūⁿ ēng to chha̍k--lâng; tì-hūi ê lâng ê chi̍h i-tī lâng.

¹⁹ Sêng-si̍t ê chhùi éng-oán khó-khò; pe̍h-chha̍t ê chi̍h chí-ū tòng chi̍t-sî-á-kú.

²⁰ Tô͘-bô͘ pháiⁿ-tāi ê lâng sim chûn khúi-chà; khǹg lâng hô-hó ê lâng ōe khoài-lo̍k.

²¹ Gī-lâng bōe tú-tio̍h chai-hāi; pháiⁿ-lâng ōe tú-tio̍h chin chōe chai-hō.

²² Pe̍h-chha̍t ê chhùi-tûn, Siōng Chú iàm-ò͘ⁿ; chòe tāi-chì sêng-si̍t, I só͘ hoaⁿ-hí.

²³ Bêng-lí ê lâng khǹg-ba̍t tì-sek; gōng-lâng ê sim hián-lō͘ gû-gōng.

²⁴ Un-khûn ê chhiú ū-la̍t chiáng-koân; pîn-tōaⁿ ê lâng kā lâng chòe khó͘-kang.

²⁵ Sim ū khòa-lū, hō͘ lâng lóe-chì; chi̍t kù hó-ōe, hō͘ lâng hoaⁿ-hí.

²⁶ Gī-lâng chhōa chhù-piⁿ kiâⁿ chiàⁿ-lō͘; pháiⁿ-lâng chhōa lâng kiâⁿ bê-lō͘.

²⁷ Pîn-tōaⁿ ê lâng ū bah mā bô beh hang; phah-piàⁿ ê lâng ōe tit-tio̍h pó-kùi ê châi-bu̍t.

²⁸ Chèng-ti̍t ê lō͘ hō͘ lâng tit-tio̍h sìⁿ-miā; siâ-ok ê lō͘ thàng kàu sí-bông.

The Bible Society in Taiwan

Lean sinn:

Ceanglaichean taic

Sanasan