Bí-ka-su 4 - 現代台語譯本羅馬字版Éng-oán ê Hô-pêng ( Sài 2.2-4 ) 1 Tī chiong-lâi ê ji̍t-chí, Siōng Chú sèng-tiān ê soaⁿ ōe kian-li̍p tī chèng-soaⁿ ê téng-bīn, pí lóng-chóng ê soaⁿ-niá khah koân; bān-bîn lóng ōe ek óa-lâi kui I. 2 Bān-kok ōe lâi, kóng, “Lán lâi chiūⁿ Siōng Chú ê soaⁿ, lâi-khì Ngá-kok ê Siōng-tè ê tiān. I ōe ēng I ê tō-lō͘ kà-sī lán, hō͘ lán thang kiâⁿ I ê lō͘.” Lu̍t-hoat ōe tùi Sek-an hoat-chhut; Siōng Chú ê ōe ōe tùi Iâ-lō͘-sat-léng thoân-khui. 3 I ōe tī bān-bîn tiong si-hêng sím-phòaⁿ, ūi hn̄g-hn̄g ê kiông-kok pâi-kái hun-cheng; in ōe chiong to phah-chòe lôe-thâu, chiong chhiuⁿ phah-chòe liâm-to; chit-kok bōe koh gia̍h to kong-kek hit-kok, mā bián koh o̍h chiàn-cheng. 4 Ta̍k-ê lâng lóng chē tī ka-kī ê phû-tô-chhiū kha kap bû-hoa-kó-chhiū kha, bô lâng ōe kā in phah-chhiⁿ-kiaⁿ; che sī Siōng Chú — Bān-kun ê Thóng-sòe chhin-chhùi kóng--ê. 5 Sui-jiân bān-bîn lóng khò ka-kī sîn-bêng ê miâ seng-oa̍h, m̄-kú goán beh hōng Siōng Chú — goán ê Siōng-tè ê miâ kiâⁿ-ta̍h, ti̍t-kàu éng-éng-oán-oán. Í-sek-lia̍t-lâng Kui-hôe Pún-kok 6 Siōng Chú kóng, “Tī hit-ji̍t, góa beh chū-chi̍p kha-pái--ê, chio-chi̍p siū hòng-tio̍k--ê, kap góa bat hō͘ in siū-khó͘--ê. 7 Góa beh hō͘ kha-pái--ê chiâⁿ-chòe só͘ chhun ê chú-bîn, hō͘ siū hòng-tio̍k--ê chiâⁿ-chòe kiông-kok. Siōng Chú beh tī Sek-an-soaⁿ choh-ông tī-lí in, tùi chit-sî kàu éng-oán.” 8 Iâ-lō͘-sat-léng ah, Sek-an-siâⁿ ê pó-lúi ah, lí chòe iûⁿ-kûn ê siú-bōng-tâi, chá-chêng ê chú-koân beh koh kui hō͘ lí, ông-koân beh hôe-ho̍k hō͘ lí. 9 Lí sī-án-chóaⁿ teh tōa-siaⁿ ai-khàu? Sī in-ūi lí bô ông, tāi-sîn sí-liáu-liáu, lí chiah chhin-chhiūⁿ sán-hū chhui-chūn thòng-khó͘ sī--bô? 10 Sek-an ê chú-bîn ah, lí ōe chhin-chhiūⁿ sán-hū chhui-chūn thòng-khó͘, in-ūi lí ōe lī-khui chit-ê siâⁿ khì tòa tī iá-gōa, khì kàu Pa-pí-lûn, m̄-kú lí ōe tī hia tit-tio̍h kái-kiù. Siōng Chú beh tùi tùi-te̍k ê chhiú-tiong kā lí sio̍k-hôe. 11 Hiān-chāi chin chōe kok-ka í-keng liân-ha̍p khí-lâi beh kong-kek lí. In kóng: Tio̍h hō͘ Sek-an siū lêng-jio̍k, lán thang chhin-ba̍k khòaⁿ--tio̍h. 12 M̄-kú in m̄ chai Siōng Chú ê sim-ì, bô bêng-pe̍k I ê kè-ōe; I í-keng kā in chū-chi̍p--khí-lâi, chhin-chhiūⁿ siu-chi̍p be̍h-khún tī ngó͘-kok-tiûⁿ. 13 Siōng Chú kóng: Sek-an ê chú-bîn ah, khí-lâi lún ngó͘-kok. Góa beh hō͘ lí thih ê kak, tâng ê kha-tôe, thang phah-chhùi lia̍t-kok, chiong in só͘ chhiúⁿ ê mi̍h the̍h-lâi hiàn hō͘ góa, chiong in ê châi-bu̍t hiàn hō͘ phó͘-thiⁿ-ē ê Chú. |
The Bible Society in Taiwan
Bible Society in Taiwan