Bîn-sò͘-kì 8 - 現代台語譯本羅馬字版

Chhit Chóaⁿ Teng

¹ Siōng Chú hoan-hù Mô͘-se

² tùi A-lûn kóng, “Lí tiám-teng ê sî, chhit chóaⁿ teng lóng tio̍h chiò ǹg thâu-chêng.”

³ A-lûn chiū chiàu Siōng Chú tùi Mô͘-se ê bēng-lēng, tiám-teng chiò-kng teng-tâi ê thâu-chêng.

⁴ Chit-ê teng-tâi lóng ēng kim phah, liân i ê chō kap hoe mā án-ni, sī chiàu Siōng Chú chí-sī Mô͘-se ê hêng-thé chō--ê.

Lī-bī-lâng ê Kiat-chēng-lé kap Hōng-hiàn-lé

⁵ Siōng Chú tùi Mô͘-se kóng,

⁶ “Lí tio̍h chiong Lī-bī-lâng tùi Í-sek-lia̍t-lâng ê tiong-kan hun-pia̍t--chhut-lâi, kā in kiat-chēng.

⁷ Lí tio̍h án-ni kā in kiat-chēng: Ēng tû-khì chōe ê chúi hiù tī in ê seng-khu, koh kah in ēng thì-thâu-to thì choân seng-khu ê mn̂g, sóe-saⁿ, án-ni kiat-chēng ka-kī.

⁸ Āu-lâi, in tio̍h chhú chi̍t chiah gû-káng-á, kap chhiau iû ê iù mī-hún ê sò͘-chè; lí mā tio̍h lēng-gōa chhú chi̍t chiah gû-káng-á chòe sio̍k-chōe-chè.

⁹ Lí tio̍h chhōa Lī-bī-lâng lâi kàu hōe-bō͘ chêng, koh chū-chi̍p Í-sek-lia̍t choân hōe-chiòng;

¹⁰ lí chhōa Lī-bī-lâng lâi Siōng Chú bīn-chêng, hō͘ Í-sek-lia̍t-lâng kā in hōaⁿ-chhiú.

¹¹ A-lûn tio̍h chiong Lī-bī-lâng tùi Í-sek-lia̍t-lâng tiong-kan hun-pia̍t--chhut-lâi, chòe te̍k-pia̍t ê lé-mi̍h hiàn hō͘ Siōng Chú, án-ni in chiah thang pān-lí Siōng Chú ê sū-bū.

¹² Lī-bī-lâng tio̍h hōaⁿ-chhiú tī hiah-ê gû-káng-á ê thâu-khak téng; lí tio̍h hiàn chi̍t chiah chòe sio̍k-chōe-chè, chi̍t chiah chòe sio-hòa-chè hō͘ Siōng Chú, ūi Lī-bī-lâng sio̍k-chōe.

¹³ “Lí tio̍h hō͘ Lī-bī-lâng khiā tī A-lûn kap i ê kiáⁿ ê bīn-chêng, chiong in chòe te̍k-pia̍t ê lé-mi̍h hiàn hō͘ Siōng Chú.

¹⁴ Án-ni, lí chiong in tùi Í-sek-lia̍t-lâng tiong-kan hun-pia̍t--chhut-lâi, Lī-bī-lâng chiū kui-sio̍k góa.

¹⁵ Lí kā in kiat-chēng, hiàn-chòe te̍k-pia̍t ê lé-mi̍h; tùi hit-sî khí, in chiū thang ji̍p-khì hōe-bō͘ sū-hōng.

¹⁶ In sī Í-sek-lia̍t-lâng ê tiong-kan oân-choân hiàn hō͘ góa--ê; góa hō͘ in kui-sio̍k góa, tāi-thòe Í-sek-lia̍t-lâng só͘-ū ê thâu-chiūⁿ-kiáⁿ.

¹⁷ In-ūi Í-sek-lia̍t tiong só͘-ū thâu-chiūⁿ-siⁿ ê lâng á-sī cheng-siⁿ, lóng sī góa ê. Góa tī Ai-ki̍p phah-sí in it-chhè thâu-chiūⁿ-siⁿ--ê hit-ji̍t, í-keng chiong Í-sek-lia̍t-lâng hun-pia̍t-choh-sèng kui-sio̍k góa.

¹⁸ Taⁿ góa kéng Lī-bī-lâng tāi-thòe Í-sek-lia̍t-lâng só͘-ū ê thâu-chiūⁿ-kiáⁿ.

¹⁹ Góa tùi Í-sek-lia̍t-lâng ê tiong-kan chí-phài Lī-bī-lâng, pang-chān A-lûn kap i ê hō͘-tāi, tī hōe-bō͘ lāi ūi-tio̍h Í-sek-lia̍t-lâng sū-hōng, koh ūi in sio̍k-chōe, chiah bián Í-sek-lia̍t-lâng in-ūi óa-kūn sèng-só͘, ū chai-hō lîm-kàu in.”

²⁰ Mô͘-se, A-lûn, kap Í-sek-lia̍t-lâng choân hōe-chiòng, chiū tùi Lī-bī-lâng án-ni chòe. Siōng Chú tùi Mô͘-se só͘ kóng koan-hē Lī-bī-lâng ê bēng-lēng, Í-sek-lia̍t-lâng lóng chiàu án-ni chòe.

²¹ Lī-bī-lâng chiū kiat-chēng ka-kī, sóe in ê saⁿ; A-lûn chiong in chòe te̍k-pia̍t ê lé-mi̍h hiàn hō͘ Siōng Chú, koh ūi in sio̍k-chōe kā in kiat-chēng.

²² Jiân-āu, Lī-bī-lâng ji̍p--khì, siū A-lûn kap i ê kiáⁿ ê chí-tō tī hōe-bō͘ sū-hōng; Siōng Chú tùi Mô͘-se só͘ kóng koan-hē Lī-bī-lâng ê bēng-lēng, Í-sek-lia̍t-lâng lóng chiàu án-ni chòe.

²³ Siōng Chú tùi Mô͘-se kóng,

²⁴ “Ē-bīn sī koan-hē Lī-bī-lâng ê kui-tēng: In jī-cha̍p-gō͘ hè í-siōng tio̍h lâi hōe-bō͘ sū-hōng,

²⁵ kàu gō͘-cha̍p hè chiū thè-hiu;

²⁶ thè-hiu liáu-āu thang tī hōe-bō͘ hia̍p-chō͘ in ê hiaⁿ-tī pān-lí sū-bū, m̄-bián koh hū-chek kang-chok. Koan-hē Lī-bī-lâng ê kui-tēng, lí tio̍h chiàu án-ni pān-lí.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan