Bìoball air-loidhne

Bí-ka-su 3 - 現代台語譯本羅馬字版

Chí-chek Í-sek-lia̍t ê Léng-siù

¹ Góa kóng: Ngá-kok ê siú-léng, Í-sek-lia̍t-lâng ê koaⁿ-tiúⁿ, tio̍h thiaⁿ! Lín kiám m̄ chai sím-mi̍h sī kong-pêng?

² Lín iàm-ò͘ⁿ liông-siān, ì-ài siâ-ok; lín pak lâng ê phê, thek lâng ê kut.

³ Lín chia̍h góa chú-bîn ê bah, pak in ê phê, kòng-tn̄g in ê kut-thâu, tok chi̍t-tè chi̍t-tè, chhin-chhiūⁿ beh lo̍h tiáⁿ chú ê bah.

⁴ Ū chi̍t ji̍t, lín beh kiû-kiò Siōng Chú, m̄-kú I bōe ìn-tap lín; hit-sî I ōe bīn oa̍t-cháu m̄ chhap lín, in-ūi lín ū chòe siâ-ok ê sū.

⁵ Iú-koan chhōa góa ê chú-bîn kiâⁿ bê-lō͘ ê sian-ti, Siōng Chú án-ni kóng: In ê chhùi nā ū mi̍h thang pō͘, chiū kóng “Pêng-an hô-pêng”; lâng nā bô ēng mi̍h that in ê chhùi, in chiū tùi hiah-ê lâng soan-chiàn.

⁶ Só͘-í, mî--sî beh kàu, lín khòaⁿ bōe tio̍h īⁿ-siōng; o͘-àm beh lâi, lín bōe-tàng pok-kòa. Tùi lín chiah-ê sian-ti, ji̍t-thâu ōe lo̍h--khì, ji̍t--sî ōe pìⁿ àm-mî.

⁷ Hit-sî, sian-kiàn ōe kiàn-siàu, pok-kòa--ê ōe làu-khùi; in lóng ng-chhùi tiām--khì, in-ūi Siōng-tè bô hôe-èng.

⁸ Góa leh, Siōng Chú ê sîn hō͘ góa chhiong-móa khùi-la̍t, chèng-gī-kám, kap ióng-khì, thang tùi Ngá-kok soan-kò i ê kè-sit, tùi Í-sek-lia̍t chí-chhut i ê chōe.

⁹ Ngá-kok ê siú-léng, Í-sek-lia̍t-lâng ê koaⁿ-tiúⁿ, tio̍h chù-ì thiaⁿ! Lín iàm-ò͘ⁿ chèng-gī, tian-tò sī-hui.

¹⁰ Lín ēng huih kiàn-li̍p Sek-an, ēng chōe-ok khí-chō Iâ-lō͘-sat-léng.

¹¹ Lín ê siú-léng sím-phòaⁿ ê sî siu hóe-lō͘, chè-si ūi-tio̍h kang-chîⁿ kà-sī, sian-ti ūi-tio̍h chîⁿ kóe-seh Siōng-tè ê chí-sī; in kèng-jiân káⁿ hōng Siōng Chú ê miâ kóng, “Siōng Chú tī lán tiong-kan, chai-hō bōe lîm-kàu lán.”

¹² Só͘-í, in-ūi lín ê iân-kò͘, Sek-an ōe chhin-chhiūⁿ chhân-hn̂g hō͘ lâng lôe, Iâ-lō͘-sat-léng ōe pìⁿ-chòe thô͘-tui, chit-ê tiān ê soaⁿ ōe pìⁿ-chòe chhiū-nâ ê soaⁿ-lûn-á.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan