Bîn-sò͘-kì 9 - 現代台語譯本羅馬字版

Tī Se-nāi-soaⁿ Siú Pôaⁿ-kè-choeh

¹ Chhut Ai-ki̍p tē-jī nî chiaⁿ--ge̍h, Siōng Chú tī Se-nāi ê khòng-iá bēng-lēng Mô͘-se kóng,

² “Í-sek-lia̍t-lâng tio̍h tī chí-tēng ê ji̍t-kî siú Pôaⁿ-kè-choeh;

³ chiū-sī tī chit kò-ge̍h ê cha̍p-sì, chiàu chí-tēng ê sî-kan, tùi hông-hun ê sî khí, chiàu só͘-ū ê kui-lē kap bēng-lēng chun-siú.”

⁴ Mô͘-se chiū bēng-lēng Í-sek-lia̍t-lâng siú Pôaⁿ-kè-choeh.

⁵ Chiaⁿ-ge̍h cha̍p-sì hông-hun ê sî, in chiū tī Se-nāi ê khòng-iá siú Pôaⁿ-kè-choeh. Só͘-ū Siōng Chú bēng-lēng Mô͘-se--ê, Í-sek-lia̍t-lâng lóng chiàu án-ni chòe.

⁶ Ū chi̍t-kóa lâng in-ūi bong-tio̍h lâng ê si-thé chiâⁿ-chòe bô chheng-khì, bōe-tàng tī hit-ji̍t siú Pôaⁿ-kè-choeh; hit-ji̍t in khì kìⁿ Mô͘-se kap A-lûn,

⁷ kóng, “Goán in-ūi bong-tio̍h si-thé chiâⁿ-chòe bô chheng-khì, sī-án-chóaⁿ chiū bōe-ēng-tit tī chí-tēng ê sî-kan, kap Í-sek-lia̍t-lâng chòe-hé hiàn lé-mi̍h hō͘ Siōng Chú?”

⁸ Mô͘-se kā in kóng, “Lín tiàm chia tán--chi̍t-ē, góa beh thiaⁿ Siōng Chú tùi lín ū sím-mi̍h chí-sī.”

⁹ Siōng Chú bēng-lēng Mô͘-se

¹⁰ tio̍h tùi Í-sek-lia̍t-lâng soan-pò͘, “Lín á-sī lín ê hō͘-tāi nā ū lâng hō͘ si-thé bak lâ-sâm, á-sī chhut-gōa khì hn̄g-hn̄g ê só͘-chāi, iû-goân tio̍h siú Siōng Chú ê Pôaⁿ-kè-choeh.

¹¹ In tio̍h bān chi̍t kò-ge̍h, tī jī-ge̍h cha̍p-sì hông-hun ê sî siú-choeh, chia̍h iûⁿ-ko, bô-kàⁿ-piáⁿ, kap khó͘-chhài,

¹² liân chi̍t-tiám-á to m̄-thang lâu kàu keh-chá-khí, iûⁿ-á ê kut liân chi̍t ki mā m̄-thang phah-tn̄g. In tio̍h chiàu Pôaⁿ-kè-choeh só͘-ū ê kui-lē siú chit-ê choeh.

¹³ Nā ū lâng sī chheng-khì mā bô chhut-gōa, m̄-kú bô siú Pôaⁿ-kè-choeh, tio̍h kā i tùi jîn-bîn ê tiong-kan kek-chhut, in-ūi i tī chí-tēng ê ji̍t bô hiàn lé-mi̍h hō͘ Siōng Chú, i tio̍h tùi ka-kī ê chōe hū chek-jīm.

¹⁴ “Nā ū gōa-cho̍k-lâng kià-ku tī lín tiong-kan, ài-beh siú Siōng Chú ê Pôaⁿ-kè-choeh, i tio̍h chun-siú Pôaⁿ-kè-choeh ê kui-lē kap bēng-lēng; chhut-gōa-lâng kap pún-tōe-lâng lóng tio̍h chun-siú kâng chi̍t ê kui-lē.”

Hûn Jia-khàm Hōe-bō͘
( Chhut 40.34-38 )

¹⁵ Tah hōe-bō͘ hit-ji̍t, ū hûn jia-khàm hōe-bō͘, chiū-sī iok-kūi ê tiùⁿ-bō͘; tùi hông-hun kàu chá-khí, ū khòaⁿ--khí-lâi chhin-chhiūⁿ hé ê hûn khàm tī hōe-bō͘ téng-bīn.

¹⁶ Hûn put-sî jia-khàm hōe-bō͘, mî--sî khòaⁿ--khí-lâi chhin-chhiūⁿ hé.

¹⁷ Hûn sím-mi̍h sî tùi hōe-bō͘ seng-koân, Í-sek-lia̍t-lâng chiū chhut-hoat; hûn thêng tī sím-mi̍h só͘-chāi, Í-sek-lia̍t-lâng chiū tī hia chat-iâⁿ.

¹⁸ Í-sek-lia̍t-lâng chiàu Siōng Chú ê bēng-lēng khí-kiâⁿ, mā chiàu Siōng Chú ê bēng-lēng chat-iâⁿ; hûn thêng tī hōe-bō͘ téng jōa kú, in chiū tī hia chat-iâⁿ hiah kú.

¹⁹ Hûn tī hōe-bō͘ téng thêng chōe-chōe ji̍t, Í-sek-lia̍t-lâng chiū chiàu Siōng Chú ê bēng-lēng bô khí-kiâⁿ.

²⁰ Ū-sî hûn tī hōe-bō͘ téng thêng bô kúi ji̍t, in chiàu Siōng Chú ê bēng-lēng iû-goân thêng-liû tī hia, mā chiàu Siōng Chú ê bēng-lēng khí-kiâⁿ.

²¹ Ū-sî hûn tùi ē-hng kàu chá-khí jia--teh, keh-chá-khí hûn chi̍t-ē seng-koân, in chiū chhut-hoat; bô-lūn ji̍t--sî á-sī mî--sî hûn seng-koân, in chiū chhut-hoat.

²² Hûn thêng tī hōe-bō͘ téng-bīn, bô-lūn sī nn̄g ji̍t, sī chi̍t ge̍h-ji̍t, sī chi̍t nî, Í-sek-lia̍t-lâng iû-goân thêng-liû tī hia, bô khí-kiâⁿ; m̄-kú hûn chi̍t-ē seng-koân, in chiū khí-kiâⁿ.

²³ In chiàu Siōng Chú ê bēng-lēng chat-iâⁿ, mā chiàu Siōng Chú ê bēng-lēng khí-kiâⁿ; in lóng chiàu Siōng Chú thong-kè Mô͘-se ê chí-sī, chun-siú Siōng Chú ê bēng-lēng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan