Chim-giân 11 - 現代台語譯本羅馬字版

¹ Khi-phiàn ê thian-phêng, Siōng Chú iàm-ò͘ⁿ; kong-pêng ê chhìn-thûi, I só͘ ì-ài.

² Ū kiau-ngō͘ chiū ū kiàn-siàu; ū khiam-pi chiū ū tì-hūi.

³ Chèng-ti̍t ê lâng ū sêng-si̍t teh ín-chhōa; khúi-khiat ê lâng in-ūi kan-chà tì-kàu húi-bia̍t.

⁴ Siōng Chú tōa siū-khì ê ji̍t, chîⁿ-châi bô lō͘-ēng, chí-ū kong-gī ōe kiù lâng thoat-lī sí-bông.

⁵ Bô thang chí-chek ê gī-lâng, i ê lō͘ ti̍t, hó kiâⁿ; pháiⁿ-lâng ōe in-ūi ka-kī ê siâ-ok poa̍h-tó sit-pāi.

⁶ Chèng-ti̍t ê lâng ōe hō͘ ka-kī ê gī kiù--tio̍h; kan-chà ê lâng ōe hām-lo̍h ka-kī ê pháiⁿ só͘ siat ê lô-bāng.

⁷ Pháiⁿ-lâng chi̍t-ē sí, i ê ǹg-bāng chiū bô--khì, i só͘ kî-thāi--ê mā ōe siau-sit.

⁸ Gī-lâng ōe-tàng thoat-lī hoān-lān; pháiⁿ-lâng hoán-tńg hām-lo̍h hit lāi-bīn.

⁹ Gán-tiong bô Siōng-tè ê lâng kóng-ōe hāi chhù-piⁿ; gī-lâng in-ūi tì-sek tit-tio̍h kái-kiù.

¹⁰ Gī-lâng sūn-lī heng-thong, thong-siâⁿ hoaⁿ-hí; pháiⁿ-lâng bia̍t-bông, lâng lóng tōa-siaⁿ khèng-chiok.

¹¹ Siâⁿ in-ūi chèng-ti̍t-lâng ê chiok-hok heng-khí, in-ūi pháiⁿ-lâng ê ōe tó-hoāi.

¹² Biáu-sī chhù-piⁿ ê lâng bô siông-sek; bêng-lí ê lâng chēng-chēng bô chhut-siaⁿ.

¹³ Sì-kòe kóng lâng sī-hui--ê, ōe lāu-sia̍p lâng ê pì-bi̍t; sêng-si̍t khó-khò ê lâng khǹg-ba̍t tāi-chì.

¹⁴ Bô hó ê léng-tō, kok-ka chiū soe-pāi; kò͘-būn chōe, jîn-bîn chiū an-ún.

¹⁵ Kā siⁿ-hūn-lâng pó-chèng ōe siū tōa khek-khui; kū-choa̍t kā lâng tam-pó chiū an-choân.

¹⁶ Hiân-hūi ê hū-jîn-lâng siū lâng kèng-tiōng; pāi-tek ê hū-jîn-lâng chū-chhú-thí-jio̍k. Pîn-tōaⁿ ê ta-po͘-lâng ōe sàn-chhiah; kian-kiông ê ta-po͘-lâng ōe hó-gia̍h.

¹⁷ Jîn-chû ê lâng ka-kī tit-tio̍h lī-ek; chân-jím ê lâng ka-kī siū siong-hāi.

¹⁸ Pháiⁿ-lâng tit--tio̍h ê kang-chîⁿ sī khang-khang; iā gī ê chéng-chí tit--tio̍h ê pò-siúⁿ chiah sī si̍t-chāi.

¹⁹ Kian-chhî kong-gī, tit-tio̍h sìⁿ-miā; kè-sio̍k chòe pháiⁿ, tì-kàu sí-bông.

²⁰ Oai-khiok sī-hui ê sim, Siōng Chú iàm-ò͘ⁿ; hêng-ûi chèng-ti̍t, I só͘ ì-ài.

²¹ Pháiⁿ-lâng it-tēng siū hêng-hoa̍t; gī-lâng ê hō͘-tāi ōe tit-tio̍h kái-kiù.

²² Hū-jîn-lâng súi nā bô bêng-lí, chhin-chhiūⁿ kim-khoân kòa tī ti ê phīⁿ.

²³ Gī-lâng só͘ ì-ài--ê, chòe-āu lóng sī hó; pháiⁿ-lâng tui-kiû--ê, jiá Siōng-tè siū-khì.

²⁴ Lâng ná si-sià chiū ná hó-gia̍h; lâng ná tàng-sng chiū ná sàn-chhiah.

²⁵ Ài si-sià--ê, jú hong-sēng; pang-chān lâng--ê, tit-tio̍h pang-chān.

²⁶ Tún-chek ngó͘-kok m̄ bōe, ōe siū chiù-chó͘; hoaⁿ-hí bōe-chhut, ōe siū chiok-hok.

²⁷ Chhut-la̍t chòe hó, ōe tit-tio̍h un-hūi; tui-kiû siâ-ok, ōe tú-tio̍h chai-hō.

²⁸ Óa-khò ka-kī ê chîⁿ-châi, ōe poa̍h-tó sit-pāi; gī-lâng ōe heng-ōng chhin-chhiūⁿ chhiⁿ-chhùi ê chhiū-hio̍h.

²⁹ Jiá-khí ka-têng hun-cheng ê lâng, sím-mi̍h lóng tit bōe tio̍h; gōng-lâng ōe chòe chhong-bêng-lâng ê lô͘-po̍k.

³⁰ Gī-lâng kiat ê ké-chí sī sìⁿ-miā; kiông-pō ê lâng chân-hāi sìⁿ-miā.

³¹ Gī-lâng tī sè-kan tit-tio̍h pò-siúⁿ; ū-chōe ê pháiⁿ-lâng it-tēng siū pò-èng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan