Chim-giân 1 - 現代台語譯本羅馬字版

Chim-giân ê Kè-ta̍t

¹ Tāi-pi̍t ê kiáⁿ, Í-sek-lia̍t-ông Só͘-lô-bûn ê chim-giân.

² Chiah-ê chim-giân ōe hō͘ lâng tit-tio̍h tì-hūi kap kà-sī, lí-kái chhim-ò ê tō-lí;

³ ōe hō͘ lâng siū kà-sī, ēng tì-hūi pān tāi-chì, si̍t-chián kong-gī, kong-chèng, kap kong-pêng.

⁴ Chiah-ê ōe ōe hō͘ gōng-ti̍t ê lâng ū lêng-khiáu, hō͘ siàu-liân-lâng ū tì-sek, gâu kè-ōe;

⁵ ōe hō͘ ū tì-hūi ê lâng thiaⁿ-liáu ke-thiⁿ ha̍k-sek, hō͘ chhong-bêng ê lâng tit-tio̍h chin ê kiàn-sek;

⁶ ōe hō͘ lâng bêng-pe̍k chim-giân kap phì-jū, liáu-kái tì-hūi ê lâng ê ōe kap gū-giân.

⁷ Kèng-ùi Siōng Chú sī tì-sek ê kun-pún; gû-gōng ê lâng biáu-sī tì-hūi kap kà-sī.

Tùi Siàu-liân-lâng ê Khoàn-kò

⁸ Góa ê kiáⁿ ah, tio̍h thiaⁿ lāu-pē ê kàu-tok; m̄-thang khì-sak lāu-bú ê kà-sī.

⁹ In-ūi chiah-ê ōe ōe chòe lí thâu-khak téng ê hoa-koan, chòe lí ām-kún ê kim-liān.

¹⁰ Góa ê kiáⁿ ah, pháiⁿ-lâng nā ín-iú lí, m̄-thang tè i khì.

¹¹ In nā kóng, “Kap goán tàu-tīn lâi-khì, lâi-khì bâi-ho̍k thâi-lâng, tng-tán bû-ko͘ ê lâng, lâi kā thâi.

¹² Lán chhin-chhiūⁿ Im-hú lâi kā in oa̍h-oa̍h thun--lo̍h-khì; in ōe chhin-chhiūⁿ hām-lo̍h Chhim-khiⁿ ê lâng hō͘ lán kui-ê thun--lo̍h-khì.

¹³ Lán ōe-tàng tit-tio̍h ta̍k-khoán ê châi-bu̍t, só͘ chhiúⁿ--ê tún-móa lán ê chhù.

¹⁴ Lí lâi ka-ji̍p goán ê tóng, chhiúⁿ--lâi ê châi-bu̍t tāi-ke lóng ū hūn.”

¹⁵ Góa ê kiáⁿ ah, m̄-thang tè in khì, tio̍h iok-sok lí ê kha bô ta̍h-ji̍p in ê lō͘.

¹⁶ In-ūi in kóaⁿ beh chòe pháiⁿ, kip beh thâi-lâng.

¹⁷ Tī chiáu-á ê ba̍k-chiu chêng siat lô-bāng, só͘ chòe bô-chhái-kang.

¹⁸ In bâi-ho̍k beh hāi lâng, hoán-tńg hāi-tio̍h ka-kī, tng-tán beh siong lâng, tian-tò siong-tio̍h ka-kī.

¹⁹ Lâng nā put-te̍k-chhiú-tōaⁿ chhú-tit châi-lī, kiat-kio̍k it-tēng sit-khì ka-kī ê sìⁿ-miā.

Tì-hūi ê Ho͘-siaⁿ

²⁰ Tì-hūi tī koe-lō͘ tōa-siaⁿ teh kiò, tī chhī-tiûⁿ-kháu tōa-siaⁿ teh hoah;

²¹ tī lāu-jia̍t ê koe-lō͘-thâu tōa-siaⁿ teh kiò, tī siâⁿ-mn̂g-kháu tōa-siaⁿ kóng,

²² “Gōng-ti̍t ê lâng ài gōng-ti̍t beh jōa kú? Biáu-sī tì-sek ê lâng ài biáu-sī tì-sek beh jōa kú? Gû-gōng ê lâng iàm-ò͘ⁿ tì-sek beh jōa kú?

²³ Góa chek-pī lín, lín nā thiaⁿ-thàn, góa beh tùi lín thò͘-lō͘ góa ê sim-ì, hō͘ lín bêng-pe̍k góa ê ōe.

²⁴ Góa kiò, lín m̄ thiaⁿ; góa iau-chhiáⁿ, bô lâng hoán-èng;

²⁵ lín bû-sī góa it-chhè ê khoàn-kài, m̄-khéng chiap-siū góa ê chek-pī.

²⁶ Só͘-í, lín tú-tio̍h hoān-lān, góa beh léng-chhiò; lín tú-tio̍h kiaⁿ-hiâⁿ, góa beh thí-chhiò.

²⁷ Tng kiaⁿ-hiâⁿ chhin-chhiūⁿ kông-hong chhe--lâi, chai-hō chhin-chhiūⁿ kńg-lê-á-hong sàu--lâi, hoān-lān thòng-khó͘ lîm-kàu lín,

²⁸ hit-sî lín beh kiû-kiò góa, góa m̄ thiaⁿ, pek-chhiat chhē góa, chhē bōe tio̍h.

²⁹ In-ūi lín iàm-ò͘ⁿ tì-sek, bô ài kèng-ùi Siōng Chú,

³⁰ m̄ thiaⁿ góa ê khoàn-kài, biáu-sī góa ê chek-pī,

³¹ só͘-í lín ōe chia̍h ka-kī só͘ chèng ê pháiⁿ ké-chí, ka-kī kè-bô͘ ê ok-kó chia̍h kah pá koh ià.

³² Gōng-ti̍t ê lâng ōe hō͘ ka-kī ê kò͘-chip hāi-sí; gû-gōng ê lâng ōe in-ūi chū-boán tì-kàu bia̍t-bông.

³³ M̄-kú thiaⁿ-thàn góa ê ōe ê lâng ōe an-ún khiā-khí, bián kiaⁿ chai-hō, hióng-siū pêng-an.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan