Bìoball air-loidhne

Bîn-sò͘-kì 7 - 現代台語譯本羅馬字版

Ta̍k-cho̍k Cho̍k-tiúⁿ ê Hōng-hiàn

¹ Mô͘-se khí hōe-bō͘ oân-sêng liáu-āu, chiū kā hōe-bō͘ boah-iû hun-pia̍t-choh-sèng, pau-koat lāi-bīn só͘-ū ê khì-khū, chè-tôaⁿ kap chè-tôaⁿ ê khì-khū, lóng kā in boah-iû hun-pia̍t-choh-sèng.

² Hit-ji̍t Í-sek-lia̍t ta̍k chi-cho̍k, ta̍k chong-cho̍k hū-chek jîn-kháu-phó͘-cha ê cho̍k-tiúⁿ lóng tòa lé-mi̍h lâi hōng-hiàn.

³ In múi nn̄g ê cho̍k-tiúⁿ hōng-hiàn chi̍t tâi ū khàm pò͘-phâng ê chhia, ta̍k-ê cho̍k-tiúⁿ hōng-hiàn chi̍t chiah gû-káng, chiong chit la̍k tâi chhia kap cha̍p-jī chiah gû-káng sàng kàu hōe-bō͘ Siōng Chú ê bīn-chêng.

⁴ Siōng Chú kā Mô͘-se kóng,

⁵ “Lí tio̍h kā hiah-ê siu--khí-lâi, chòe hōe-bō͘ ê lō͘-ēng, chiàu Lī-bī-lâng sū-hōng ê chit-chek, kau hō͘ in.”

⁶ Mô͘-se chiū siu hiah-ê chhia kap gû, kau hō͘ Lī-bī-lâng.

⁷ Chiàu Kek-sūn ê kiáⁿ-sun sū-hōng ê chit-chek, Mô͘-se chiong nn̄g tâi chhia, sì chiah gû kau hō͘ in.

⁸ Chiàu Bí-la-lī ê kiáⁿ-sun sū-hōng ê chit-chek, chiong sì tâi chhia, poeh chiah gû kau hō͘ in. Chit nn̄g ê ka-cho̍k lóng siū chè-si A-lûn ê kiáⁿ Í-tha-má kàm-tok.

⁹ M̄-kú chhia kap gû bô kau hō͘ Ko-hat ê kiáⁿ-sun, in-ūi in sū-hōng ê chit-chek sī tio̍h ēng keng-thâu kng sèng-mi̍h.

¹⁰ Kā chè-tôaⁿ boah-iû hōng-hiàn chè-tôaⁿ ê sî, chèng siú-léng lóng tī chè-tôaⁿ chêng hōng-hiàn lé-mi̍h.

¹¹ Siōng Chú kā Mô͘-se kóng, “Hōng-hiàn chè-tôaⁿ ê kî-kan, ta̍k-ji̍t tio̍h ū chi̍t ê siú-léng lâi hōng-hiàn lé-mi̍h.”

^12-83 Chiah-ê siú-léng chiàu ē-bīn ê sūn-sū hōng-hiàn lé-mi̍h: Thâu chi̍t ji̍t hōng-hiàn lé-mi̍h--ê sī Iû-tāi chi-cho̍k ê siú-léng A-bí-ná-ta̍t ê kiáⁿ Ná-sūn. Tē-jī ji̍t hōng-hiàn lé-mi̍h--ê sī Í-sat-ka ê siú-léng So͘-ap ê kiáⁿ Ná-thán-gia̍p. Tē-saⁿ ji̍t hōng-hiàn lé-mi̍h--ê sī Se-pò͘-lûn hō͘-tāi ê siú-léng Hi-lûn ê kiáⁿ Í-lī-ap. Tē-sì ji̍t hōng-hiàn lé-mi̍h--ê sī Lū-piān hō͘-tāi ê siú-léng Sī-tiu-ní ê kiáⁿ Í-lī-siok. Tē-gō͘ ji̍t hōng-hiàn lé-mi̍h--ê sī Se-biān hō͘-tāi ê siú-léng So͘-lī-sa-tāi ê kiáⁿ Sī-lō͘-bi̍t. Tē-la̍k ji̍t hōng-hiàn lé-mi̍h--ê sī Ka-tek hō͘-tāi ê siú-léng Tiu-ní ê kiáⁿ Í-lī-ngá-sat. Tē-chhit ji̍t hōng-hiàn lé-mi̍h--ê sī Í-hoat-liân hō͘-tāi ê siú-léng A-bí-hut ê kiáⁿ Í-lī-sa-má. Tē-poeh ji̍t hōng-hiàn lé-mi̍h--ê sī Má-ná-se hō͘-tāi ê siú-léng Pí-tāi-siok ê kiáⁿ Ka-má-lia̍t. Tē-káu ji̍t hōng-hiàn lé-mi̍h--ê sī Piān-ngá-bín hō͘-tāi ê siú-léng Ki-to-nî ê kiáⁿ A-pí-tān. Tē-cha̍p ji̍t hōng-hiàn lé-mi̍h--ê sī Tān hō͘-tāi ê siú-léng A-bí-sa-tāi ê kiáⁿ A-hi-í-siā. Tē-cha̍p-it ji̍t hōng-hiàn lé-mi̍h--ê sī A-siat hō͘-tāi ê siú-léng Gô-lân ê kiáⁿ Phà-kiat. Tē-cha̍p-jī ji̍t hōng-hiàn lé-mi̍h--ê sī Ná-hut-tha-lī hō͘-tāi ê siú-léng Í-lâm ê kiáⁿ A-hi-la. Múi chi̍t ê siú-léng hōng-hiàn ê lé-mi̍h lóng siâng-khoán: chi̍t ê tāng iok chi̍t kong-kun gō͘-pah kong-khek ê gûn-pôaⁿ, chi̍t ê tāng iok poeh-pah kong-khek ê gûn-óaⁿ, lóng chiàu sèng-só͘ ê kong-chhìn, tóe-móa chhiau-iû ê iù mī-hún chòe sò͘-chè; chi̍t ê tāng chi̍t-pah cha̍p-sì kong-khek ê kim phiat-á, tóe-móa hiuⁿ; chi̍t chiah gû-káng, chi̍t chiah mî-iûⁿ-káng, chi̍t chiah chi̍t-hè ê soaⁿ-iûⁿ-káng-á chòe sio-hòa-chè; chi̍t chiah soaⁿ-iûⁿ-káng chòe sio̍k-chōe-chè; nn̄g chiah gû-káng, gō͘ chiah mî-iûⁿ-káng, gō͘ chiah soaⁿ-iûⁿ-káng, kap gō͘ chiah chi̍t-hè ê soaⁿ-iûⁿ-káng-á chòe pêng-an-chè.

⁸⁴ Kā chè-tôaⁿ boah-iû hōng-hiàn chè-tôaⁿ ê sî, Í-sek-lia̍t chèng siú-léng hōng-hiàn ê lé-mi̍h lóng-chóng ū: gûn-pôaⁿ cha̍p-jī ê, gûn-óaⁿ cha̍p-jī ê, kim-phiat-á cha̍p-jī ê;

⁸⁵ ta̍k-ê gûn-pôaⁿ tāng iok chi̍t kong-kun gō͘-pah kong-khek, ta̍k-ê gûn-óaⁿ tāng iok poeh-pah kong-khek; chiàu sèng-só͘ ê kong-chhìn, gûn chóng-kiōng iok jī-cha̍p-chhit kong-kun sì-pah kong-khek;

⁸⁶ cha̍p-jī ê kim-phiat-á tóe-móa hiuⁿ, chiàu sèng-só͘ ê kong-chhìn, ta̍k-ê phiat-á tāng chi̍t-pah cha̍p-sì kong-khek; kim chóng-kiōng iok chi̍t kong-kun sì-pah kong-khek;

⁸⁷ chòe sio-hòa-chè ê cheng-siⁿ, chóng-kiōng gû-káng cha̍p-jī chiah, iûⁿ-káng cha̍p-jī chiah, chi̍t-hè ê iûⁿ-káng-á cha̍p-jī chiah; chòe-hé hōng-hiàn--ê iáu ū sò͘-chè, kap chòe sio̍k-chōe-chè ê soaⁿ-iûⁿ-káng cha̍p-jī chiah;

⁸⁸ chòe pêng-an-chè ê cheng-siⁿ, chóng-kiōng gû-káng jī-cha̍p-sì chiah, mî-iûⁿ-káng la̍k-cha̍p chiah, soaⁿ-iûⁿ-káng la̍k-cha̍p chiah, chi̍t-hè ê iûⁿ-káng-á la̍k-cha̍p chiah. Í-siōng chiah-ê sī kā chè-tôaⁿ boah-iû hōng-hiàn chè-tôaⁿ liáu-āu, in choân-pō͘ ê hōng-hiàn.

⁸⁹ Mô͘-se ji̍p-khì hōe-bō͘ beh kap Siōng Chú kóng-ōe ê sî, thiaⁿ-kìⁿ ū siaⁿ tùi iok-kūi téng-bīn nn̄g ê ki-lō͘-pek tiong-kan ê si-un-chō chhut--lâi, sī Siōng Chú tùi i kóng-ōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan